୬ଟି ଉପସାଗରୀୟ ଦେଶର ଓଡିଆ ସମାଜର ବ୍ୟକ୍ତିମାନଙ୍କ ସହ ଭିଡିଓ କନଫରେନ୍ସି ।

ନୂଆଦିଲ୍ଲୀ/ ଭୁବନେଶ୍ୱର, ଉପସାଗରୀୟ ଦେଶ ସମୂହର ୬ଟି ପ୍ରମୁଖ ଦେଶରେ ରହୁଥିବା ଓଡ଼ିଆ ସମାଜର ବ୍ୟକ୍ତିମାନଙ୍କ ସହ ଆଜି ଭିଡିଓ କନଫରେନିଂ ମାଧ୍ୟମରେ କଥା ହୋଇଛନ୍ତି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ । କରୋନା ପରବର୍ତ୍ତୀ ପରିସ୍ଥିତିରେ ଭାରତ ବିଶ୍ୱ ଅର୍ଥନୀତିର ସମ୍ଭାବନାର କେନ୍ଦ୍ର ହେବା ନେଇ ଆକଳନ କରାଯାଉଛି । 

ଭାରତ ପାଇଁ ସୃଷ୍ଟି ହେଉଥିବା ସମ୍ଭାବନାକୁ କିପରି ଆମ ରାଜ୍ୟ ଓଡିଶା ମୁହାଁ କରିହେବ ଏବଂ ଓଡ଼ିଶା ଏଥିରୁ ଲାଭ ପାଇପାରିବ, ଏହା ଜଣେ ଓଡିଆ ଭାବରେ ସମସ୍ତଙ୍କ ଦାୟିତ୍ବ ବୋଲି କେନ୍ଦ୍ରମନ୍ତ୍ରୀ ଶ୍ରୀ ପ୍ରଧାନ କହିଛନ୍ତି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କର ଦୂରଦୃଷ୍ଟି ସମ୍ପନ୍ନ କରୋନା ମୁକାବିଲା ଭାରତକୁ ଲାଭ ଦେଇଛି । ପ୍ରଧାନମନ୍ତ୍ରୀ ପ୍ରଥମେ ଜୀବନ ଏବଂ ପରେ ଜୀବିକା ବୋଲି କହି ଭାରତର ପ୍ରତ୍ୟେକ ନାଗରିକଙ୍କ ଜୀବନ ବଂଚାଇବା ଉପରେ ଗୁରୁତ୍ବ ଦେଇଥିଲେ । ଏହା ପରେ ପ୍ରଧାନମନ୍ତ୍ରୀ ମୋଦି ଲୋକଙ୍କ ଜୀବନ ସହ ଜୀବିକାର ସୁରକ୍ଷାର କଥା କହିଥିଲେ । ପ୍ରଧାନମନ୍ତ୍ରୀଙ୍କ ଉଦ୍ୟମରେ ଆଗାମୀ ଦିନ ମାନଙ୍କରେ ଭାରତ ବିଶ୍ୱର ବଡ ବ୍ରାଣ୍ଡ୍ ହେବ । ଭାରତର ବଜାର ପାଖରେ ବଡ ଶକ୍ତି ରହିଛି । ଆଗାମୀ ଦିନରେ ଭାରତ ସବୁଠାରୁ ବଡ ତୈଳ ବଜାର ହେବାର ସମ୍ଭାବନା ନେଇ ଭାରତର ବିଶ୍ୱ ବଜାରରେ ସୁବିଧାଜନକ ସ୍ଥିତି ହେବ ବୋଲି ସୂଚନା ଦେଇଥିଲେ ଶ୍ରୀ ପ୍ରଧାନ ।

ଉପସାଗରୀୟ ଦେଶ ଗୁଡିକରେ ଓଡିଆ ସମାଜର ସ୍ବାସ୍ଥ୍ୟ ଓ ଆର୍ଥିକ ସ୍ଥିତି ଏବଂ ସ୍ବଦେଶ ଫେରିବା ଇଚ୍ଛା ନେଇ ଏହି ବୈଠକରେ ବିସ୍ତୃତ ଆଲୋଚନା ହୋଇଥିଲା । ଏହି ଆଲୋଚନାରେ ୟୁଏଇ, କତାର, ସାଉଦି ଆରବ, ବାହାରିନ, କୁଏତ ଏବଂ ଓମାନର ୧୫ ରୁ ଉର୍ଦ୍ଧ ବ୍ୟକ୍ତିବିଶେଷ ସାମିଲ ହୋଇଥିଲେ । ଏହି ଅବସରରେ ଓଡ଼ିଆ ବ୍ୟକ୍ତିମାନେ କୋଭିଜ୍- ୧୯ ପାଇଁ ସେଠାକାରଙ୍କ ସରକାରଙ୍କ ଦ୍ବାରା ନିଆଯାଇଥିବା ପଦକ୍ଷେପ, ଓଡିଆ ସମୁଦାୟକ ରହଣୀ ବା ସଙ୍ଗରୋଧ ଓ ସମସ୍ୟା ଉପରେ ଆଲୋକପାତ କରିଥିଲେ । ଏହାସହ ଭାରତରେ କରୋନା ମୁକାବିଲାରେ କେନ୍ଦ୍ର ଓ ରାଜ୍ୟ ସରକାରଙ୍କ ପଦକ୍ଷେପକୁ ସେମାନେ ପ୍ରଶଂସା କରିଥିଲେ । ଭାରତୀୟ ରାଷ୍ଟ୍ରଦୂତମାନେ ମଧ୍ୟ ସେମାନଙ୍କୁ ସମର୍ଥନ ଓ ସହଯୋଗ କରୁଥିବା ମତବ୍ୟକ୍ତ କରିଥିଲେ । 

ଏହି ଆଲୋଚନାରେ ସାଉଦିଆରବର ପ୍ରିୟମୋହନ ମଲ୍ଲିକ, ବି.ବି ସାହୁ, ଦେବାଶିଷ ରାଉତ, କତାରରୁ ବିଦ୍ୟାଭୂଷଣ ମହାନ୍ତି, କାଜଲ ପ୍ରସାଦ ବିଶ୍ବାଳ, ବାହାରିନର ଅରୁଣ କୁମାର ପ୍ରହରାଜ, ରମେଶ ପାଣିଗ୍ରାହୀ, ୟୁଏଇର ଚନ୍ଦ୍ର ଶେଖର ଝୁଟିଆ, ଅମିୟ ମିଶ୍ର, ସମୀର ବିଶ୍ବାଲ, କୁଏତର ଗିରିଜା ଶଙ୍କର । ପାଢୀ, ଗିରିଜାନନ୍ଦନ ପଣ୍ଡା, ଓମାନର ଦୀନବନ୍ଧୁ ସାମଲ ଓ ସଞ୍ଜୟ କୁମାର ଜେଟି ପ୍ରମୁଖ ଆଲୋଚନାରେ ଅଂଶଗ୍ରହଣ କରି ନିଜର ମତାମତ ରଖିଥିଲେ ।