ରାଷ୍ଟ୍ରପତିଙ୍କ କାର୍ଯ୍ୟକ୍ରମରେ ପାୱାର କଟ୍ । ଓଡିଶା ସରକାରଙ୍କ ଚରମ ବିଭ୍ରାଟକୁ ଦେଖିଲା ସାରା ବିଶ୍ବ

ଭୁବନେଶ୍ବର,  ଲଜ୍ଜିତ ହେଲା ଓଡ଼ିଶା ମାଟି । ନିଜ ଜନ୍ମମାଟିରେ ଦେଶର ପ୍ରଥମ ନାଗରିକଙ୍କ ସଭାରେ ଏ ଚରମ ବିଭ୍ରାଟକୁ ଦେଖିଲା ସାରା ବିଶ୍ବ । ନିଜ ମାଟିରେ ମହାମହିମଙ୍କୁ ଅପମାନ ପାଇଁ ଉତ୍ତର ଦାୟୀ କିଏ ? ସମାବର୍ତ୍ତନ ସମାରୋହ ହେଉଥିବା ବିଶ୍ବବିଦ୍ୟାଳୟର ଅଡିଟୋରିଅମର ମେଣ୍ଟେନାନ୍ସ ଦାୟିତ୍ବରେ ଥିଲା ଇଡକୋ । ଏତ ବଡ଼ ବିଭ୍ରାଟ ଓ ଏତେ ବଡ଼ ଲଜ୍ଜା ପରେ କୁଆଡ଼ ଗଲେ ରାଜ୍ୟ ସରକାରଙ୍କ କୁହାଳିଆ ମନ୍ତ୍ରୀ ପ୍ରତାପ କେଶରୀ ଦେବ। କାହିଁକି ସାମ୍ନାକୁ ଆସି ଦେଉନାହାନ୍ତି ଜବାବ । ରାଷ୍ଟ୍ରପତିଙ୍କ କାର୍ଯ୍ୟକ୍ରମରେ ଚରମ ଦାୟିତ୍ବହୀନତାକୁ ନେଇ ଓଡ଼ିଶା ଲଜ୍ଜିତ ହେଲା ବିରୋଧୀ କଣ ଏହାକୁ ନେଇ ପ୍ରଶ୍ନ କରିବେନି । ଶାସକ ଦଳ ନେତାଙ୍କ ଅଭିଯୋଗ ବିରୋଧୀ ରାଜନୀତି କରୁଛନ୍ତି । ବିରୋଧୀ ପ୍ରଶ୍ନ କଲେ ବିଜେଡି ନେତାଙ୍କୁ ବାଧୁଛି । କିନ୍ତୁ କେବଳ ବିରୋଧୀ ନୁହନ୍ତି ରାଜ୍ୟ ସରକାରଙ୍କ ଏ ବପରୱା କାର୍ଯ୍ୟକୁ ସବୁ ବର୍ଗରୁ ସମାଲୋଚନା କରାଯାଉଛି ।

ରାଷ୍ଟ୍ରପତିଙ୍କ କାର୍ଯ୍ୟକ୍ରମରେ ଏତେବଡ଼ ବିଭ୍ରାଟ ହେଉଛି ଅଥଚ ପ୍ରଶ୍ନ କଲେ ଗଣମାଧ୍ୟମକୁ ଆଡେଇ ପାଳାଇଯାଉଛନ୍ତି ମୟୂରଭଞ୍ଜ ଜିଲ୍ଲାପାଳ । ଆରଡିସି କହିଛନ୍ତି ତଦନ୍ତ ପରେ ଦୋଷୀଙ୍କ ବିରୋଧରେ ନିଆଯିବ କାର୍ଯ୍ୟାନୁଷ୍ଠାନ । ସେପେଟ ଏ ଘଟଣାକୁ ନେଇ ଅପମାନିତ ଅନୁଭବ କରିଥିବା କହିଛନ୍ତି ବିଶ୍ବବିଦ୍ୟାଳୟ କୁଳପତି । ଏଥିପାଇଁ ଦରକାର ପଡ଼ିଲେ ଇସ୍ତଫା ଦେବାକୁ ପ୍ରସ୍ତୁତ ଥିବା ସେ କହିଛନ୍ତି । ଆଉ ସବୁଠୁ ଗୁରୁତ୍ବପୂର୍ଣ୍ଣ କଥା ହେଉଛି ଅଡିୟୋରିଅମ୍ ମେଣ୍ଟେନାନ୍ସ ଦାୟିତ୍ବରେ ଥିବା ଇଡକୋ ଅଧିକାରୀମାନେ ଘଟଣା ପରେ ଫୋନ୍ ସୁଇଚଡ ଅଫ କରିଦେଇଥିବା କହିଛନ୍ତି କୁଳପତି ।  

ରାଷ୍ଟ୍ରପତି ଦ୍ରୌପଦୀ ମୁର୍ମୁ ଆଜି ବାରିପଦା ସ୍ଥିତ ମହାରାଜା ଶ୍ରୀରାମଚନ୍ଦ୍ର ଭଞ୍ଜଦେଓ ବିଶ୍ୱବିଦ୍ୟାଳୟର ସମାବର୍ତ୍ତନ ସମାରୋହରେ ଭାଷଣ ଦେବା ବେଳେ ୯ ମିନିଟ୍ ପାଇଁ ସବୁ ଲାଇଟ୍ କଟି ଯିବା ଘଟଣାରେ ଜଣେ ନିଲମ୍ବିତ। ସେ ହେଲେ ବିଶ୍ୱବିଦ୍ୟାଳୟର ବିଦ୍ୟୁତ୍‌ କର୍ମଚାରୀ ଜୟନ୍ତ ତ୍ରିପାଠୀ। ସେପଟେ ଏହି ଘଟଣାକୁ ନେଇ କ୍ଷମା ମାଗିଛନ୍ତି କୁଳପତି। ଏଭଳି ତ୍ରୁଟି ପାଇଁ ମୁଁ ନିଜେ ନିଜକୁ ଦାୟୀ କରୁଛି ବୋଲି ଶ୍ରୀରାମଚନ୍ଦ୍ର ଭଞ୍ଜଦେଓ ବିଶ୍ୱବିଦ୍ୟାଳୟର କୁଳପତି ପ୍ରଫେସର ସନ୍ତୋଷ ତ୍ରିପାଠୀ କହିଛନ୍ତି। ଏଥିସହ ସେ ଜଣାଇଛନ୍ତି ଯେ, ସମାରୋହ ଅନୁଷ୍ଠିତ ହେଉଥିବା ବିଲଡିଂ ଇଡକୋ ତିଆରି କରିଥିଲା। ଜେନେରେଟର ବି ସଜାଡ଼ିଥିଲା। ଡେଡିକେଟେଡ ଜେନେରେଟର ଥିଲା। ହେଲେ ସେଇଟା ବି ଠିକ୍ ଲାଇଟ୍ କଟିବା ସମୟରେ କାମ ଦେଲାନି। ଆମକୁ ଏଥିପାଇଁ ଲଜ୍ଜିତ ହେବାକୁ ପଡ଼ିଲା। ଦୁଃଖ ପ୍ରକାଶ କରି ସେ ଆହୁରି କହିଛନ୍ତି, ମୁଁ ଦାୟିତ୍ୱ ମୁଣ୍ଡରୁ ଖସାଇବା ଲୋକ ନୁହେଁ, ମୁଁ କ୍ଷମାପ୍ରାର୍ଥନା କରୁଛି। ଏହି ତ୍ରୁଟି ସଂପର୍କରେ ନିଶ୍ଚିତ ଭାବେ ଅନୁସନ୍ଧାନ କରାଯିବ। ତଦନ୍ତ ପାଇଁ ୩ ଜଣିଆ କମିଟି ଗଠନ ହୋଇଛି। କମିଟି ରିପୋର୍ଟ ଦାଖଲ ପରେ କାର୍ଯ୍ୟାନୁଷ୍ଠାନ ହେବ।

LIVE: President Droupadi Murmu addresses the 12th convocation of Maharaja Sriram Chandra Bhanja Deo University at Baripada https://t.co/pEooBtn9g8

— President of India (@rashtrapatibhvn) May 6, 2023

ସେହିପରି ଏହି ଘଟଣାର ତଦନ୍ତ କରାଯିବ କହିଲେ କେନ୍ଦ୍ରାଞ୍ଚଳ ଆରଡିସି ସୁରେଶ ଦଳାଇ କହିଛନ୍ତି। ପ୍ରତିକ୍ରିୟାରେ ସେ ଜଣାଇଛନ୍ତି, ଏହି ଘଟଣା କାହିଁକି ଘଟିଲା ଓ ଏଥିପାଇଁ ଦାୟୀ କିଏ ତାହା ଅନୁସନ୍ଧାନ କରାଯିବ। ଜିଲ୍ଲାପାଳଙ୍କ ସହ ଆଲୋଚନା ପରେ ପରବର୍ତ୍ତୀ ପଦକ୍ଷେପ ନିଆଯିବ। ସେପଟେ ଆର୍‌ଡିସି ସହ ବୈଠକ ପରେ ମୟୂରଭଞ୍ଜ ଜିଲ୍ଲାପାଳ ଭିନିତ୍ ଭରଦ୍ୱାଜ କହିଛନ୍ତି, ଘଟଣାର ତଦନ୍ତ କରାଯିବ। ତେବେ ବୈଷୟିକ ତ୍ରୁଟି ଯୋଗୁଁ ଏଭଳି ଘଟିଛି। ତେବେ ଏହି ଘଟଣାରେ ନିଜ ଉପରୁ ଦୋଷ ଝାଡ଼ି ଦେଇଛନ୍ତି ବିଦ୍ୟୁତ୍ ଯୋଗାଣ ସଂସ୍ଥା ଟାଟା ପାୱାର କର୍ତ୍ତୃପକ୍ଷ। ଟାଟା ପାୱାର ଅଧୀକ୍ଷଣ ଯନ୍ତ୍ରୀ ହରୀଶ କୁମାର ପଣ୍ଡା କହିଛନ୍ତି, ଆମ ଆଡୁ କିଛି ସମସ୍ୟା ନ ଥିଲା। ବିଦ୍ୟୁତ୍‌ ସେବା ପ୍ରଦାନରେ କୌଣସି ତ୍ରୁଟି ନ ହେବା ପାଇଁ ସବୁ ପଦକ୍ଷେପ ନେଇଥିଲୁ। ଆମ ଆଡୁ କିଛି ସମସ୍ୟା ନଥିଲା। ଇଣ୍ଟରନାଲ ୱେୟାରିଂରେ କୌଣସି ସଦସ୍ୟା ଯୋଗୁ ଲାଇଟ୍‌ କଟିଥିବା ସନ୍ଦେହ କରାଯାଉଛି। ତଥାପି ଏହି ଦୁର୍ଭାଗ୍ୟଜନକ ସ୍ଥିତି ଉପୁଜିବା ନେଇ ଅନୁସନ୍ଧାନ ହେବ। ସୂଚନା ଓ ଲୋକ ସଂପର୍କ ବିଭାଗ ପକ୍ଷରୁ କହାଯାଇଛି ଯେ, ଦିନ ୧୧ଟା ୫୬ରୁ ୧୨ଟା ୦୫ ପର୍ଯ୍ୟନ୍ତ ଲାଇଟ ଗୁଡ଼ିକ କଟି ଯାଇଥିଲା। ପୂରା ଅଡିଟୋରିୟମ ଅନ୍ଧାର ହୋଇଯାଇଥିଲା।

ଯଦି ଦେଶର ମୁଖ୍ୟଙ୍କ ସଭାରେ ଏଭଳି ଅଘଟଣ ଘଟୁଛି, ଅନ୍ୟ କଥା ଆଉ କ'ଣ କହିବା। ଏହି ଉତ୍ସବରେ ରାଜ୍ୟପାଳ ତଥା ବିଶ୍ବବିଦ୍ୟାଳୟର କୁଳାଧିପତି ପ୍ରଫେସର ଗଣେଶୀ ଲାଲ୍, ମନ୍ତ୍ରୀ ପ୍ରଦୀପ କୁମାର ଅମାତ ଓ କୁଳପତି ସନ୍ତୋଷ ତ୍ରିପାଠୀ ପ୍ରମୁଖ ଉପସ୍ଥିତ ଥିଲେ। ଏଭଳି ଅନିଚ୍ଛାକୃତ ତ୍ରୁଟି ପାଇଁ ଶକ୍ତି ବିଭାଗ ଦୁଃଖ ପ୍ରକାଶ କରିଥିଲା। ସୂଚନା ଓ ଲୋକସଂପର୍କ ବିଭାଗ ମଧ୍ୟ ଏହି ଦୋଷକୁ ସ୍ବୀକାର କରିଛି। ତେବେ ଏଭଳି ବିଦ୍ୟୁତ୍ ବିଭ୍ରାଟକୁ କେହି ବି ସହଜରେ ଗ୍ରହଣ କରିପାରୁନାହାନ୍ତି।