ପ୍ରଦେଶ କଂଗ୍ରେସ ସଂଖ୍ୟାଲଘୁ ସଂପ୍ରଦାୟର ପୂର୍ବତନ ଅଧ୍ୟକ୍ଷ ଅବଦୁଲ ବାରୀଙ୍କ ବିୟୋଗରେ ପିସିସିର ଶୋକସଭା

ଭୁବନେଶ୍ୱର, ବରିଷ୍ଠ କଂଗ୍ରେସ ନେତା ତଥା ପ୍ରଦେଶ କଂଗ୍ରେସ ସଂଖ୍ୟାଲଘୁ ବିଭାଗର ପୂର୍ବତନ ଅଧ୍ୟକ୍ଷ ଅବଦୁଲ ବାରୀଙ୍କ ବିୟୋଗରେ ପ୍ରଦେଶ କଂଗ୍ରେସ ସଭାପତି ଶ୍ରୀ ନିରଞ୍ଜନ ପଟ୍ଟନାୟକ ଗଭୀର ଶୋକବ୍ୟକ୍ତ କରିଛନ୍ତି । ଶ୍ରୀ ପଟ୍ଟନାୟକ କହିଛନ୍ତି ଯେ ସ୍ଵର୍ଗତ ବାରୀ ଛାତ୍ର ଜୀବନରୁ କଂଗ୍ରେସ ଦଳ ପ୍ରତି ସମର୍ପିତ ଭାବେ କାର୍ଯ୍ୟ କରିଆସୁଥିଲେ । ପରବର୍ତ୍ତୀ ପର୍ଯ୍ୟାୟରେ ପ୍ରଦେଶ ଯୁବ କଂଗ୍ରେସ ଓ ପ୍ରଦେଶ କଂଗ୍ରେସର ସଂଖ୍ୟାଲଘୁ ବିଭାଗର ଅଧ୍ୟକ୍ଷ ବହୁ ବର୍ଷ ଧରି ସୂଚାରୁ ରୂପେ ଦାୟିତ୍ୱ ସମ୍ପାଦନ କରିଥିଲେ । ସଂଖ୍ୟାଲଘୁ ସଂପ୍ରଦାୟର ବିଭିନ୍ନ ସମସ୍ୟାର ସମାଧାନ ପାଇଁ ସେ ଜୀବନବ୍ୟାପି ପ୍ରଚେଷ୍ଟା ଜାରି ରଖିଥିଲେ । 

ରାଜ୍ୟରେ ବିଭିନ୍ନ ସ୍ଥାନରେ ଅବସ୍ଥାନ କରୁଥିବା ସଂଖ୍ୟାଲଘୁ ସଂପ୍ରଦାୟର ସଂକଟ ସମୟରେ ସେ ଫହଚି ସହାୟତା ପ୍ରଦାନ କରୁଥିଲେ । ପ୍ରଦେଶ କଂଗ୍ରେସ ସଂଖ୍ୟାଲଘୁ ସଂପ୍ରଦାୟ ଅଧ୍ୟକ୍ଷ ଦାୟିତ୍ବରେ ଥିବା ବେଳେ ସେ ଅନେକ ଥର ରାଜ୍ୟସ୍ତରୀୟ ସଂଖ୍ୟାଲଘୁ ସଂପ୍ରଦାୟର ସମ୍ମିଳନୀ ସଫଳ ଭାବରେ ଆୟୋଜନ କରିଥିଲେ । ସ୍ୱର୍ଗତ ବାରୀ ଜଣେ ସୁସଂଗଠକ ଥିଲେ । ଅନ୍ୟପକ୍ଷରେ ସେ ଜଣେ ମେଳାପି, ପରୋପକାରୀ, ବନ୍ଧୁବତ୍ସଳ ଏବଂ ଉତମ ବ୍ୟବହାର ସଂପନ୍ନ ବ୍ୟକ୍ତିଥିଲେ । ତାଙ୍କର ବିୟୋଗ କଂଗ୍ରେସ ଦଳ ପାଇଁ ଏକ ଅପୂରଣୀୟ କ୍ଷତି । ପିସିସି ସଭାପତି ଶ୍ରୀ ପଟ୍ଟନାୟକ ସ୍ବର୍ଗତ ବାରୀଙ୍କ ଅମର ଆତ୍ମାର ସଦଗତି କାମନା କରିବା ସହ ଶୋକସନ୍ତପ୍ତ ପରିବାରବର୍ଗଙ୍କ ପ୍ରତି ସମବେଦନା ଜଣାଇଛନ୍ତି । 

ପ୍ରଦେଶ କଂଗ୍ରେସ ସଂଖ୍ୟାଲଘୁ ସଂପ୍ରଦାୟର ପୂର୍ବତନ ଅଧ୍ୟକ୍ଷ ଅବଦୁଲ ବାରୀଙ୍କ ବିୟୋଗରେ ପିସିସି କାର୍ଯ୍ୟାଳୟରେ ଶୋକସଭା । 

ଆଜି ପ୍ରଦେଶ କଂଗ୍ରେସ କାର୍ଯ୍ୟାଳୟରେ ପ୍ରଦେଶ କଂଗ୍ରେସ କାର୍ଯ୍ୟକାରୀ ସଭାପତି ଶ୍ରୀ ପ୍ରଦୀପ ମାଝାଙ୍କ ଅଧ୍ୟକ୍ଷତାରେ ପ୍ରଦେଶ କଂଗ୍ରେସ ସଂଖ୍ୟାଲଘୁ ବିଭାଗର ପୂର୍ବତନ ଅଧ୍ୟକ୍ଷ ଅବଦୁଲ ବାରୀଙ୍କ ବିୟୋଗରେ ଶୋକସଭା ଅନୁଷ୍ଠିତ ହୋଇଯାଇଛି । ଏହି ପ୍ରରିପ୍ରେକ୍ଷୀରେ ଶ୍ରୀ ମାଝା କହିଛନ୍ତି ଯେ ସ୍ଵର୍ଗତ ଅବଦୁଲ ବାରୀଙ୍କ ବିୟୋଗ ଆମ ପାଇଁ ଏକ ଅପୂରଣୀୟ କ୍ଷତି । ତାଙ୍କର ସମାଜସେବା ଏବଂ କଂଗ୍ରେସ ଦଳରେ ତାଙ୍କର ସାଂଗଠନିକ କାର୍ଯ୍ୟକ୍ରମ ପାଇଁ ସେ ଆମନିକଟରେ ସ୍ମରଣୀୟ ହୋଇ ରହିବେ । ସେ ଦୀର୍ଘବର୍ଷ ଧରି ପ୍ରଦେଶ କଂଗ୍ରେସ ସଂଖ୍ୟାଲଘୁ ବିଭାଗର ଦାୟିତ୍ବ ବହନ କରିଥିଲେ ଏବଂ ସଂଖ୍ୟାଲଘୁ ସଂପ୍ରଦାୟ କିପରି ସୁରକ୍ଷିତ ରହିବେ ଏବଂ ନ୍ୟାୟପ୍ରାପ୍ତ ହେବେ ସେ ଦିଗରେ ତାଙ୍କର ଉଦ୍ୟମ ଓ କାର୍ଯ୍ୟକ୍ରମ ପ୍ରଶଂସନୀୟ ଥିଲା । 

ଏହି କାର୍ଯ୍ୟକ୍ରମରେ ଉପସ୍ଥିତ ରହି ବିଧାୟକ ସୁରେଶ କୁମାର ରାଉତରାୟ କହିଥିଲେ ଯେ ସ୍ଵର୍ଗତ ଅବଦୁଲ ବାରୀଙ୍କ ସହ ତାଙ୍କର ଦୀର୍ଘ ୪୦ ବର୍ଷର ସଂପର୍କ । ସେ କେବଳ ଜଣେ ରାଜନେତା ନୁହେଁ ଜଣେ ଉଚ୍ଚକୋଟୀର ସମାଜସେବୀ । ତାଙ୍କର ବିୟୋଗରେ ଆମେ ସମସ୍ତେ ମର୍ମାହତ । ଏହି କାର୍ଯ୍ୟକ୍ରମରେ ଅନ୍ୟମାନଙ୍କ ମଧ୍ୟରେ ଜାନକୀ ବଲ୍ଲଭ ପଟ୍ଟନାୟକ, ୟାସିର ନୱାଜ, ପତ୍ନାକର ଗୁରୁ, ହଳଧର ସେଠୀ, ପ୍ରକାଶ ମିଶ୍ର, ଲିଙ୍ଗରାଜ ସାହୁ, ଦୀପକ ମହାପାତ୍ର, କହ୍ନେଇ ସେଠୀ, ଜିଆଉଲ ହକ ପ୍ରମୁଖ ଅଂଶଗ୍ରହଣ କରିଥିଲେ ।