ଯଦି ଅଜିତ୍ ପାଓ୍ଵାର ଏନସିପି ନେତାଙ୍କ ସହ ବିଜେପିରେ ଯୋଗ ଦିଅନ୍ତି ଆମେ ମେଣ୍ଟରୁ ଓହରିବୁ- ସିନ୍ଦେ ଗୋଷ୍ଠୀ

ମୁମ୍ବାଇ ,ଏନସିପି ନେତା ଅଜିତ ପାୱାରଙ୍କୁ ନେଇ ବିଜେପି ଓ ଶିବସେନା (ସିନ୍ଦେ ଗୋଷ୍ଠୀ) ମଧ୍ୟରେ ମତଭେଦ ଦେଖାଦେଇଛି । ଦଳର ମୁଖପାତ୍ର ସଞ୍ଜୟ ଶିରସାତ୍ କହିଛନ୍ତି ଯେ, ଜାତୀୟତାବାଦୀ କଂଗ୍ରେସ ଦଳ(ଏନସିପି) ନେତା ଅଜିତ୍ ପାଓ୍ଵାର ଯଦି ନିଜ ପାର୍ଟିର ସଦସ୍ୟ ସହ ଭାରତୀୟ ଜନତା ପାର୍ଟି(ବିଜେପି)ରେ ଯୋଗ ଦିଅନ୍ତି ତେବେ ଏକନାଥ ସିନ୍ଦେଙ୍କ ନେତୃତ୍ଵାଧୀନ ଶିବସେନା ଦଳ ମହାରାଷ୍ଟ୍ର ସରକାରରୁ ଓହରି ଯିବ। ବୁଧବାର ଏମିତି ଚରମ ଚେତାବନୀ ଦେଇଛନ୍ତି ଶିବସେନାର ମୁଖପାତ୍ର ସଞ୍ଜୟ ଶିରସଠ।

ଶିରସାତ୍ ମଙ୍ଗଳବାର ମୁମ୍ବାଇରେ ସାମ୍ବାଦିକମାନଙ୍କୁ କହିଛନ୍ତି ଯେ ସେ ଅନୁଭବ କରନ୍ତି ଯେ ଏନସିପି ସିଧାସଳଖ ବିଜେପି ସହ ହାତ ମିଳାଇବ ନାହିଁ। ଏଣୁ ଆମ ରଣନୀତି ସ୍ପଷ୍ଟ ରହିଛି। ଏନସିପି ହେଉଛି ସେହି ଦଳ ଯିଏ ଠକେଇ କରିଥାଏ । ଆମେ ଏନସିପି ସହ ମିଶି ଶାସନ କରିବୁ ନାହିଁ । ଯଦି ବିଜେପି ଏନସିପି ସହ ଯିବ ତେବେ ମହାରାଷ୍ଟ୍ର ଲୋକେ ଏହାକୁ ପସନ୍ଦ କରିବେ ନାହିଁ । ଆମେ ଉଦ୍ଧବ ଠାକରେଙ୍କ ନେତୃତ୍ୱାଧୀନ ଶିବସେନାରୁ ଓହରିଯିବାକୁ ନିଷ୍ପତ୍ତି ନେଇଥିଲୁ କାରଣ ଲୋକମାନେ ଆମକୁ କଂଗ୍ରେସ ଏବଂ ଏନସିପି ସହିତ ରହିବାକୁ ପସନ୍ଦ କରୁନଥିଲେ।

ଅଜିତ୍ ପାଓ୍ଵାରଙ୍କ ଏନସିପିରେ ପୂର୍ବପରି ପତିଆରା ନାହିଁ। ଯଦି ସେ ଏନସିପି ଛାଡି ଦିଅନ୍ତି, ତେବେ ଆମେ ତାଙ୍କୁ ସ୍ଵାଗତ କରିବୁ। କିନ୍ତୁ ଏନସିପିର ନେତାଙ୍କ ସହ ଯୋଗ ଦେଲେ ଆମେ ମହାରାଷ୍ଟ୍ର ସରକାରରୁ ଓହରିଯିବୁ। ପୁଅ ପାର୍ଥ ପାଓ୍ଵାରଙ୍କ ନିର୍ବାଚନରେ ପରାସ୍ତ ନେଇ ଅଜିତ୍ ପାଓ୍ଵାର ଦୁଃଖିତ। ଶିବସେନାର ୧୬ ବିଧାୟକ ଅଯୋଗ୍ୟ ସଂପର୍କିତ ମାମଲା ସୁପ୍ରିମକୋର୍ଟରେ ବିଚାରଧୀନ ଥିବାରୁ ସେ ଦୁଃଖିତ ନାହାନ୍ତି ବୋଲି ଶିରସଠ କହିଛନ୍ତି।

ସେ କହିଛନ୍ତି, ଆମେ କଂଗ୍ରେସ ଓ ଏନସିପି ଛାଡିଥିଲୁ କାରଣ ଆମେ ସେମାନଙ୍କ ସହିତ ରହିବାକୁ ଚାହୁଁନଥିଲୁ । ଏନସିପିରେ ଅଜିତ ପାୱାରଙ୍କର ସମ୍ପୂର୍ଣ୍ଣ ସ୍ୱାଧୀନତା ନାହିଁ। ତେଣୁ ଯଦି ସେ  ଏକୁଟିଆ ଏନସିପି ଛାଡିବେ ତେବେ ଆମେ ତାଙ୍କୁ ସ୍ୱାଗତ କରିବୁ । ଯଦି ସେମାନେ ଏନସିପି ନେତାଙ୍କ ଏକ ଗୋଷ୍ଠୀ ସହ ଆମ ପଟକୁ ଆସନ୍ତି, ତେବେ ଆମେ ମେଣ୍ଟ ସରକାରରେ ସାମିଲ ହେବୁ ନାହିଁ । ଶିବସେନା (ଉଦ୍ଧବ ଠାକରେ ଗୋଷ୍ଠୀ) ବ୍ୟତୀତ କଂଗ୍ରେସ ଏବଂ ଏନସିପି ମହାରାଷ୍ଟ୍ରର ପୂର୍ବ ମହାବିକାଶ ଆଘାଡି (ଏମଭିଏ) ସରକାରରେ ସାମିଲ ଥିଲେ।