ଐତିହାସିକ ଶିଶୁପାଳଗଡକୁ ରାଜ୍ୟ ସରକାରଙ୍କ ଜମି ଜବର ଦଖଲରୁ ବଞ୍ଚାଯାଉ : ଲେଖାଶ୍ରୀ

ଭୁବନେଶ୍ୱର, ଦୁଇ ହଜାର ବର୍ଷରୁ ଉର୍ଦ୍ଧ ଐତିହାସିକ ଶିଶୁପାଳଗଡ ଠାରେ ଅନେକ ପୂରାତନ ମଠ ମନ୍ଦିର ଏବଂ ଐତିହ୍ୟ ଭରିରହିଛି । ଏଠି ଅନେକ ସ୍ଥାନରେ ଭାରତୀୟ ପୁରାତତ୍ଵ ସର୍ବେକ୍ଷଣ ପକ୍ଷରୁ ଆବିଷ୍କାର ଏବଂ ସଂଗ୍ରକ୍ଷଣ କାମ ଚାଲିଛି । ହେଲେ ରାଜ୍ୟ ସରକାର ‘ସୌନ୍ଦର୍ଯ୍ୟକରଣ’ନାଁ ରେ ଜମି ଜବର ଦଖଲ କରୁଛନ୍ତି ଯାହା ଫଳରେ ବହୁ ପୁରାତନ ଐତିହାସିକ ଢାଞ୍ଚା ଏବଂ କଳାକୃତି ନଷ୍ଟ ହେଉଛି । ଏହା ବିରୁଦ୍ଧରେ ବିଜେପିର ଏକ ପ୍ରତିନିଧୀ ଦଳ ଏଏସଆଇ ସୁପରିଟେଣ୍ଡଟକୁ ଭେଟି ଶିଶୁପାଳଗଡକୁ ସଂଗ୍ରକ୍ଷଣ କରିବା ପାଇଁ ଦାବି କରିଛନ୍ତି ।

ଶିଶୁପାଳଗଡର ୨୦୦୦ ବର୍ଷରୁ ଉର୍ଦ୍ଧ ପରମ୍ପରାକୁ ସଂଗ୍ରେକ୍ଷଣ କରିବା ଉଭୟ ରାଜ୍ୟ ଏବଂ କେନ୍ଦ୍ର ସରକାରଙ୍କ ଦାୟୀତ୍ଵ । ହେଲେ ସେଠାରେ ରାଜ୍ୟ ସରକାରଙ୍କ ଅନିୟନ୍ତ୍ରିତ ‘ସୌନ୍ଦର୍ଯ୍ୟକରଣ କାର୍ଯ୍ୟକ୍ରମ ନାଁରେ ଜମି ଜବର ଦଖଲ କରାଯାଉଛି । ସେଠାରେ ଜମି ମାଫିଆଙ୍କ ମଧ୍ୟ ରାଜ ଚାଲିଛି ଯାହାଫଳରେ ସେଠାରେ ଥିବା ଐତିହାସିକ ମଠ ମନ୍ଦିର ଉପରେ ବିପଦ ଘନେଇଛି । ଏଣୁ ଏଏସଆଇ ରାଜ୍ୟ ସରକାରଙ୍କୁ ସେଠାରେ କୌଣସି ପ୍ରକାର କାମ କରିବାକୁ ମନା କରିବା ପାଇଁ ବିଜେପି ରାଜ୍ୟ ସାଧାରଣ ସଂପାଦିକା ଡ. ଲେଖାଶ୍ରୀ ସାମନ୍ତସିଂହାର ଦାବି କରିଛନ୍ତି । 

ଏହା ପରେ ବିଜେପିର ପ୍ରତିନିଧୀ ଦଳ ଲିଙ୍ଗରାଜ ମନ୍ଦିର ପାଖରେ ଥିବା ଶୁକ ଶାରୀ ପରିସର ବୁଲି ସେଠାରେ ହେଉଥିବା କାର୍ଯ୍ୟର ସମୀକ୍ଷା କରିଥିଲେ । ରାଜ୍ୟ ସରକାରଙ୍କ ଏହିଭଳି ଅନିୟନ୍ତ୍ରିତ ‘ସୌନ୍ଦର୍ଯ୍ୟକରଣ କାର୍ଯ୍ୟକ୍ରମ ଯୋଗୁଁ ଏବେ ଶୁକଶାରୀ ମନ୍ଦିର ପାଖରେ ଥିବା ଶିବଲିଙ୍ଗ ଆଘାତ ହୋଇଛି । ଏଏସଆଇ ଅଧିନରେ ଥିବା ଶିଶୁପାଳ ଗଡ ଏବଂ ଲିଙ୍ଗରାଜ ମନ୍ଦିର ପାଖ ଶୁକ ଶାରୀ ମନ୍ଦିର ଆଦି ସମ୍ବେଦନଶୀଳ ଐତିହାସିକ ସ୍ଥଳୀରେ ରାଜ୍ୟ ସରକାର ହସ୍ତକ୍ଷେପ ନକରିବା ପାଇଁ ଡ. ସାମନ୍ତସିଂହାର ଦାବି କରିଛନ୍ତି ।

ଏହି ପ୍ରତିନିଧୀଦଳରେ ବିଜେପି ନେତା ଜଗନ୍ନାଥ ପ୍ରଧାନ, ଭୁବନେଶ୍ୱର ଜିଲ୍ଲା ସଭାପତି ବାବୁ ସିଂ, ରାଜ୍ୟ ଲିଗାଲ ସେଲ ସଂଯୋଜକ ଜୟନ୍ତ ଜେନା, ଆଇନଜୀବୀ ବିଶ୍ବରଂଜନ ପଟ୍ଟନାୟକ, ତପନ କୁମାର ନାୟକ, ବିପିନ ଭୂଷଣ ବଳିଆରସିଂହ, ସତ୍ୟବ୍ରତ ନାୟକ, ମୂରଲୀ ମନୋହର ପାତ୍ର, ମଦନମୋହନ ପ୍ରଧାନ, ଶିବ ବେହେରା ପ୍ରମୁଖ ଉପସ୍ଥିତ ଥିଲେ ।