“ସୁଭଦ୍ରା” ଯୋଜନା ରାଜ୍ୟସ୍ତରୀୟ ପରିଚାଳନା କମିଟି ବୈଠକ

ଭୁବନେଶ୍ୱର, ୩ ସେପ୍ଟେମ୍ବର ୨୦୨୪

ସେପ୍ଟେମ୍ବର ୧୭ ରେ ଜନତା ମୈଦାନ ଠାରେ ହେବାକୁ ଥିବା ରାଜ୍ୟସ୍ତରୀୟ ସମାରୋହ ପାଇଁ ପ୍ରସ୍ତୁତି ଆଲୋଚନା 

ସୁଭଦ୍ରା ଯୋଜନାର ହିତାଧିକାରୀଙ୍କୁ ପ୍ରଥମ କିସ୍ତି ଆର୍ଥିକ ସହାୟତା ଚଳିତ ସେପ୍ଟେମ୍ବର ମାସ ୧୭ ତାରିଖରେ ପ୍ରଦାନ କରାଯିବ ।  ଏହି ଦିନ ଭୁବନେଶ୍ୱରସ୍ଥିତ ଜନତା ମୈଦାନ ଠାରେ ଆୟୋଜନ ହେବାକୁ ଥିବା  ରାଜ୍ୟସ୍ତରୀୟ କାର୍ଯ୍ୟକ୍ରମରେ  ମାନ୍ୟବର ପ୍ରଧାନମନ୍ତ୍ରୀ ଯୋଗଦେଇ  ଯୋଜନାରେ ଅନ୍ତର୍ଭୁକ୍ତ ହିତାଧିକାରୀଙ୍କୁ ସୁଭଦ୍ରା କାର୍ଡ ବଣ୍ଟନ କରିବାର କାର୍ଯ୍ୟକ୍ରମ ରହିଛି । ଏହି କାର୍ଯ୍ୟକ୍ରମକୁ ସୁଚାରୁରୂପେ ସମ୍ପାଦନ କରିବା ତଥା ହିତାଧିକାରୀଙ୍କୁ ପ୍ରଥମ କିସ୍ତି ସହାୟତା ଅର୍ଥ ପ୍ରଦାନ କରାଯିବାକୁ ଥିବା ପରିପ୍ରେକ୍ଷୀରେ କାର୍ଯ୍ୟ ଅଗ୍ରଗତି ସଂପର୍କରେ ଆଜି ପୂର୍ବାହ୍ନରେ ସୁଭଦ୍ରା ଯୋଜନା ରାଜ୍ୟସ୍ତରୀୟ ପରିଚାଳନା କମିଟିର ଏକ ବୈଠକ ମୁଖ୍ୟ ଶାସନ ସଚିବ ତଥା କମିଟିର ଅଧ୍ୟକ୍ଷ  ଶ୍ରୀ ମନୋଜ ଆହୁଜାଙ୍କ ଅଧ୍ୟକ୍ଷତାରେ ଅନୁଷ୍ଠିତ ହୋଇଯାଇଛି । 

ବୈଠକର ପ୍ରାରମ୍ଭରେ ମହିଳା ଓ ଶିଶୁ ବିକାଶ ବିଭାଗ ପ୍ରମୁଖ ଶାସନ ସଚିବ ଶ୍ରୀମତୀ ଶୁଭା ଶର୍ମା  ପ୍ରସ୍ତୁତି ସଂପର୍କରେ ଉପସ୍ଥାପନ କରିଥିଲେ ।  ଆଗାମୀ ୧୭ ତାରିଖ କାର୍ଯ୍ୟକ୍ରମ ପରିପ୍ରେକ୍ଷୀରେ ପ୍ରଶାସନିକ ସ୍ତରରେ  ଗଠିତ ଅଭ୍ୟର୍ଥନା କମିଟି, ସାଂସ୍କୃତିକ କମିଟି, ସହର ସୌନ୍ଦର୍ଯ୍ୟକରଣ  କମିଟି, ଲୋକସଂପର୍କ କମିଟି, ନାରୀ ଶକ୍ତି କମିଟି, ସମନ୍ୱୟ କମିଟି ଆଦି ଉପ କମିଟିର କାର୍ଯ୍ୟ ଅଗ୍ରଗତି ଓ ପ୍ରସ୍ତୁତି ସଂପର୍କରେ ଆଲୋଚନା  କରାଯାଇଥିଲା । କାର୍ଯ୍ୟକ୍ରମରେ ବହୁ ଜନସମାଗମକୁ ଦୃଷ୍ଟିରେ ରଖି କାର୍ଯ୍ୟକ୍ରମ ସ୍ଥଳର ପ୍ରସ୍ତୁତି, ପାର୍କିଂ ସ୍ଥଳ, ଟ୍ରାଫିକ୍ ପରିଚାଳନା, ପରିବହନ ବ୍ୟବସ୍ଥା,ପାଶ୍ ପ୍ରଦାନ , ଗଣମାଧ୍ୟମ ପରିଚାଳନା  ଆଦି ବ୍ୟବସ୍ଥା ସଂପର୍କରେ  ବିସ୍ତୃତ ଆଲୋଚନା କରାଯାଇଥିଲା । ବିଭିନ୍ନ ଉପ-କମିଟିର ସମ୍ମିଳିତ ପ୍ରୟାସ ଓ ସମନ୍ୱୟରେ ଏହି ରାଜ୍ୟସ୍ତରୀୟ ସମାବେଶ ତଥା ଯୋଜନା କାର୍ଯ୍ୟକାରୀ ସଂପର୍କିତ ଆନୁଷଙ୍ଗିକ କାର୍ଯ୍ୟକୁ ସୁଚାରୁରୂପେ ସଂପାଦନ  ପାଇଁ ମୁଖ୍ୟ ଶାସନ ସଚିବ ସମସ୍ତଙ୍କର ସହଯୋଗ କାମନା କରିଥିଲେ ।  

ଆସନ୍ତା କାଲି ସେପ୍ଟେମ୍ବର ୪ ତାରିଖରୁ ଆବେଦନ କାରୀଙ୍କ ଠାରୁ ପୂରଣ କରାଯାଇଥିବା ଫର୍ମ ସଂଗ୍ରହ କାର୍ଯ୍ୟ ଆରମ୍ଭ ହେଉଥିବାରୁ ଆବେଦନ ପ୍ରକ୍ରିୟାକୁ ସୁବ୍ୟସ୍ଥିତ ଭାବରେ କରାଯିବା ପାଇଁ ନିଆଯାଇଥିବା ବିଭିନ୍ନ ପଦକ୍ଷେପ ସଂପର୍କରେ ବୈଠକରେ ଆଲୋଚନା କରାଯାଇଥିଲା । 

ମାନ୍ୟବର ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶକ୍ରମେ “ସୁଭଦ୍ରା" ଯୋଜନାର ଆବେଦନ ଫର୍ମ ବିତରଣ କାର୍ଯ୍ୟକ୍ରମ ଓଡ଼ିଶାର ସମସ୍ତ ଜିଲ୍ଲାରେ ଚାଲୁରହିଥିବା ସ୍ଥଳେ ମୋ ସେବା କେନ୍ଦ୍ର, ଜନ ସେବା କେନ୍ଦ୍ର ଓ ଜିଲ୍ଲାପାଳଙ୍କ ନିର୍ଦ୍ଦେଶ ଅନୁସାରେ ନିରୂପଣ କରାଯାଇଥିବା ନିର୍ଦ୍ଦିଷ୍ଟ ସ୍ଥାନ ଓ କାର୍ଯ୍ୟାଳୟରେ ଫର୍ମ ସଂଗ୍ରହ କରାଯିବ । ଏଥିପାଇଁ  ସମ୍ଭାବ୍ୟ ଜନ ଗହଳିକୁ ଦୃଷ୍ଟିରେ ରଖି  ମୋ ସେବା କେନ୍ଦ୍ର ବା  ସାଧାରଣ ସେବା କେନ୍ଦ୍ର (କମନ ସର୍ଭିସ୍ ସେଣ୍ଟର) ରେ ଫର୍ମ  ସଂଗ୍ରହ ବ୍ୟବସ୍ଥା କିପରି ରହିଛି, ସେ ସଂପର୍କରେ ଆଲୋଚନା କରାଯାଇଥିଲା । ଏହି ପ୍ରକ୍ରିୟାରେ ପ୍ରତ୍ୟେକ ଆବେଦନକାରୀଙ୍କୁ  ଯେପରି ଠିକ୍ ଭାବେ, ଶୀଘ୍ର ଆବେଦନ କରିବା ପାଇଁ ସହଯୋଗ କରାଯାଇପାରିବ, ସେଥିପ୍ରତି ବ୍ୟବସ୍ଥା ଗ୍ରହଣ ସଂପର୍କରେ ଇଲେକ୍ଟ୍ରୋନିକ୍ସ  ଓ ଆଇଟି ବିଭାଗ ପ୍ରମୁଖ ଶାସନ ସଚିବ ଶ୍ରୀ ବିଶାଳ କୁମାର ଦେବ  କମିଟିକୁ ଅବଗତ କରାଇଥିଲେ ।  ସୁଭଦ୍ରା ଯୋଜନା ସଂପର୍କିତ ଅନୁସନ୍ଧାନ ପାଇଁ ଟୋଲ-ଫ୍ରି ନମ୍ବର -୧୪୬୭୮  “କଲ ସେଣ୍ଟର” ର  ପରିଚାଳନା ସଂପର୍କରେ  ମଧ୍ୟ ବୈଠକରେ ଆଲୋଚନା କରାଯାଇଥିଲା । 

ଏହି ବୈଠକରେ ରାଜ୍ୟ ଉନ୍ନୟନ କମିଶନର ତଥା ଅତିରିକ୍ତ ମୁଖ୍ୟ ଶାସନ ସଚିବ ଶ୍ରୀମତୀ ଅନୁ ଗର୍ଗ, ଅତିରିକ୍ତ ମୁଖ୍ୟ ଶାସନ ସଚିବ ଶ୍ରୀ ସୁରେନ୍ଦ୍ର କୁମାରଙ୍କ ସମେତ ବିଭିନ୍ନ କମିଟିରେ ସଦସ୍ୟ ରହିଥିବା ପ୍ରମୁଖ ଶାସନ ସଚିବ, କମିଶନର ତଥା ଶାସନ ସଚିବ, ବିଡିଏ , ଇଡକୋ,  ବିଏମସି ଆଦିର  ଉଚ୍ଚ କର୍ତ୍ତୃପକ୍ଷ ତଥା ପଦାଧିକାରୀ ଉପସ୍ଥିତ ରହି ଆଲୋଚନାରେ ଅଂଶଗ୍ରହଣ କରିଥିଲେ ।