ଦିଲ୍ଲୀରେ ଆନ୍ଦୋଳନରତ ଚାଷୀଙ୍କ ଉପରେ କେନ୍ଦ୍ର ସରକାରଙ୍କ ନିର୍ଯ୍ୟାତନା ପ୍ରତିବାଦରେ ଗଣ ଉପବାସ

ଭୁବନେଶ୍ୱର, କେନ୍ଦ୍ର ସରକାର ଲାଗୁ କରିଥିବା ତିନୋଟି କଳା କୃଷି ଆଇନକୁ ରଦ୍ଦ କରିବା ଦାବିରେ ଗତ ନଭେମ୍ବର ୨୬ ତାରିଖରୁ ଦିଲ୍ଲୀ ସୀମାରେ ଗଷୀ ଆନ୍ଦୋଳନ ଗଲିଛି । ସଂଯୁକ୍ତ କିଷାନ ମୋର୍ଟାର ଆହ୍ବାନକ୍ରମେ ଗତ ୨୬ ତାରିଖ ଗଣତନ୍ତ୍ର ଦିବସରେ ଲକ୍ଷାଧିକ ଟ୍ରାକ୍ଟର ରାଲିରେ ଯାଇ ଦିଲ୍ଲୀ ପରିକ୍ରମା କରିଥିବା ବେଳେ କିଛି ବିଶୃଙ୍ଖଳା ଦେଖାଦେଇଥିଲା । ଚାଷୀ ସଂଗଠନ ନାମରେ କିଛି ଅରାଜକତତ୍ତ୍ବ ଲାଲକିଲ୍ଲା ଭିତରକୁ ପଶି ସୁରକ୍ଷାକର୍ମୀମାନଙ୍କ ଆକ୍ରମଣ କରିବା ଘଟଣା ଲୋକଲୋଚନକୁ ଆସିଛି । ଏହି ତଥ୍ୟ ଆଧାରରେ ବିଜେପି ଶାସିତ କେନ୍ଦ୍ର ସରକାର ତଥା ଉତ୍ତରପ୍ରଦେଶ ରାଜ୍ୟ ସରକାର ଚାଷୀ ଆନ୍ଦୋଳନକୁ ଭଣ୍ଡୁର କରିବା ପାଇଁ ଚାଷୀମାନଙ୍କ ଉପରେ ଦମନଲୀଳା ଚଳାଇଛନ୍ତି । ଏପରିକି ମଣିଷର ସର୍ବନିମ୍ନ ଆବଶ୍ୟକତା ଜଳ ଓ ପରିମଳ ବ୍ୟବସ୍ଥାକୁ ମଧ୍ୟ ହଟାଇ ଦେଇଛନ୍ତି । 

ଏହି ଆନ୍ଦୋଳନରେ ସକ୍ରିୟ ଅଂଶଗ୍ରହଣ କରିଥିବା ନବନିର୍ମାଣ କୃଷକ ସଂଗଠନର ପାଞ୍ଚଶହରୁ ଉର୍ଦ୍ଧ କର୍ମୀ ଗତ ୧୫ ତାରିଖରୁ ଦିଲ୍ଲୀ ଯାତ୍ରା କରି ଆଜି ଫେରିଆସି ଭୁବନେଶ୍ୱରରେ ପହଞ୍ଚିଛନ୍ତି । ଗତ ୨୬ ତାରିଖରୁ ଘଟିଥିବା ଘଟଣା କେନ୍ଦ୍ର ସରକାରଙ୍କର ଏକ ଷଡଯନ୍ତ୍ରମୂଳକ ସଂରଚନା ଯାହାକି ସରକାର ତାଙ୍କର ଅରାଜକତା ସଂଗଠନ ଓ ବ୍ୟକ୍ତିମାନଙ୍କୁ ବ୍ୟବହାର କରି କୃଷକମାନଙ୍କୁ ଦୋଷୀ ବନାଇ ଆନ୍ଦୋଳନ ଭାଙ୍ଗିଦେବାର ହୀନ ଷଡ଼ଯନ୍ତ୍ର କରୁଛନ୍ତି । ଏହାର ପ୍ରତିବାଦରେ ଆଜି ସ୍ଥାନୀୟ ଲୋୟର ପିଏମଜି ଠାରେ ସଂଗଠନ ପକ୍ଷରୁ ଗଣଉପବାସ କରାଯାଇଥିଲା । 

ପ୍ରତିବାଦ ସଭା ମଧ୍ୟରେ ରାଷ୍ଟ୍ରୀୟ ସଂଯୋଜକ ଅକ୍ଷୟ କୁମାରଙ୍କ ନେତୃତ୍ବରେ ଦିଲ୍ଲୀ ଯାଇଥିବା ଓଡ଼ିଶାର ଚାଷୀମାନେ ସଭାସ୍ଥଳରେ ପହଞ୍ଚିଥିଲେ । ଚାଷୀ ଆନ୍ଦୋଳନକୁ ପୋଲିସ ବଳ ଓ ଗୁଣ୍ଡାଦଳ ଲଗାଇ ଭଣ୍ଡୁର କରିବା ପ୍ରୟାସକୁ ଘୋର ନିନ୍ଦା କରିବା ସହ ଆଗକୁ ଅହିଂସାତ୍ମକ ପନ୍ଥାରେ ଆନ୍ଦୋଳନ ଜାରି ରହିବ ବୋଲି ସଂଗଠନର ରାଷ୍ଟ୍ରୀୟ ସଂଯୋଜକ ଅକ୍ଷୟ କୁମାର ପ୍ରକାଶ କରିଛନ୍ତି । କେନ୍ଦ୍ର ସରକାରଙ୍କ କଳା ଆଇନ ଓ କଳା କାରନାମା ଉଭୟ ବିରୁଦ୍ଧରେ ଓଡ଼ିଶାର ଚାଷୀ ଏକଜୁଟ ହେବା ପାଇଁ ସମୟ ଆସିଯାଇଛି ବୋଲି ରାଜ୍ୟ ସଂଯୋଜକ ଶେଷଦେବ ନନ୍ଦ ଚାଷୀମାନଙ୍କୁ ଆହ୍ବାନ ଦେଇଥିଲେ । 

ଆଜିର ପ୍ରତିବାଦ କାର୍ଯ୍ୟକ୍ରମରେ ଅନ୍ୟମାନଙ୍କ ମଧ୍ୟରେ ରାଜ୍ୟ ସହସଂଯୋଜକ ନିମାଇଁ ରାୟ, ରାଜ୍ୟ କମିଟି ସଦସ୍ୟ ଶୁଭେନ୍ଦୁ ମଲ୍ଲିକ, ସଂଗ୍ରାମ କିଶୋର, ଜଗତସିଂହପୁର ଜିଲ୍ଲା ସଂଯୋଜକ ଦୁର୍ଗା ପ୍ରସାଦ ସ୍ୱାଇଁ, କେନ୍ଦ୍ରାପଡ଼ା ସଂଯୋଜକ ଅକୁର ପଲାଇ, କୃପାସିନ୍ଧୁ ଦାସ, ଦାଶରଥୀ ସାହୁ, ଦେବାଶିଷ ଦାସ, ନିତ୍ୟାନନ୍ଦ ପଣ୍ଡା, ଅମିୟ ବେଉରିଆ, ଘଣ୍ଡେଶ୍ଵର ରାଉତ, ବସନ୍ତ ଦାସ, ଲକ୍ଷ୍ମୀଧର ସାହୁ ପ୍ରମୁଖ ଉପସ୍ଥିତ ରହି ଅପରାହ୍ନ ୩ଘଟିକା ଉପବାସ ରହିଥିଲେ ।