Unnatipathe

ଭୁବନେଶ୍ୱର, ୨୧ ନଭେମ୍ବର ୨୦୨୫

ଭୁବନେଶ୍ୱର ତା ୨୧.୧୧.୨୫ :- ରାଜ୍ୟରେ ଆଇନ ଶୃଙ୍ଖଳା ପରିସ୍ଥିତି ସମ୍ପୂର୍ଣ ବିପଯ୍ୟସ୍ଥ। ୨୦୨୪ରେ  ୨୪ ବର୍ଷର ଶାସନକୁ ଏକ ସ୍ୱଚ୍ଛ, ପ୍ରଗତିଯୁକ୍ତ ଓ ଆଇନ ଶୃଙ୍ଖଳାର ଉତ୍ତମ ଶାସନ ପ୍ରତିଷ୍ଠା ପାଇଁ ବିତାଡିତ କରିଥିଲେ । କିନ୍ତୁ ସରକାର ଆସିବା ପରେ ନାରୀ ନିର୍ଯ୍ୟାତନା କ୍ଷେତ୍ରରେ ରାଜ୍ୟକୁ ବଦନାମ ହେବାକୁ ପଡୁଛି  । ପ୍ରତ୍ୟେକ ଦିନ ୧୫ ଜଣ ମହିଳା ଅତ୍ୟାଚାରର ଶିକାର ହେଉଛନ୍ତି । ଗଣ ଦୁଷ୍କର୍ମ, ନାବାଳିକା ଗର୍ଭବତୀ, ହତ୍ୟାକାଣ୍ଡ, ଲୁଟ ତରାଜ ଇତ୍ୟାଦି ସୀମା ଲଙ୍ଘନ କରିଛି ବୋଲି ଆଜି ପ୍ରଦେଶ କଂଗ୍ରେସ କାର୍ଯ୍ୟାଳୟରେ ଅନୁଷ୍ଠିତ ସାମ୍ବାଦିକ ସମ୍ମୀଳନୀରେ ପିସିସିର ବରିଷ୍ଠ ମୁଖପାତ୍ର ରଜନୀ କୁମାର ମହାନ୍ତି ପ୍ରକାଶ କରିଛନ୍ତି। ସେ କହିଛନ୍ତି ସମଗ୍ର ଓଡିଶାରେ ବର୍ତ୍ତମାନ ଦୁର୍ବୃତ୍ତଙ୍କ ଶାସନ ଚାଲିଛି । ବର୍ତ୍ତମାନ ଏକ ଅତ୍ୟନ୍ତ ଗୁରୁତର ଘଟଣା ଘଟିଛି, ପିସିସି ସଭାପତି ଭକ୍ତ ଚରଣ ଦାସଙ୍କ ପୁତ୍ର ତଥା ଭବାନୀପାଟଣା ଯୁବ ବିଧାୟକ ସାଗର ଚରଣ ଦାସଙ୍କୁ ଜୀବନରେ ମାରିଦେବାର ଧମକ ମିଳିଛି । ଗତକାଲି ସକାଳେ କଂଗ୍ରେସ ଦଳର ଜଣେ ଜୋନ ସଭାପତି ତଥା ବିଧାୟକ ଶ୍ରୀ ଦାସଙ୍କ ସମର୍ଥକ ଦେବାନନ୍ଦ ଜୋଷୀଙ୍କୁ ୪/୫ ଜଣ ମୁଖା ପିନ୍ଧା ଦୁର୍ବୁତ୍ତ ତାଙ୍କୁ ଘରୁ ଉଠାଇ ଆଣି ବିଧାୟକ ଶ୍ରୀ ଦାସ କୁଆଡେ ଅଛନ୍ତି ବୋଲି ପଚାରିଥିଲେ ଏବଂ ନ କହିଲେ ଜୀବନରେ ତାଙ୍କୁ ଏବଂ ବିଧାୟକଙ୍କୁ ହତ୍ୟା କରାଯିବ ବୋଲି ଧମକ ଦେଇଥିଲେ ।

ରାଜ୍ୟର ଜଣେ ଉଦୀୟମାନ ଓ ପ୍ରସିଦ୍ଧ ବିଧାୟକଙ୍କୁ ହତ୍ୟା ଧମକ ମିଳିବା ଦର୍ଶାଉଛି ଯେ ରାଜ୍ୟରେ ମୋହନ ସରକାରଙ୍କ ନୁହଁ ଦୁର୍ବୃତ୍ତଙ୍କ ଶାସନ ଚାଲିଛି । ପୋଲିସ ଦୁର୍ବୃତ୍ତଙ୍କୁ ଧରି ପୁଣି ଛାଡି ଦେବା ଓଡ଼ିଶାରେ ଜଙ୍ଗଲରାଜର ଯୁଗ ଆରମ୍ଭ ହୋଇଗଲାଣି ବୋଲି ସୂଚାଉଛି । ବିଗତ ଦିନରେ କଂଗ୍ରେସ ନାରୀ ଦୁଷ୍କର୍ମକୁ ନେଇ ଆନ୍ଦୋଳନ କରିବାରୁ ଆମକୁ ଆତଙ୍କବାଦୀ ଆଖ୍ୟା ଦେଲେ । ତେବେ ବିଧାୟକଙ୍କ ସମର୍ଥକ ଏବଂ କଂଗ୍ରେସ ଦଳର ଜଣେ କର୍ମକର୍ତ୍ତାଙ୍କୁ ଘରୁ ଟେକିନେଇ ଧମକ ଦେବା ଦୁର୍ବୃତ୍ତଙ୍କୁ କଣ କୁହାଯିବ ?

ସୁରକ୍ଷା କଣ କେବଳ ମୋହନ ବାବୁ, କେଭି ସିଂଦେଓ, ପ୍ରଭାତୀ ମହାଶୟା ଏବଂ ମନ୍ତ୍ରୀମଣ୍ଡଳଙ୍କ ପାଇଁ କି ?

ତେବେ କଂଗ୍ରେସ ଦାବୀ କରୁଛି ଅପରାଧୀଙ୍କ ଦଣ୍ଡବିଧାନ ହେଉ । ବିଧାୟକ ଶ୍ରୀ ଦାସ ଡିଜିପିଙ୍କୁ ଲିଖିତ ଚିଠି ଲେଖି ସାରିଛନ୍ତି ।

ଯଦି ପୁଲିସ ଅପରାଧୀଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବେ ନାହିଁ ତେବେ କଂଗ୍ରେସ ପକ୍ଷରୁ ଡିଜିପି ଅଫିସ ଘେରାଓ କରି ତାଙ୍କୁ ଅଫିସ ଛଡ଼ାଯିବ ନାହିଁ । ମୁଖ୍ୟମନ୍ତ୍ରୀଙ୍କୁ ମଧ୍ୟ ଅଫିସ ଯିବାକୁ ଦେବ ନାହିଁ ବୋଲି ଶ୍ରୀ ମହାନ୍ତି ପ୍ରକାଶ କରୁଛନ୍ତି ।

ଅନ୍ୟତମ ମୁଖପାତ୍ର ବିଭୁତି ମହାପାତ୍ର କହିଲେ, ମୂଳକଥା ହେଲା କଂଗ୍ରେସ ସଭାପତି ଭକ୍ତ ଚରଣ ଦାସ ବାଲି ଚୋରୀ ଉପରେ ଏକ ଗମ୍ଭୀର ଅଭିଯୋଗ ଆଣିବାର ଦୁଇଦିନ ପରେ ଧମକ ଘଟଣା ଘଟିଛି । ପୂର୍ବରୁ ରାଜ୍ୟରେ ମନ୍ତ୍ରୀ ନବ ଦାସଙ୍କୁ ଏବଂ ଆଇନଜୀବୀ ପୀତବାସ ପଣ୍ଡାଙ୍କୁ ହତ୍ୟା କରା ଯାଇଥିଲା ଏବଂ ବର୍ତ୍ତମାନ ଜଣେ ବିଧାୟକଙ୍କୁ ଖୋଲାଖୋଲି ଧମକ ମିଳୁଛି । ଏହି ଘଟଣା ଯୋଗୁଁ କଂଗ୍ରେସ ବିଚଳିତ । ପିସିସି ସଭାପତିଙ୍କ ଯୋଗୁଁ କଂଗ୍ରେସର ଓ ବିଧାୟକ ସାଗର ଦାସଙ୍କ ଲୋକପ୍ରିୟତା ବୃଦ୍ଧିକୁ ସହ୍ୟ କରି ନ ପାରି, ଭୟରେ ଏଭଳି ହୀନକାଣ୍ଡ ଘଟାଇଛନ୍ତି । ତେବେ ଏହି ହତ୍ୟା ଧମକ ପଛରେ କେଉଁ ବଡ଼ ବଡ଼ିଆ ବ୍ୟକ୍ତି ବିଶେଷ ଅଛନ୍ତି ତାଙ୍କ ବିରୋଧରେ ସରକାର ତଥା ପୋଲିସ କାର୍ଯ୍ୟାନୁଷ୍ଠାନ ଗ୍ରହଣ କରୁ ବୋଲି କହିବା ସହ   ବିଧାୟକ ଶ୍ରୀ ଦାସଙ୍କୁ ଉଚ୍ଚତ୍ତମ ସୁରକ୍ଷା ପ୍ରଦାନ କରାଯାଉ ବୋଲି ମୁଖପାତ୍ର ଶ୍ରୀ ମହାପାତ୍ର ଦାବୀ ଜଣାଇଛନ୍ତି । ଗଣମାଧ୍ୟମ ସଂଯୋଜକ ଦୀପକ କୁମାର ମହାପାତ୍ର ଉପସ୍ଥିତ ଥିଲେ।

ଭୁବନେଶ୍ୱର, ୧୯ ନଭେମ୍ବର ୨୦୨୫

• ଜନସାଧାରଣଙ୍କୁ ନିବେଦନ ବୈଧ ଟିକେଟ୍ ନେଇ ଦାୟିତ୍ୱର ସହିତ ଯାତ୍ରା କରନ୍ତୁ ।
• ଅକ୍ଟୋବର 2025 ରେ 58,731 ଟି ଟିକେଟ୍ ଉଲ୍ଲଂଘନ ଚିହ୍ନଟ ହୋଇଛି ।
• ଏପ୍ରିଲ୍ ରୁ ଅକ୍ଟୋବର ମାସ 2025 ମଧ୍ୟରେ 4.41 ଲକ୍ଷରୁ ଅଧିକ ବିନା ଟିକେଟ୍ କିମ୍ବା ଅନୁପଯୁକ୍ତ ଟିକଟ ସମ୍ବନ୍ଧୀୟ ଅପରାଧ ରେକର୍ଡ କରାଯାଇଛି ।
• 2,145 ଟି ଟ୍ରେନରେ ବ୍ୟାପକ ଯାଞ୍ଚ କରାଯାଇଅଛି ।
• ଖୋର୍ଦ୍ଧା ରୋଡ୍ ରେଳମଣ୍ଡଳ ଯାତ୍ରୀମାନଙ୍କୁ ନିୟମ ପାଳନ କରିବାକୁ ଏବଂ ଅସୁବିଧା ଏଡାଇବାକୁ ଅନୁରୋଧ କରିଛି ।

ପୂର୍ବତଟ ରେଳପଥ ଖୋର୍ଦ୍ଧା ରୋଡ୍ ରେଳମଣ୍ଡଳ ଅନଧିକୃତ ଯାତ୍ରାକୁ ଏଡ଼ାଇବା ପାଇଁ ଏହାର କାର୍ଯ୍ୟକାରୀତା ଏବଂ ସଚେତନତା ପ୍ରୟାସକୁ ସୁଦୃଢ଼ କରିଛି ଯାହା ଦ୍ୱାରା ଅକ୍ଟୋବର 2025 ରେ ବହୁ ସଂଖ୍ୟକ ବିନା ଟିକେଟ୍ ଏବଂ ଅନିୟମିତ ଯାତ୍ରା ମାମଲା ଚିହ୍ନଟ କରାଯାଇଅଛି । ରେଳମଣ୍ଡଳ ଗୁରୁତ୍ୱାରୋପ କରିଛି ଯେ ବିନା ଟିକେଟ କିମ୍ବା ବୈଧ ଟିକେଟ ବିନା ଟ୍ରେନ ଯାତ୍ରା କରିବା ଦ୍ୱାରା କେବଳ ଦଣ୍ଡ ଲାଗୁ ହୁଏ ନାହିଁ ବରଂ ଯାତ୍ରୀମାନଙ୍କୁ ଅସୁବିଧା ହୁଏ ଏବଂ ଯାତ୍ରା ପରିବେଶକୁ ବିପର୍ଯ୍ୟସ୍ତ କରେ ।

କେବଳ ଅକ୍ଟୋବର 2025 ରେ, ଟିକେଟ ଉଲ୍ଲଂଘନର 58,731 ମାମଲା ଚିହ୍ନଟ ହୋଇଅଛି ଯାହା ଗତ ବର୍ଷ ଅକ୍ଟୋବର ମାସ ତୁଳନାରେ 5.4% ଅଧିକ ଅଟେ । ଏପ୍ରିଲରୁ ଅକ୍ଟୋବର 2025 ପର୍ଯ୍ୟନ୍ତ, ମୋଟ ଉଲ୍ଲଂଘନ 4,41,106 ମାମଲାକୁ ବୃଦ୍ଧି ପାଇଛି ଯାହା ପୂର୍ବ ଆର୍ଥିକ ବର୍ଷର ସମାନ ସମୟ ମଧ୍ୟରେ ପଞ୍ଜିକୃତ 4,00,946 ମାମଲା ତୁଳନାରେ 10% ଅଧିକ ।

ଜରିମାନା ସଂଗ୍ରହରେ ଯଥେଷ୍ଟ ଅଭିବୃଦ୍ଧି :

ବ୍ୟାପକ ଟିକେଟ ଯାଞ୍ଚ ଓ ସଚେତନତା ପ୍ରୟାସ କେବଳ ରାଜସ୍ୱ ସୁରକ୍ଷାକୁ ସୁଦୃଢ଼ କରିନାହିଁ ବରଂ ଯାତ୍ରୀମାନଙ୍କୁ ଅନୁପଯୁକ୍ତ ଯାତ୍ରା ଟିକେଟ କିମ୍ବା ବିନା ଟିକେଟ ଯାତ୍ରା କରିବାକୁ ନିରୁତ୍ସାହିତ କରିଛି, ଯାହା ଦ୍ୱାରା ଦାୟିତ୍ୱପୂର୍ଣ୍ଣ ଯାତ୍ରା ଅଭ୍ୟାସକୁ ପ୍ରୋତ୍ସାହିତ କରାଯାଇ ହେବ ।  ରେଳମଣ୍ଡଳ 2025 ଅକ୍ଟୋବରରେ ₹3,15,11,770 ଜରିମାନା ସଂଗ୍ରହ କରିଛି, ଯାହା ଗତ ବର୍ଷ ତୁଳନାରେ 23% ବୃଦ୍ଧିକୁ ପ୍ରତିଫଳିତ କରୁଅଛି । ଚଳିତ ଆର୍ଥିକ ବର୍ଷର ଏପ୍ରିଲ ମାସ ଠାରୁ ଅକ୍ଟୋବର ମାସ ମଧ୍ୟରେ ଜରିମାନା ପରିମାଣ ₹23,94,23,698 ରେ ପହଞ୍ଚିଛି ଯାହା ଅକ୍ଟୋବର 2024 ସୁଦ୍ଧା ଆଦାୟ ହୋଇଥିବା ଜରିମାନା ₹18,97,29,010 ତୁଳନାରେ 26% ବୃଦ୍ଧିକୁ ଦର୍ଶାଉଛି । ଏହି ପଦକ୍ଷେପଗୁଡ଼ିକ ଯାତ୍ରୀମାନଙ୍କୁ ସମ୍ମାନର ସହିତ ଯାତ୍ରା କରିବାକୁ ଏବଂ ସେମାନଙ୍କ ଯାତ୍ରା ସମୟରେ ରେଳ ନିୟମ ପାଳନ କରିବାକୁ ଆହୁରି ଉତ୍ସାହିତ କରେ ।

ବ୍ୟାପକ ତଦାରଖ ଏବଂ ଯୋଜନାବଦ୍ଧ ଯାଞ୍ଚ

ଚଳିତ ଆର୍ଥିକ ବର୍ଷରେ ମୋଟ 1,586 ଟି ଟିକେଟ ଯାଞ୍ଚ ଅଭିଯାନ କରାଯାଇଥିବା ବେଳେ ରେଳମଣ୍ଡଳ ପକ୍ଷରୁ 2,145 ଟି ଟ୍ରେନରେ ମଧ୍ୟ ଟିକେଟ ଯାଞ୍ଚ କରାଯାଇଥିଲା । ଏହି ନିରନ୍ତର ପଦକ୍ଷେପଗୁଡ଼ିକ ଉଚ୍ଚ ଅନୁପାଳନ ସ୍ତର ଏବଂ ଅନଧିକୃତ ଯାତ୍ରାରେ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ଭାବରେ ଅବଦାନ ରଖିଛି ।

ସଚେତନତା ଏବଂ ପ୍ରବର୍ତ୍ତନ ଏକାଠି କାର୍ଯ୍ୟ କରିବା

କଠୋର ତଦାରଖ ସହିତ, ଖୋର୍ଦ୍ଧା ରୋଡ୍ ରେଳମଣ୍ଡଳ ସାର୍ବଜନୀନ ଘୋଷଣା, ସୋସିଆଲ ମିଡିଆ ମେସେଜିଂ ଏବଂ ଷ୍ଟେସନ-ସ୍ତରୀୟ ପ୍ରଚାର ମାଧ୍ୟମରେ ବ୍ୟାପକ ସଚେତନତା ଅଭିଯାନ ସର୍ବଦା ଚଳାଇ ଆସୁଅଛି । ଯାତ୍ରୀମାନଙ୍କୁ ନିରନ୍ତର ଭାବେ ସମ୍ମାନର ସହିତ ଯାତ୍ରା କରିବାକୁ ଏବଂ ରେଳ ନିୟମ ପାଳନ କରିବାକୁ ଉତ୍ସାହିତ କରାଯାଇଛି। ସ୍ୱତନ୍ତ୍ର ଟିକେଟ ଯାଞ୍ଚ ଦଳଗୁଡ଼ିକ ରେଳ ସୁରକ୍ଷା ବଳ (RPF) ସହିତ ସମନ୍ୱୟ ରଖି ଏହି ବ୍ୟାପକ ଯାଞ୍ଚ ତୁଲାଉଥିବାବେଳେ ପ୍ରମୁଖ ଷ୍ଟେସନ ଏବଂ ଟ୍ରେନଗୁଡ଼ିକରେ ଦକ୍ଷ ଏବଂ ସମନ୍ୱିତ ପ୍ରବର୍ତ୍ତନ ସୁନିଶ୍ଚିତ କରୁଛନ୍ତି ।

ଖୋର୍ଦ୍ଧା ରୋଡ୍ ରେଳମଣ୍ଡଳ ଏକ ସ୍ୱଚ୍ଛ, ନିରାପଦ ଏବଂ ଯାତ୍ରୀ-ଅନୁକୂଳ ରେଳ ଇକୋସିଷ୍ଟମ ପ୍ରତି ଏହାର ପ୍ରତିବଦ୍ଧତାକୁ ପୁନର୍ବାର ଦୋହରାଇଛି । ରେଳମଣ୍ଡଳର ବରିଷ୍ଠ ବାଣିଜ୍ୟିକ ପ୍ରବନ୍ଧକ ଶ୍ରୀ ଅନିଲ କୁମାର ଏସ. ସମସ୍ତ ଯାତ୍ରୀଙ୍କୁ ଅଯଥା ଅସୁବିଧାକୁ ଏଡାଇବା ଏବଂ ଏକ ଶୃଙ୍ଖଳିତ ଏବଂ ସମ୍ମାନର ସହ ସୁବିଧା ଯୁକ୍ତ ଯାତ୍ରା ପରିବେଶକୁ ଆପଣେଇବା ପାଇଁ ସର୍ବଦା ବୈଧ ଟିକେଟ୍ କିମ୍ବା ଯାତ୍ରା ଅଧିକାର ଦଲିଲ ବହନ କରିବାକୁ ନିବେଦନ କରିଛନ୍ତି ।

ଭୁବନେଶ୍ୱର, ୨୩ ଅକ୍ଟୋବର ୨୦୨୫

ଭୁବନେଶ୍ୱର, ୨୩ ଅକ୍ଟୋବର ୨୦୨୫

ଭୁବନେଶ୍ୱର, ୨୩ ଅକ୍ଟୋବର ୨୦୨୫

ପୂର୍ବତଟ ରେଳପଥ  ଜନସାଧାରଣଙ୍କୁ  — ବିଶେଷକରି ଯୁବପିଢ଼ି ଏବଂ ସାମାଜିକ ଗଣମାଧ୍ୟମ ରୁଚିଶୀଳମାନଙ୍କୁ — ରେଳପଥ ଉପରେ, ଟ୍ରାକ୍ ନିକଟରେ କିମ୍ବା ଚାଲୁଥିବା ଟ୍ରେନ୍‌ର ଫୁଟବୋର୍ଡ କିମ୍ବା ଛାତ ଉପରେ ଭିଡିଓ ସୁଟିଂ କରିବା କିମ୍ବା "ରିଲ୍‌" ତିଆରି କରିବାର ମାରାତ୍ମକ ଏବଂ ବେଆଇନ ଅଭ୍ୟାସ ବିରୁଦ୍ଧରେ ସତର୍କ କରାଇ ଏକ କଡ଼ା ସଚେତନତା ଅଭିଯାନ ଆରମ୍ଭ କରିଛି।ପୂର୍ବତଟ ରେଳପଥ ସ୍ପଷ୍ଟ କରିଛି  ଯେ ଏପରି ବେପରୁଆ କାର୍ଯ୍ୟ କେବଳ ଜୀବନ ପାଇଁ ବିପଦପୂର୍ଣ୍ଣ ନୁହେଁ ବରଂ ରେଳବାଇ ଆଇନ, ୧୯୮୯ ଅନୁଯାୟୀ କଡ଼ା ଦଣ୍ଡନୀୟ ଅପରାଧ।

ଏହି ପଦକ୍ଷେପ ଏକ ଚିନ୍ତାଜନକ ପ୍ରବୃତ୍ତି ପ୍ରତି ପ୍ରତିକ୍ରିୟା ସ୍ୱରୂପ ଗ୍ରହଣ କରାଯାଇଛି, ଯେଉଁଠାରେ ସାମାଜିକ ଗଣମାଧ୍ୟମର ଖ୍ୟାତି ପାଇବା ପାଇଁ କେହି କେହି ବ୍ୟକ୍ତି ସ୍ୱୟଂ ତାଙ୍କର ଏବଂ ରେଳ ପରିଚାଳନାର ସୁରକ୍ଷାକୁ ବିପଦରେ ପକାନ୍ତି, ଯାହା ଅନେକ ସମୟରେ ଦୁଃଖଦ ଓ ମାରାତ୍ମକ ଦୁର୍ଘଟଣାକୁ ଜନ୍ମ ଦେଇଥାଏ।

ପୂର୍ବତଟ ରେଳପଥ ଅନୁରୋଧ କରିଛି ଯେ ରେଳପଥ, ଷ୍ଟେସନ ପରିସର ଏବଂ ଚଳନ୍ତା ଟ୍ରେନ୍‌ଗୁଡ଼ିକ ମନୋରଞ୍ଜନ ଭିଡିଓ ପାଇଁ ପୃଷ୍ଠଭୂମି ନୁହେଁ, ବରଂ ଏଗୁଡ଼ିକ ଉଚ୍ଚ ବିପଦପୂର୍ଣ୍ଣ କାର୍ଯ୍ୟକ୍ଷମ କ୍ଷେତ୍ର। ଏହି ସ୍ଥାନଗୁଡ଼ିକରେ ଅନଧିକାର ପ୍ରବେଶ କିମ୍ବା ଷ୍ଟଣ୍ଟ ପ୍ରଦର୍ଶନ କରିବା ଜୀବନ ପ୍ରତି ଏକ ଗୁରୁତର ବିପଦ ଏବଂ ଅପରାଧିକ ଅବହେଳାର କାର୍ଯ୍ୟ।

ରେଳ ସୁରକ୍ଷା ବଳ (RPF) ଏବଂ ସରକାରୀ ରେଳ ପୋଲିସ (GRP)କୁ ଉଲ୍ଲଂଘନକାରୀଙ୍କ ବିରୁଦ୍ଧରେ ‘ଶୂନ୍ୟ ସହନଶୀଳତା’ ନୀତି ଅନୁସରଣ କରିବାକୁ ନିର୍ଦ୍ଦେଶ ଦିଆଯାଇଛି। ଆଇନଗତ କାର୍ଯ୍ୟାନୁଷ୍ଠାନ ଶୀଘ୍ର ଏବଂ କଠୋର ହେବ। ଚଳନ୍ତା ଟ୍ରେନ୍ ନିକଟରେ ଫଟୋ କିମ୍ବା ଭିଡିଓ ଧାରଣ କରିବା, କିମ୍ବା ରେଳପଥ ଉପରେ ଅନଧିକୃତ ପ୍ରବେଶ କରୁଥିବା ଯେକୌଣସି ବ୍ୟକ୍ତିଙ୍କ ବିରୁଦ୍ଧରେ କଠୋର ଆଇନଗତ ପଦକ୍ଷେପ ଗ୍ରହଣ କରାଯିବ। ଏହିପରି ଉଲ୍ଲଂଘନକାରୀଙ୍କ ବିରୁଦ୍ଧରେ ରେଳ ଆଇନ, 1989 ର ଧାରା 147 ଏବଂ 153 ଅନୁଯାୟୀ ମାମଲା ରୁଜୁ ହେବ, ଯେଉଁଥିରେ ଜେଲ ଦଣ୍ଡ ସହିତ ଆର୍ଥିକ ଦଣ୍ଡ ମଧ୍ୟ ଲାଗୁ ହେବ।

ପୂର୍ବତଟ ରେଳପଥ ସମସ୍ତ ନାଗରିକଙ୍କୁ, ବିଶେଷକରି ଛାତ୍ର ଏବଂ କିଶୋରମାନଙ୍କୁ ସୁରକ୍ଷା ନିର୍ଦ୍ଦେଶାବଳୀ ବୁଝିବା ଏବଂ ପାଳନ କରିବାକୁ ଅନୁରୋଧ କରୁଛି, ଏହା ଉପରେ ଗୁରୁତ୍ୱ ଦେଇ ଯେ ଜୀବନ ଏକ ପୋଷ୍ଟ ଅପେକ୍ଷା ଅଧିକ ମୂଲ୍ୟବାନ। ଜନସାଧାରଣଙ୍କୁ ପରାମର୍ଶ ଦିଆଯାଇଛି ଯେ ଫଟୋଗ୍ରାଫି ସମେତ କୌଣସି କାରଣ ପାଇଁ ରେଳ ଟ୍ରାକ୍ ଉପରକୁ କେବେବି ଯିବାକୁ ନାହିଁ, କାରଣ ଟ୍ରେନ୍ଗୁଡ଼ିକ ଦ୍ରୁତ ଗତିରେ ଗତି କରେ ଏବଂ ଦେଖାଯାଉଥିବା ଦୂରତା ଅପେକ୍ଷା ଶୀଘ୍ର ଅତିକ୍ରମ କରେ। ଲୋକମାନେ ଚାଲୁଥିବା ଟ୍ରେନ୍ ରୁ ଝୁଙ୍କି ପଡ଼ିବା, ଫୁଟବୋର୍ଡରେ ଯାତ୍ରା କରିବା, କିମ୍ବା ଭିଡିଓ ଫିଲ୍ମ କରିବା ପାଇଁ ଛାତ କିମ୍ବା ଇଞ୍ଜିନରେ ଚଢ଼ିବା ଭଳି ବିପଦପୂର୍ଣ୍ଣ ଷ୍ଟଣ୍ଟ ପ୍ରଦର୍ଶନ କରିବାରୁ ଦୂରେଇ ରହିବା ଉଚିତ, କାରଣ ଏପରି କାର୍ଯ୍ୟ ଉଚ୍ଚ-ଭୋଲଟେଜ୍ ଓଭରହେଡ୍ ଇଲେକ୍ଟ୍ରିକ୍ (OHE) ଲାଇନ ସହିତ ଘାତକ ସଂସ୍ପର୍ଶରେ ଆସିପାରେ। ସମସ୍ତେ ପ୍ଲାଟଫର୍ମ ଧାରରୁ ନିରାପଦ ଦୂରତା ବଜାୟ ରଖି ସୁରକ୍ଷା କ୍ଷେତ୍ରଗୁଡ଼ିକୁ ସମ୍ମାନ ଦେବା ଉଚିତ, ବିଶେଷକରି ଯେତେବେଳେ ଏକ ଟ୍ରେନ୍ ଆସୁଛି କିମ୍ବା ଅତିକ୍ରମ କରୁଛି। ଚାଲୁଥିବା ଟ୍ରେନ୍ ରୁ ଚଢ଼ିବା କିମ୍ବା ଓହ୍ଲାଇବା ମଧ୍ୟ ଏକ ଦଣ୍ଡନୀୟ ଅପରାଧ। ବିପଦପୂର୍ଣ୍ଣ ରେଳ ଷ୍ଟଣ୍ଟ ମାଧ୍ୟମରେ ସାମାଜିକ ଗଣମାଧ୍ୟମର ଦୃଷ୍ଟି ଆକର୍ଷଣ କରିବାର ବାସ୍ତବ ବିପଦ ଏବଂ କଠୋର ଆଇନଗତ ପରିଣାମ ବିଷୟରେ ଯୁବପିଢ଼ିଙ୍କୁ ପରାମର୍ଶ ଦେବାକୁ ଅଭିଭାବକ ଏବଂ ଶିକ୍ଷକମାନଙ୍କୁ ଅନୁରୋଧ କରାଯାଇଛି।

ପିଲାମାନଙ୍କୁ ଏହି ବିଷୟରେ ସଚେତନ କରିବା ପାଇଁ ଅଭିଭାବକ ଓ ଶିକ୍ଷକମାନଙ୍କୁ ମଧ୍ୟ ରେଳବାଇ ଅନୁରୋଧ କରିଛି — ଯେ ଅନଲାଇନ୍ ଖ୍ୟାତି ପାଇଁ ରେଳ ଷ୍ଟଣ୍ଟ କରି ଜୀବନ ନଷ୍ଟ କରିବା ଉଚିତ ନୁହେଁ।

ଆହୁରି ଦୁର୍ଭାଗ୍ୟଜନକ ଘଟଣା ରୋକିବା ପାଇଁ ପୂର୍ବତଟ ରେଳପଥ ସାର୍ବଜନୀନ ଘୋଷଣା, ଡିଜିଟାଲ୍ ମିଡିଆ ବାର୍ତ୍ତା ଏବଂ ଶାରୀରିକ ପାଟ୍ରୋଲିଂ ମାଧ୍ୟମରେ ଏହାର ସଚେତନତା ଅଭିଯାନକୁ ତୀବ୍ର କରୁଛି। ରେଳବାଇ ସମସ୍ତଙ୍କୁ ସାମାଜିକ ଗଣମାଧ୍ୟମ ଷ୍ଟଣ୍ଟ ଅପେକ୍ଷା ସୁରକ୍ଷାକୁ ପ୍ରାଥମିକତା ଦେବାକୁ ଅନୁରୋଧ କରୁଛି।

ଭୁବନେଶ୍ୱର, ୨୧ ଅକ୍ଟୋବର ୨୦୨୫ 

ଭୁବନେଶ୍ୱର, ୧୮ ଅକ୍ଟୋବର ୨୦୨୫ 

ପୋଲିସ ଏସଆଇ ଚାକିରୀ ବିକ୍ରୀର ମହାଦୁର୍ନୀତିର ବଡ଼ମାଛମାନଙ୍କୁ କାହିଁକି ତଦନ୍ତ ପରିସରଭୁକ୍ତ କରାଯାଉ ନାହିଁ। ପୋଲିସ ଏସଆଇ ପରୀକ୍ଷାର ମହାଦୁର୍ନୀତିକୁ ସଂପୂର୍ଣ୍ଣରୂପେ ଜନମାନସରୁ ଅପସରି ଦେବାପାଇଁ ରାଜ୍ୟ ସରକାର କ୍ରାଇମବ୍ରାଞ୍ଚ ମାଧ୍ୟମରେ ଏକ ବଡ଼ ଷଡଯନ୍ତ୍ର ରଚିଛନ୍ତି ବୋଲି ଆଜି ଏକ ସାମ୍ବାଦିକ ସମ୍ମିଳନୀରେ ପ୍ରଦେଶ କଂଗ୍ରେସର ବରିଷ୍ଠ ମୁଖପାତ୍ର ଶ୍ରୀ ରଜନୀ ମହାନ୍ତି ଅଭିଯୋଗ କରିଛନ୍ତି।

 ପ୍ରକାଶଥାଉକି ୨୦୨୪ ମସିହାରେ ରାଜ୍ୟ ସରକାର ରାଜ୍ୟରେ ୯୩୩ ପୋଲିସ ବିଭାଗର ଏସଆଇ ପଦବୀ ସହିତ ଅନ୍ୟପଦବୀ ପାଇଁ ବିଜ୍ଞାପନ ପ୍ରକାଶ କରିଥିଲେ। ଓଡ଼ିଶା ପୋଲିସ ରିକ୍ୟୁଟମେଂଟ ବୋର୍ଡ ମାଧ୍ୟମରେ ଏହି ପରୀକ୍ଷା କରାଯିବାପାଇଁ ରାଜ୍ୟ ସରକାର ନିଷ୍ପତ୍ତି ନେଲେ। ସବୁଠାର ଆଶ୍ଚର୍ଯ୍ୟର କଥା ଏହି ପରୀକ୍ଷାକୁ କରିବାପାଇଁ ଓଡ଼ିଶା ପୋଲିସ ରିକ୍ୟୁଟମେଂଟ ବୋର୍ଡ ପାଖରେ ଆବଶକୀୟ ଆସବାସ ପତ୍ର ନଥିଲା ବେଳେ କାହିଁକି ଓ କେଉଁ ଉଦ୍ଦେଶ୍ୟରେ ଓଡ଼ିଶା ପୋଲିସ ରିକ୍ୟୁଟମେଂଟ ବୋର୍ଡକୁ ଏ ଦାୟିତ୍ୱ ଦିଆଗଲାବୋଲି ସେ ପ୍ରଶ୍ନ କରିଛନ୍ତି। ସବୁଠାରୁ ଆଶ୍ଚର୍ଯ୍ୟର କଥା ଏହି ପରୀକ୍ଷାକୁ ସୁଚାରୁରୂପେ ପରିଚାଳନ କରିବାପାଇଁ ଓପିଆରବି ଭାରତ ସରକାରଙ୍କର ଆଇଟିଆଇ ସଂସ୍ଥାକୁ ଟେଣ୍ଡର ଦେଇଥିଲା। ସେତେବେଳେ ଟେଣ୍ଡରର କଂଟ୍ରାକ୍ଟ ମୁତାବକ ଆଇଟିଆଇ ସଂସ୍ଥା କୌଣସି ଏକ ସଂସ୍ଥାକୁ ସବକଂଟ୍ରାକ୍ଟ ଦେଇପାରିବାର ନିୟମ ରଖିଥିଲେ। ସେହି ନିଷ୍ପତ୍ତିରେ ଆଇଟିଆଇ ସଂସ୍ଥାକୁ ସିଲିକନ ଟେକ ଲ୍ୟାବକୁ ଏହି ପରୀକ୍ଷାକୁ ସୁଚାରୁରୂପେ ପରିଚାଳନା କରିବାପାଇଁ ସବକଂଟ୍ରାକ୍ଟ ଦେଇଥିଲେ। କିନ୍‌ତୁ ମୂଳ କଂଟ୍ରାକ୍ଟ ନିୟମରେ ସବ କଂଟ୍ରାକ୍ଟ ପାଇଥିବା କମ୍ପାନୀ ବା ଫାର୍ମ ଅନ୍ୟକାହାକୁ ସବ ସବକଂଟ୍ରାକ୍ଟ ଦେଇପାରିବ ନାହିଁ ତେଣୁ ଏଠାରେ ସିଲିକନ ଟେକ ଲାବ କିଭଳି ଭାବରେ ଶଙ୍କର ପୃଷ୍ଟିଙ୍କ ସଂସ୍ଥା ଟେକ ଲାବକୁ ଦେଲା ଏବଂ ଏହି ଘଟଣା ଜାଣିଲାପରେ କାହିଁକି ଓପିଆରବି ପ୍ରତିବାଦ କରିନଥିଲା। ଏହି ସମୁଦାୟ କାରବାରରେ ନିୟମର ଖୋଲା ଉଲ୍ଲଙ୍ଘନ ହୋଇଥିଲେ ମଧ୍ୟ ଏବଂ ପୂର୍ବ ସରକାର ସମୟରେ ପଂଚସପ୍ଟ କମ୍ପାନୀ ଓ ତାଙ୍କ ମାଲିକଙ୍କ ଶଙ୍କର ପୃଷ୍ଟିଙ୍କ ବିରୁଦ୍ଧରେ ଅଭିଯୋଗ ଥିଲା ସତ୍ୱେ କାହିଁକି ଓ କେଉଁ ସ୍ୱାର୍ଥ ଯୋଗୁଁ ଏହି ଟେଣ୍ଡରକୁ କେନସଲ ନକରି ଏହି ଦୁର୍ନୀତି କରିବାପାଇଁ ଶଙ୍କର ପୃଷ୍ଟି ଓ ତାଙ୍କର ସହଯୋଗୀ ମାନଙ୍କୁ ସୁଯୋଗ ଦେଲେ। କ୍ରାଇମବ୍ରାଞ୍ଚର ତଦନ୍ତ କରୁଥିବା ଅଧିକାରୀମାନେ ଏପର୍ଯ୍ୟନ୍ତ କାହିଁକି ଓପିଆରବିର ବରିଷ୍ଠ ପୋଲିସ ଅଧିକାରୀମାନଙ୍କୁ ତଦନ୍ତର ପରିସର ଭୁକ୍ତ କରୁନାହାନ୍ତି। ସବୁକିଛି ଜଳ ଜଳ ଦେଖାଯାଉଥିଲା ବେଳେ କ୍ରାଇମବ୍ରାଞ୍ଚକୁ ଏକଥା ଜଣାନାହିଁକି? ତଦନ୍ତକାରୀ ଅଧିକାରୀମାନେ ନିଜେ ସ୍ୱୀକାର କରି କହିଛନ୍ତି ଯେ ୧୮୬ ଜଣ ଆଶାୟୀ ପରିକ୍ଷାର୍ଥୀ ଟ୍ରେନଯୋଗେ ବାଲେଶ୍ୱରରୁ ସିକାକୁଲମ ଯାଇଥିଲେ। ତେଣୁ ୩୦୦ ଜଣ ଆଶାୟୀ ପରୀକ୍ଷାର୍ଥୀ ରାଜ୍ୟରୁ ଯାଇ ସିକାକୁଲମରେ ପହଞ୍ôଚଲା ପରେ ମଧ୍ୟ କିଭଳି ଭାବେ ରାଜ୍ୟ ପୋଲିସ ବିଭାଗ ପାଖରେ କିମ୍ବା ରାଜ୍ୟ ସରକାରଙ୍କ ପାଖରେ କିଛି ଖୋଜ ଖବର ରହିଲାନାହିଁ କିପରି। ୭୫ କୋଟି ଟଙ୍କାର ଟଙ୍କା ନେଇ ଚାକିରି ଦେବା ଏହି ମହାଦୁର୍ନୀତିକୁ ଜାଣିସୁଣି ରାଜ୍ୟ ସରକାର ଚାପି ଦେବାପାଇଁ ଚେଷ୍ଟା ଚଳାଇଛନ୍ତି। ନୂଆପଡ଼ା ଉପନିର୍ବାଚନ ଆଳରେ କ୍ରାଇମବ୍ରାଞ୍ଚର ତଦନ୍ତକୁ ଦିଗହରା କରି ଏହି ଘଟଣାକୁ ଏକ ଭିନ୍ନ ମୋଡ଼ ଦେବାପାଇଁ ରାଜ୍ୟ ସରକାର ଏବଂ ପୋଲିସ ବିଭାଗର ଯେଉଁ ବରିଷ୍ଠ ଅଧିକାରୀମାନେ ଚକ୍ରାନ୍ତ ଚଳାଇଛନ୍ତି ତାହାକୁ ରାଜ୍ୟ କଂଗ୍ରେସ କେବେହେଲେ କରାଇଦେବ ନାହିଁ। ସବୁଠାରୁ ବଡ଼କଥା ଏହି ପରୀକ୍ଷାପାଇଁ ପ୍ରଶ୍ନପତ୍ର ତ ଓପିଆରବି ପ୍ରସ୍ତୁତ କରିବା କଥା ଓ ପ୍ରଶ୍ନପତ୍ର ଓପିଆରବି ହେପାଜାତରେ ରହିବା କଥା। କିଭଳି ଭାବରେ ପରୀକ୍ଷାର ବହୁ ପୂର୍ବରୁ ଏହି ପ୍ରଶ୍ନପତ୍ର ପଞ୍ଚସପ୍ଟ ପାଖରେ ପହଞ୍ôଚଲା। ଚାକିରି ବିକ୍ରୀ କରୁଥିବା ଦଲାଲ ଶଙ୍କର ପୃଷ୍ଟି ଓ ତାଙ୍କର ସହଯୋଗୀ ମାନଙ୍କ ପାଖରେ କିଏ ପହଞ୍ଚାଇଲା? ଓଡ଼ିଶା ପୋଲିସ ରିକ୍ୟୁଟମେଣ୍ଟ ବୋର୍ଡର ଯେଉଁ ବରିଷ୍ଠ ଅଧିକାରୀମାନେ ପଞ୍ଚସପ୍ଟ ଅଫିସକୁ ଯାଉଥିଲେ ଏବଂ ପରୀକ୍ଷା ପ୍ରସ୍ତୁତିକୁ ତଦାରଖ କରୁଥିଲେ ସେମାନେ କିଭଳି ଜାଣିପାରିଲେ ନାହିଁ ଯେ ପଞ୍ଚସପ୍ଟ ସହିତ ହୋଇଥିବା ଟେଣ୍ଡର ସଂପୂର୍ଣ୍ଣରୂପେ ଅସିଦ୍ଧବୋଲି। ଯଦି ଆଶାୟୀ ୧୧୪ ପ୍ରାର୍ଥୀମାନେ ଚାକିରି ପାଇବା ଲୋଭରେ ଅର୍ଥ ଦେଇଥିବା ଅଭିଯୋଗରେ ଜେଲ ଗଲେ ଏବଂ ତାଙ୍କର ଭବିଷ୍ୟତକୁ ସଂପୂର୍ଣ୍ଣରୂପେ ମାଟିରେ ମିଶାଇ ଦିଆଗଲା ତାହାହେଲେ ରାଜ୍ୟର ଏହି ବରିଷ୍ଠ ପୋଲିସ ଅଧିକାରୀ ମାନଙ୍କୁ କାହିଁକି ସୁରକ୍ଷା ଦିଆଯାଉଛି। ଏମାନଙ୍କୁ କାହିଁକି ଜେଲକୁ ପଠାଯାଉ ନାହିଁ। ସବୁଠାରୁ ଅତ୍ୟନ୍ତ ଏକ ଗୁରୁତ୍ୱପୂର୍ଣ୍ଣ କଥା ହେଲା ଯେ ବିଜେପି ଦଳର ଜନୈକ ବରିଷ୍ଠ ନେତା ଶଙ୍କର ପୃଷ୍ଟିଙ୍କ ଠାରୁ ଏକ ଫର୍ଚୁନରକାର ଗିପ୍ଟ ଆକାରରେ ନେଇଛନ୍ତି ବୋଲି ବହୁ ଆଡ଼େ ଆଲୋଚନା ହେଉଛି। ଏହି ଘଟଣାର ସତ୍ୟତା କ୍ରାଇମବ୍ରାଞ୍ଚ ଅନୁସନ୍ଧାନ କରୁ। ଏହି ୭-୮ ମାସ ଭିତରେ ରାଜ୍ୟ ବିଜେପିର କେଉଁ ବରିଷ୍ଠ ନେତୃବର୍ଗ ନୂଆ ଫର୍ଚୁନର କାର କିଣିଛନ୍ତି। ଏବଂ ସେମାନଙ୍କ କାର କାହା ନାରେ ରେଜିଷ୍ଟ୍ରେସନ ହୋଇଛି ଏହା ଜଣାପଡ଼ିଯିବ। ଏହି କାରକୁ ନଗଦ ଆକାରରେ କିଣାଯାଇଛି ନା ଋଣ ମାଧ୍ୟମରେ କିଣାଯାଇଛି ତାହାବି ଜଣାପଡ଼ିବ। 

ରାଜ୍ୟ ସରକାରଙ୍କର ଓଡ଼ିଶାର ଲକ୍ଷ ଲକ୍ଷ ଶିକ୍ଷିତ ଯୁବକ ଯୁବତୀଙ୍କ ପ୍ରତି ସାମାନ୍ୟ ସମ୍ମାନ ଅଛି ତାହାଲେ ତଦନ୍ତକୁ ବାଟବଣା କରନ୍ତୁ ନାହିଁ। 

ଆଉ ଏକ ଘଟଣାର ଅବତାରଣ କରି ଶ୍ରୀ ମହାନ୍ତି କହିଛନ୍ତି ଯେ ନୂଆପଡ଼ା ଉପନିର୍ବାଚନରେ ମୁଖ୍ୟମନ୍ତ୍ରୀ ନୂଆପଡ଼ା ବାସୀଙ୍କୁ ଆସ୍ୱାସନା ଦେଇ କହିଛନ୍ତି ଯେ ନୂଆପଡ଼ାର ବିକାଶ ତାଙ୍କର ଦାୟିତ୍ୱ। ଠିକ ସମାନ ଭାବରେ ୨୦୨୪ ସାଧାରଣ ନିର୍ବାଚନ ପୂର୍ବରୁ ପ୍ରଧାନମନ୍ତ୍ରୀ ଓଡ଼ିଶାକୁ ଆସି କହିଥିଲେଯେ ତାଙ୍କ ଦଳକୁ ଥରୁଟିଏ ସୁଯୋଗ ଦେଲେ ସେ ଓଡ଼ିଶାକୁ ସାରା ଭାରତରେ ଏକ ନମ୍ବର ରାଜ୍ୟ କରିବେ। କିନ୍ତୁ ୧୬ ମାସ ପରେ ଓଡ଼ିଶା ଆଜି ମହିଳା ଅତ୍ୟାଚାର, ଦୁଷ୍କର୍ମ, ଗଣଦୁଷ୍କର୍ମ ଓ ହତ୍ୟାରେ ଏକନମ୍ବର ମାନ୍ୟତା ପାଇଛି। ଏହା କଣ ଆମର ବିକାଶ କି? ଏହି ୧୬ ମାସ ଭିତରେ ରାଜ୍ୟରେ ଆଦିବାସୀ ଓ ଅନୁସୂଚିତ ଜାତିମାନଙ୍କ ଉପରେ ଆକ୍ରମଣ ଓ ହିଂସା ବହୁ ପରିମାଣରେ ବୃଦ୍ଧି ପାଇଛି। ଏହି ସମୟ ଭିତରେ ୩୭୨୭ ଟି ଆଦିବାସୀ ଓ ଅନୁସୂଚିତ ଜାତି ମାନଙ୍କ ଉପରେ ଆକ୍ରମଣ ହୋଇଥିବା ଘଟଣା ବିଭିନ୍ନ ଥାନାରେ ପଞ୍ଜିକୃତ ହୋଇଛି। ମୁଖ୍ୟମନ୍ତ୍ରୀ ଆଦିବାସୀ ବର୍ଗରୁ କିନ୍ତୁ ରାଜ୍ୟରେ ଆଦିବାସୀ ଓ ଅନୁସୂଚିତ ଜାତି ବର୍ଗର ଲୋକମାନେ ଆଜି ନିରାପଦ ନୁହଁନ୍ତି। ଏହି ୯ ମାସ ଭିତରେ ୨୪୨୮ ଟି ମାମଲା ଏହି ବର୍ଗଙ୍କ ଉପରେ ହୋଇସାରିଲାଣି। ରାଜ୍ୟ ପ୍ରଗତୀ କରିବା ପରିବର୍ତ୍ତେ ବିନାଶ ଆଡକୁ ଦ୍ରୁତ ଗତିରେ ଯାଉଛି। ଏହି ସାମ୍ବାଦିକ ସମ୍ମିଳନୀରେ ରାଜ୍ୟ କଂଗ୍ରେସର ଅନ୍ୟତମ ମୁଖପାତ୍ର ପୂର୍ବତନ ମନ୍ତ୍ରୀ ଦେବାଶିଷ ନାୟକ ସାମ୍ବାଦିକ ମାନଙ୍କୁ ସମ୍ବୋର୍ଦ୍ଧିତ କରି କହିଥିଲେ ଯେ ନବ ଦାସଙ୍କ ହତ୍ୟା ଘଟଣା ଠୁ ଆରମ୍ଭ କରି ମମିତା ମେହେର ଘଟଣା ପର୍ଯ୍ୟନ୍ତ ଏବେକାର ସରକାର ନ୍ୟାୟ ପାଇଁ ଚିତ୍କାର କରୁଥିଲେ କିନ୍ତୁ ସରକାର ଆସିଲାପରେ ଆଜି ପର୍ଯ୍ୟନ୍ତ ଦୋଷୀମାନଙ୍କୁ ଦଣ୍ଡ ଦେବା ପରିବର୍ତ୍ତେ ରାଜ୍ୟର ଆଇନଶୃଙ୍ଖଳା ପରିସ୍ଥିତି ଅତ୍ୟନ୍ତ ନିମ୍ନ ସ୍ତରକୁ ଚାଲିଯାଇଛି। ଯୁବକ ମାନଙ୍କର ଭବିଷ୍ୟତକୁ ଏ ସରକାର ଦଲାଲ ମାନଙ୍କ ପାଖରେ ବନ୍ଧା ପକାଇ ଦେଇଛନ୍ତି। ଏ ସରକାର ଏକ ଜନବିରୋଧି ସରକାର। 

ଭୁବନେଶ୍ୱର, ୧୬ ଅକ୍ଟୋବର ୨୦୨୫

ଭୁବନେଶ୍ୱର, ୧୫ ଅକ୍ଟୋବର ୨୦୨୫

• ଅକ୍ଟୋବର ୧୮ ରୁ  ନଭେମ୍ବର ୧୭  ପର୍ଯ୍ୟନ୍ତ ମାସେ ବ୍ୟାପୀ ବ୍ୟାପକ କାର୍ଯ୍ୟକ୍ରମ ନେଇ ଆଲୋଚନା 
• ସାଇବର ସୁରକ୍ଷା ସଂପର୍କରେ ରାଜ୍ୟର ପ୍ରତିକ୍ରିୟାକୁ ଅଧିକ ସୁଦୃଢ କରାଯିବା ଉପରେ ମୁଖ୍ୟ ଶାସନ ସଚିବଙ୍କ  ଗୁରୁତ୍ୱ

ଆସନ୍ତା  ଅକ୍ଟୋବର ୧୮ ରୁ ୧୭ ନଭେମ୍ବର ୨୦୨୫ ପର୍ଯ୍ୟନ୍ତ ଉଭୟ ଅନ୍‌ଲାଇନ ଓ ଅଫଲାଇନ୍‌ ମୋଡରେ ସାଇବର ସୁରକ୍ଷା ସଚେତନତା ସଂପର୍କରେ ରାଜ୍ୟବ୍ୟାପୀ ବ୍ୟାପକ କାର୍ଯ୍ୟକ୍ରମ ଅନୁଷ୍ଠିତ ହେବା ସଂପର୍କରେ  ଆଜି ସଂଧ୍ୟାରେ ଏକ ପ୍ରସ୍ତୁତି ବୈଠକ ଲୋକସେବା  ଭବନସ୍ଥିତ  ସମ୍ମିଳନୀ କକ୍ଷରେ  ମୁଖ୍ୟ ଶାସନ ସଚିବ                       ଶ୍ରୀ ମନୋଜ ଆହୁଜାଙ୍କ ଅଧ୍ୟକ୍ଷତାରେ ଅନୁଷ୍ଠିତ ହୋଇଯାଇଛି । ଏହି ସଚେତନତା ଅଭିଯାନର ଶୁଭାରମ୍ଭ କାର୍ଯ୍ୟକ୍ରମରେ ମାନ୍ୟବର ମୁଖ୍ୟମନ୍ତ୍ରୀ ଯୋଗ ଦେବାର କାର୍ଯ୍ୟକ୍ରମ ରହିଛି । ଆସନ୍ତା  ଅକ୍ଟୋବର ୧୮ରୁ  କଳିଙ୍ଗ ଷ୍ଟାଡିଅମ ଠାରୁ ଏହି କାର୍ଯ୍ୟକ୍ରମରେ ଯୋଗ ଦେଇ ମୁଖ୍ୟମନ୍ତ୍ରୀ ସାଇବର ରଥର  ଶୁଭାରମ୍ଭ କରିବାର କାର୍ଯ୍ୟକ୍ରମ          ରହିଛି ।  ସାଇବର ସୁରକ୍ଷା ସଂପର୍କିତ ଭିଡିଓ, ପ୍ରଚାର ପତ୍ର, ଥିମ୍ ସଂଗୀତ ସହିତ ଏହି ସଚେତନତାକୁ ବ୍ୟାପକ କରାଯିବ ।  ସମଭାବରେ ଜିଲ୍ଲାସ୍ତରରେ ମଧ୍ୟ କାର୍ଯ୍ୟକ୍ରମ  ହେବ ।  

ସାଇବର ଅପରାଧରୁ ଶିଶୁମାନଙ୍କୁ ସୁରକ୍ଷିତ ରଖିବା, ନିବେଶ କ୍ଷେତ୍ରରେ ଜାଲିଆତିରୁ ସୁରକ୍ଷିତ ରହିବା,  ଅପରାଧି କେହି  ବ୍ୟକ୍ତିଙ୍କର ନିଜସ୍ୱ କିମ୍ବା ଗୋପନ ଫଟୋ, ଭିଡିଓ କିମ୍ବା ଚାଟ୍‌  ଦେଖାଇ କିମ୍ବା ଧମକ ଦେଇ ଟଙ୍କା ବା ଅନ୍ୟ କିଛି ସୁବିଧା ଚାହିଁବା ( ସେକ୍ସଟରସନ), ବେଆଇନ ବ୍ୟାଙ୍କ୍‌  ଆକାଉଣ୍ଟ ଏବଂ ସିମ ବିକ୍ରି  କରିବା, ହୋଟେଲ ବୁକିଂରେ  ସ୍କାମ, ଡିଜିଟାଲ ଆରେଷ୍ଟ, ସୁରକ୍ଷିତ  ସାମାଜିକ ଗଣମାଧ୍ୟମର ବ୍ୟବହାର  ସଂପର୍କର ବ୍ୟାପକ ସଚେତନତା ସୃଷ୍ଟି କରାଯିବ ।  ଅଭିଯାନର ଟ୍ୟାଗ୍‌ ଲାଇନ୍‌ ରଖାଯାଇଛି- ଷ୍ଟପ, ଭେରିଫାଏ, ବି ସିକ୍ୟୁୟର ( ରୁହ, ଯାଞ୍ଚ କର, ସୁରକ୍ଷିତ ରୁହ )   । ଅଭିଯାନରେ  ମାସ୍କଟ  “ସାଇରା”  ବ୍ୟବହୃତ ହେବ ।  

ଅଭିଯାନରେ ବିଭିନ୍ନ ବିଭାଗ ସାମିଲ ହେବେ  । ବିଦ୍ୟାଳୟ ଓ ଗଣଶିକ୍ଷା ବିଭାଗ  ଏବଂ ଉଚ୍ଚଶିକ୍ଷା  ବିଭାଗ ପକ୍ଷରୁ ଛାତ୍ରଛାତ୍ରୀମାନଙ୍କୁ ସ୍କୁଲ ଓ  ହଷ୍ଟେଲରେ ସଚେତନତା ସହ  ବକୃତା ପ୍ରତିଯୋଗିତା  ଅନୁ​‌ଷ୍ଠିତ ହେବ ।  ସୂଚନା ଓ ଲୋକସଂପର୍କ ବିଭାଗ ତରଫରୁ  ରାଜ୍ୟ ଓ ଜିଲ୍ଲାସ୍ତରରେ ପ୍ରଚାର ପ୍ରସାର କରାଯିବା ସହିତ ପଞ୍ଚାୟତିରାଜ ଓ ପାନୀୟ ଜଳ ବିଭାଗ ପକ୍ଷରୁ ଜନପ୍ରତିନିଧିମାନଙ୍କ ସହଯୋଗରେ ସଚେତନତା କାର୍ଯ୍ୟକ୍ରମ  ହେବ ।  ଆଶାକର୍ମୀମାନେ ସ୍ୱୟଂ ସହାୟକ ଗୋଷ୍ଠୀ ସଦସ୍ୟମାନେ  ଏହି ଅଭିଯାନରେ ସାମିଲ ହେବେ ।  ଓଡ଼ିଆ ଭାଷା ସାହିତ୍ୟ ଓ ସଂସ୍କୃତି ବିଭାଗ ପକ୍ଷରୁ ପଥପ୍ରାନ୍ତ ନାଟକ ଓ  ଲୋକନୃତ୍ୟ ମାଧ୍ୟମରେ  ସଚେତନ କରାଯିବ ।  ଇଲେକ୍ଟ୍ରୋନିକ ଓ ଆଇଟି ବିଭାଗର ସହଯୋଗ ନିଆଯିବ । ଅଭିଯାନରେ କୁଇଜ୍ ପ୍ରତିଯୋଗିତା, ଗଣ ଦୌଡ, ପଦଯାତ୍ରା, ଇନ୍ଫୋଗ୍ରାଫିକ୍ସ,  ସଚେତନତା ସମ୍ମିଳନୀ, ଟିଭି, ରେଡିଓ, ସିନେମା ହଲ  ସମେତ  ବିଭିନ୍ନ ଗଣମାଧ୍ୟମରେ ସଚେତନତା ବ୍ୟାପକ କରାଯିବ ।   

ଛାତ୍ରଛାତ୍ରୀ, ପିତାମାତା, ଶିକ୍ଷକ ଶିକ୍ଷୟିତ୍ରୀ, ଯୁବବର୍ଗ. ନିଯୁକ୍ତି ଆଶାୟୀ, ମହିଳା ଓ ବାଳିକା, ଗ୍ରାମୀଣ ଓ ଅର୍ଦ୍ଧ ସହରାଞ୍ଚଳ ନାଗରିକ, ବରି​‌ଷ୍ଠ  ନାଗରିକ, ଏସ୍.ଏଚ୍‌.ଜି ଓ ବିଭିନ୍ନ ଗୋଷ୍ଠୀ, ବ୍ୟବସାୟୀ ବୃତ୍ତିଧାରୀଙ୍କ ମଧ୍ୟରେ ସାଇବର ସୁରକ୍ଷା ସଂପର୍କିତ ସଚେତନତା ବୃଦ୍ଧି କରିବା ପାଇଁ ଏହି ଅଭିଯାନ ବ୍ୟାପକ ହେବ ।  ଅଭିଯାନରେ ସାଇବର ସୁରକ୍ଷା ରଥ ରାଜ୍ୟ ସାରା  ବୁଲି ପ୍ରଚାର  ଅଭିଯାନ ଓ ସଚେତନ  କରିବ ।  ସାଇବର-ଅପରାଧ ସଂପର୍କିତ ହେଲ୍ପ ଲାଇନ୍ - ନମ୍ବର ୭୦୩୦ କାର୍ଯ୍ୟକାରୀ ହେଉଛି ଏବଂ ନ୍ୟାସନାଲ ସାଇବର କ୍ରାଇମ ରିପୋଟିଂ ପୋର୍ଟାଲ  ରହିଛି ।   ଏହାର ସୁବିଧା ନେବାକୁ ଜନସାଧାରଣଙ୍କୁ ବ୍ୟାପକ ସଚେତନ କରାଯିବା ନେଇ ବେଠକରେ ଆଲୋଚନା କରାଯାଇଥିଲା । 

ବୈଠକରେ ଯୋଗ ଦେଇ ମୁଖ୍ୟ ଶାସନ ସଚିବ ଏହି ସଚେତନତା   ଅଭିଯାନ ଯେପରି ଜନସାଧାରଣଙ୍କ  ପାଇଁ ଅଧିକ ପ୍ରଭାବୀ ହେବ ସେ ସଂପର୍କରେ ଗୁରୁତ୍ୱ ନେଇଛନ୍ତି ।  ସଂପୃକ୍ତ ସମସ୍ତ ବିଭାଗୀୟ  ସଚିବମାନଙ୍କୁ ନିଜ ନିଜ ସଂସ୍ଥାଗତ ବ୍ୟବସ୍ଥାକୁ ସୁଦୃଢ଼ କରି ସାଇବର ଅପରାଧରୁ  ସମସ୍ତଙ୍କୁ  ସୁରକ୍ଷିତ ରଖିବାକୁ ସଚେତନତ ହେବା  ପାଇଁ ସେ ଆବଶ୍ୟକ ପଦକ୍ଷେପ ନେବାକୁ ନିର୍ଦ୍ଦେଶ ଏବଂ ପରାମର୍ଶ ଦେଇଛନ୍ତି । ଏହି ଅଭିଯାନ କେବଳ ମାସେ ବ୍ୟାପୀ ନୁହେଁ, ବର୍ଷସାରା ବିଭିନ୍ନ ସମୟରେ ବିଭିନ୍ନ ମାଧ୍ୟମରେ ସଚେତନତା କାର୍ଯ୍ୟକ୍ରମ ଜାରି ରଖିବାକୁ ସେ ପରାମର୍ଶ ଦେଇଛନ୍ତି । ବିଦ୍ୟାଳୟ ଓ ମହାବିଦ୍ୟାଳୟରେ ଛାତ୍ରଛାତ୍ରୀମାନଙ୍କ ପାଇଁ ସ୍ୱତନ୍ତ୍ର ପାଠ୍ୟକ୍ରମ  ପ୍ରସ୍ତୁତି  କରି ସଚେତନତା ସୃଷ୍ଟି କରିବା,  ଅନ୍‌ଲାଇନ୍ ପାଠ୍ୟକ୍ରମ ସହିତ ପ୍ରମାଣ ପତ୍ର ବ୍ୟବସ୍ଥା ଆଦି କରିବାକୁ ସେ ପରାମର୍ଶ ଦେଇଛନ୍ତି । ସାଇବର ସୁରକ୍ଷା ସଂପର୍କିତ ପ୍ରତିକ୍ରିୟାକୁ ଅଧିକ ସୁଦୃଢ କରାଯିବା ପାଇଁ ରାଜ୍ୟ ସରକାରଙ୍କ ତରଫରୁ ବ୍ୟାପକ ବ୍ୟବସ୍ଥା କରାଯିବା  ଉପରେ ମୁଖ୍ୟ ଶାସନ  ସଚିବ ଗୁରୁତ୍ୱ ଦେଇଥିଲେ ।  

ରାଜ୍ୟ ସ୍ୱରାଷ୍ଟ୍ର ବିଭାଗ ତରଫରୁ ଅନୁଷ୍ଠିତ ଏହି ବୈଠକରେ ଅନ୍ୟମାନଙ୍କ ମଧ୍ୟରେ ରାଜ୍ୟ ପୁଲିସ ମହାନିର୍ଦ୍ଦେଶକ ୱାଇ.ବି.ଖୁରାନିଆ, ଡିଜିପି,ସିଆଇଡି, କ୍ରାଇମ୍ ବ୍ରାଞ୍ଚ ଶ୍ରୀ ବିନୟତୋଷ ମିଶ୍ର, ଆଇ.ଜି ସିଆଇଡି, ସିବି. ଶ୍ରୀ ସାର୍ଥକ  ଷଡଙ୍ଗୀ, ଏସପି , ସିଆଇଡି, ସିବି ଶ୍ରୀ  ସ୍ମିତ୍ ପାରାମାର ପ୍ରମୁଖ ଯୋଗଦେଇ ଆଲୋଚନା କରିଥିଲେ । ତତ୍ ସହିତ ରାଜ୍ୟ ଉଚ୍ଚଶିକ୍ଷା, ବିଦ୍ୟାଳୟ ଓ ଗଣଶିକ୍ଷା, ସ୍ୱାସ୍ଥ୍ୟ ଓ ପରିବାର କଲ୍ୟାଣ, ଓଡ଼ିଆ ଭାଷା , ସାହିତ୍ୟ ଓ ସଂସ୍କୃତି ବିଭାଗ, ସମାଜ କଲ୍ୟାଣ, ମିଶନ ଶକ୍ତି, ସୂଚନା ଓ ଲୋକସଂପର୍କ ବିଭାଗର  ଆଦିର ସଚିବ , ନିର୍ଦ୍ଦେଶକ ତଥା ଅନ୍ୟ ବରିଷ୍ଠ  ପଦାଧିକାରୀମାନେ ଯୋଗ ଦେଇ ଆଲୋଚନାରେ  ଅଂଶ ଗ୍ରହଣ କରିଥିଲେ ।