ପୂଜକଙ୍କୁ ସ୍ବପ୍ନାଦେଶ ପରେ ମନ୍ଦିର ପରିସରରେ ଖୋଳାଗଲା ମାଟି । ଉଦ୍ଧାର ହେଲା ଗଙ୍ଗାଦେବୀଙ୍କ ମୂର୍ତ୍ତି

ଚିତ୍ର‌କୋଣ୍ଡା, ମାଲକାନଗିରି ଜିଲ୍ଲା ଚିତ୍ରକୋଣ୍ଡା ସଦରମହକୁମା ଠାରେ ଏକ ଏଶ୍ବରୀକ ତଥା ଅଦ୍ଭୁତ ଅଲୌକିକ ଘଟଣା ସ୍ଥାନୀୟ ଅଞ୍ଚଳରେ ଚାଞ୍ଚଲ୍ୟ ସୃଷ୍ଟି କରିଛି। ଚିତ୍ରକୋଣ୍ଡାର ପଞ୍ଜାବୀ ଛକସ୍ଥିତ ତିରୁପତି ବାଲାଜୀ ଓ ଜଗନ୍ନାଥ ମନ୍ଦିର ପୂଜକ ରବି ଶାସ୍ତ୍ରୀଙ୍କ ସ୍ବପ୍ନାଦେଶ କ୍ରମ‌େ ମନ୍ଦିର ପରିସରକୁ ଖନନ କରିବା ସମୟରେ ଗଙ୍ଗାମାତା ଏକ ମୂର୍ତ୍ତି ବାହାରିଥିବା ଲୋକଙ୍କୁ ଚକିତ କରିଦେଇଛି। ମନ୍ଦିର ପୂଜକ ରବିଶାସ୍ତ୍ରୀଙ୍କ କହିବାନୁଯାୟୀ, ଶୁକ୍ରବାର ରାତିରେ ତାଙ୍କୁ ସ୍ବପ୍ନାଦେଶ ହୋଇଥିଲା। ତିରୁପତି ବାଲାଜି ଓ ଜଗନ୍ନାଥ ମନ୍ଦିର ପ୍ରାଙ୍ଗଣରେ ଭଗବାନ ପୋତି ହୋଇ ରହିଥିବାରୁ ସେଠାରୁ ତାଙ୍କୁ ବାହାର କରିବାକୁ ଆଦେଶ ହୋଇଥିଲା। ପୂଜକ କହିବାନୁଯାୟୀ ମନ୍ଦିର ପରିସରରେ ଥିବା ନିର୍ଦ୍ଧିଷ୍ଟ ସ୍ଥାନରେ ପୂଜାର୍ଚ୍ଚନା କରାଯାଇଥିଲା। 

ଧାର୍ମିକ ରିତିନୀତି ଅନୁସାରେ ପୂଜାର୍ଚ୍ଚନା କରିବା ପରେ ସେଠାରେ ଖନନ କାର୍ଯ୍ୟ ଆରମ୍ଭ ହୋଇଥିଲା। ସେଠାରେ ୭ ଫୁଟ ଖୋଳିବା ପରେ ରାତି ୧୧ଟା ବେଳକୁ ମୂର୍ତ୍ତିର କିଛି ଅଂଶ ଦେଖିବାକୁ ମିଳିଥିଲା। ଏହାପରେ ଆହୁରି ଖୋଳିବା ପାରେ ପାଖାପାଖି ୧୦ ଇଞ୍ଚ ଉଚ୍ଚତାର ସର୍ପ ରହିଥିବା ଗଙ୍ଗାମାତା ମୂର୍ତ୍ତି ବାହାରିଥିଲା। ଠାକୁରଙ୍କ ନିର୍ଦ୍ଦେଶକ୍ରମେ ଏହି ମୂର୍ତ୍ତି ବାହାରିଥିବାରୁ ତାହାକୁ ପରିଷ୍କାର କରିବା ପରେ ପୂଜାର୍ଚ୍ଚନା କରାଯାଇଛି। ସ୍ବପ୍ନାଦେଶ ଘଟଣାକୁ ନେଇ ଭିଡ ଜମିଥିବା ବେଳେ ଠାକୁରଙ୍କ ମୂର୍ତ୍ତି ବାହାରିବା ପରେ ଗ୍ରାମବାସୀଙ୍କ ଆହୁରି ଭିଡ ଦେଖିବାକୁ ମିଳିଛି। ସେଠାରେ ଲୋ‌କେ ଖୋଳ କୀର୍ତ୍ତନ ସହ ଶଙ୍ଖ ଧ୍ବନୀ ଓ ହୁଳହୁଳିରେ ଅଞ୍ଚଳ ପ୍ରକମ୍ପିତ ହୋଇ ଉଠିଛି।