ଇସ୍ରୋର ୫୦୦ କୋଟି ହଡପ ଅଭିଯୋଗ । ଦେବାସ ମଲ୍ଟିମିଡିଆ ସିଇଓ ଙ୍କୁ ପଳାତକ ଘୋଷଣା କଲେ କୋର୍ଟ

ନୂଆଦିଲ୍ଲୀ, ଦେବାସ ମଲ୍ଟିମିଡିଆର ସିଇଓ ରାମଚନ୍ଦ୍ରନ ବିଶ୍ବନାଥନଙ୍କୁ ବେଙ୍ଗାଲୁରୁର ଏକ ସ୍ବତନ୍ତ୍ର ଅଦାଲତ ପଳାତକ ଅର୍ଥନୈତିକ ଅପରାଧୀ ଘୋଷଣା କରିଛନ୍ତି। ପ୍ରବର୍ତ୍ତନ ନିର୍ଦେଶାଳୟ (ଇଡି) ପକ୍ଷରୁ ତାଙ୍କ ନାମରେ ମନି ଲଣ୍ଡିରିଂ ଅଭିଯୋଗରେ ମାମଲା ରୁଜୁ କରାଯାଇଥିଲା। ଇସ୍ରୋର ବାଣିଜ୍ୟିକ ଶାଖା ସଂସ୍ଥା ଆଣ୍ଟ୍ରିକ୍ସ କର୍ପୋ‌ରେସନଠାରୁ ମିଳିଥିବା ୫୭୯ କୋଟି ଟଙ୍କା ପାଣ୍ଠିର ୮୫ ପ୍ରତିଶତ ରାଶିକୁ ବିଶ୍ବନାଥନ ଓ ଅନ୍ୟ ୮ ଜଣ ବ୍ୟକ୍ତି ଆମେରିକା ପଠାଇଦେଇଥିଲେ। ଦୁର୍ଗମ ଅଞ୍ଚଳରେ ମଲ୍‌ଟିମିଡିଆ ସେବା ପ୍ରଦାନ ଲାଗି ଇସ୍ରୋର ଦୁଇଟି ଉପଗ୍ରହକୁ ବ୍ୟବହାର କରିବା ନିମନ୍ତେ ଦେବାସ ସହ ବୁଝାମଣା ହୋଇଥିଲା। 

ସେଥିପାଇଁ ଯେଉଁ ପାଣ୍ଠି ଦିଆଯାଇଥିଲା ତାହାକୁ ୨୦୧୮ରେ ଆମେରିକା ପଠାଇବା ପରେ ୨୦୨୧ରେ କଂପାନିକୁ ବନ୍ଦ କରିଦିଆଯାଇଥିଲା। ଏହି ମାମଲାର ତଦନ୍ତ ସିବିଆଇ ଆରମ୍ଭ କରିଥିଲା। ଏହା ପରେ ଇଡି ମନି ଲଣ୍ଡରିଂ ମାମଲା ରୁଜୁ କରିଥିଲା। ବିଶ୍ବନାଥନଙ୍କ ବିରୋଧରେ ଜାମିନ ବିହୀନ ଗିରଫ ପରୱାନା ଜାରି କରାଯାଇଛି। ବାରମ୍ବାର ସମନ କରିବା ପରେ ସେ କୋର୍ଟରେ ହାଜର ହେବାରେ ବିଫଳ ହୋଇଥିବାରୁ ତାଙ୍କୁ ପଳାତକ ଅର୍ଥନୈତିକ ଅପରାଧୀ ଘୋଷଣା କରାଯାଇଛି।