ଖୋର୍ଦ୍ଧା ରୋଡ୍ ରେଳମଣ୍ଡଳର ନଅଟି ଷ୍ଟେସନକୁ ISO 14001:2015 ପରିବେଶଗତ ପରିଚାଳନା ପ୍ରଣାଳୀ ପ୍ରମାଣପତ୍ର

ଭୁବନେଶ୍ୱର, ୧୬ ଡିସେମ୍ବର ୨୦୨୫

ପୂର୍ବତଟ ରେଳପଥ ଖୋର୍ଦ୍ଧା ରୋଡ୍ ରେଳମଣ୍ଡଳର ନଅଟି ପ୍ରମୁଖ ରେଳ ଷ୍ଟେସନରେ ISO 14001:2015 ପରିବେଶଗତ ପରିଚାଳନା ପ୍ରଣାଳୀ (EMS) ଅଡିଟ୍ ସଫଳତାର ସହ ସମାପ୍ତ ହୋଇଛି ଯାହା ପରିବେଶଗତ ସ୍ଥିରତା ଏବଂ ପରିବେଶ-ଅନୁକୂଳ ରେଳ ପରିଚାଳନା ପ୍ରତି ଏହାର ନିରନ୍ତର ପ୍ରତିବଦ୍ଧତାରେ ଏକ ଗୁରୁତ୍ୱପୂର୍ଣ୍ଣ ମାଇଲଖୁଣ୍ଟ ସୂଚିତ କରିଛି । ସଫଳ ଅନୁପାଳନ ପରେ ଏକ ସ୍ୱଚ୍ଛ, ସବୁଜ ଏବଂ ସ୍ଥାୟୀ ପରିବେଶରେ ଯାତ୍ରୀ ଏବଂ ଆନୁସଙ୍ଗିକ ସେବା ପ୍ରଦାନ କରିବା ପାଇଁ ଏହି ଷ୍ଟେସନଗୁଡ଼ିକୁ ପରିବେଶଗତ ପରିଚାଳନା ପ୍ରଣାଳୀ ମାନକ ପ୍ରମାଣପତ୍ର ପ୍ରଦାନ କରାଯାଇଛି ।

ISO 14001:2015 ପ୍ରମାଣପତ୍ର ସହିତ ସମ୍ମାନିତ ରେଳ ଷ୍ଟେସନଗୁଡ଼ିକ ହେଉଛି ପୁରୀ, ଭୁବନେଶ୍ୱର, ଖୋର୍ଦ୍ଧା ରୋଡ୍, ପଲାସା, ବାଲୁଗାଁ, ଯାଜପୁର କେନ୍ଦୁଝର ରୋଡ୍, ଭଦ୍ରକ, କଟକ ଏବଂ ବ୍ରହ୍ମପୁର । ଏହି ଷ୍ଟେସନଗୁଡ଼ିକ ସମଗ୍ର ଷ୍ଟେସନ ପରିସରରେ ଉନ୍ନତ ଏବଂ ପରିବେଶଗତ ଭାବରେ ଦକ୍ଷ ପଦକ୍ଷେପ ଗ୍ରହଣ କରିଛି ଯେଉଁଥିରେ ଯାତ୍ରୀ ସେବା ଏବଂ ଆନୁସଙ୍ଗିକ କାର୍ଯ୍ୟକଳାପ ଯେପରିକି ଟ୍ରେନ୍ ପରିଚାଳନା, ସିଗନାଲିଂ ଏବଂ ଟେଲିଯୋଗାଯୋଗ, ଷ୍ଟେସନ ରକ୍ଷଣାବେକ୍ଷଣ, ଟିକେଟିଂ ସେବା, ସାର୍ବଜନୀନ ଉପଯୋଗୀତା ଏବଂ ଅନ୍ୟାନ୍ୟ ଯାତ୍ରୀ ସୁବିଧା ଅନ୍ତର୍ଭୁକ୍ତ ଅଟେ ।

ସମସ୍ତ ନଅଟି ପ୍ରମାଣିତ ଷ୍ଟେସନ୍ ଅପଚୟ ହ୍ରାସ, ଜଳ ସଂରକ୍ଷଣ ଏବଂ ସମ୍ପଦର ଦକ୍ଷ ଉପଯୋଗ ପାଇଁ ପ୍ରଭାବଶାଳୀ ପଦକ୍ଷେପ କାର୍ଯ୍ୟକାରୀ କରି ଉନ୍ନତ ପରିବେଶଗତ କାର୍ଯ୍ୟଦକ୍ଷତା ପ୍ରଦର୍ଶନ କରିଛନ୍ତି । ନିର୍ଦ୍ଧାରିତ ନିର୍ଦ୍ଦେଶାବଳୀ ଅନୁଯାୟୀ ବ୍ୟବସ୍ଥିତ ସଂଗ୍ରହ, ପୃଥକୀକରଣ ଏବଂ ବୈଜ୍ଞାନିକ ଭାବରେ ବର୍ଜ୍ୟବସ୍ତୁର ନିଷ୍କାସନ କଡ଼ାକଡ଼ି ଭାବରେ କରାଯାଉଛି । ପ୍ଲାଟଫର୍ମ, ପରିଚଳନ କ୍ଷେତ୍ର, ଶୌଚାଳୟ ଏବଂ ବିଶ୍ରାମାଗାର ସମେତ ସ୍ୱଚ୍ଛତା, ପରିମଳ ଏବଂ ପରିଷ୍କାରତାରେ ମଧ୍ୟ ଗୁରୁତ୍ୱପୂର୍ଣ୍ଣ ଉନ୍ନତି ହାସଲ କରାଯାଇଛି । ନିରାପଦ ଏବଂ ସ୍ୱଚ୍ଛ ପାନୀୟ ଜଳ ସୁନିଶ୍ଚିତ କରିବା, ଉନ୍ନତ ପରିମଳ ସୁବିଧା ଏବଂ ପାଣି ଟାଙ୍କିରେ ଭାସମାନ ଭଲଭ୍ ସ୍ଥାପନ ଭଳି ଜଳ ସଂରକ୍ଷଣ ପଦକ୍ଷେପ ଏବଂ ପରିବେଶ ସୁରକ୍ଷାରେ ଆହୁରି ଅବଦାନ ରଖିଛି ।

ISO 14001:2015 ହେଉଛି ପରିବେଶଗତ ପରିଚାଳନା ପ୍ରଣାଳୀ ପାଇଁ ଏକ ଆନ୍ତର୍ଜାତୀୟ ସ୍ତରରେ ସ୍ୱୀକୃତିପ୍ରାପ୍ତ ମାନକ ଯାହା ପ୍ରଯୁଜ୍ୟ ରାଜ୍ୟ ଏବଂ କେନ୍ଦ୍ରୀୟ ପ୍ରଦୂଷଣ ନିୟନ୍ତ୍ରଣ ବୋର୍ଡ ନିୟମାବଳୀର ଅନୁପାଳନ ସୁନିଶ୍ଚିତ କରିବା ସହିତ ସଂଗଠନଗୁଡ଼ିକୁ ପରିବେଶଗତ କାର୍ଯ୍ୟଦକ୍ଷତା ଉନ୍ନତ କରିବାରେ ସାହାଯ୍ୟ କରେ । ଏହି ପ୍ରମାଣପତ୍ର ଶକ୍ତି ସଂରକ୍ଷଣ, ଦକ୍ଷ ସମ୍ବଳ ପରିଚାଳନା ଏବଂ ସ୍ଥାୟୀ ବର୍ଜ୍ୟବସ୍ତୁ ପରିଚାଳନା ପ୍ରଣାଳୀ ସମେତ ସଂରଚିତ ପରିବେଶଗତ ପରିଚାଳନା ପ୍ରଣାଳୀର ପ୍ରଭାବଶାଳୀ କାର୍ଯ୍ୟାନ୍ୱୟନକୁ ପ୍ରତିଫଳିତ କରୁଅଛି ।

ତୃତୀୟ-ପକ୍ଷ ସ୍ୱୀକୃତିପ୍ରାପ୍ତ ଜାତୀୟ ସଂସ୍ଥା ଏନଭୋ ଗ୍ରୀନ୍ ମ୍ୟାନେଜମେଣ୍ଟ କନ୍ସଲଟିଙ୍ଗ ସଲ୍ୟୁସନ୍ସ, କଟକ ଦ୍ୱାରା କରାଯାଇଥିବା ଏକ ବ୍ୟାପକ ସର୍ଭେ ଏବଂ ଅଡିଟ୍ ପରେ ପ୍ରମାଣପତ୍ର ପ୍ରଦାନ କରାଯାଇଥିଲା ଯାହା ପ୍ରତ୍ୟେକ ଷ୍ଟେସନରେ ନିର୍ଦ୍ଧାରିତ ପରିବେଶଗତ ପରିଚାଳନା ମାନଦଣ୍ଡ ଅନୁପାଳନର ମୂଲ୍ୟାଙ୍କନ କରିଥିଲା ।

ଖୋର୍ଦ୍ଧା ରୋଡ ରେଳମଣ୍ଡଳର ମଣ୍ଡଳ ରେଳ ପ୍ରବନ୍ଧକ ଶ୍ରୀ ଆଲୋକ ତ୍ରିପାଠୀ ମେକାନିକାଲ୍ ବିଭାଗର ପରିବେଶଗତ ହାଉସକିପିଂ ମ୍ୟାନେଜମେଣ୍ଟ (EnHM) ଦଳକୁ ରେଳ ଷ୍ଟେସନଗୁଡ଼ିକୁ ଅଧିକ ପରିବେଶ ଅନୁକୂଳ କରିବାରେ ଏବଂ ପୂର୍ବତଟ ରେଳପଥର ସ୍ଥାୟୀ, ଦାୟିତ୍ୱପୂର୍ଣ୍ଣ ଏବଂ ଯାତ୍ରୀ-କେନ୍ଦ୍ରିକ ରେଳ ପରିଚାଳନା ପ୍ରତି ପ୍ରତିବଦ୍ଧତାକୁ ସୁଦୃଢ଼ କରିବା ପାଇଁ ଏବଂ ସେମାନଙ୍କର ଉତ୍ସର୍ଗୀକୃତ ପ୍ରୟାସ ପାଇଁ ଅଭିନନ୍ଦନ ଜଣାଇଛନ୍ତି ।