ଇଣ୍ଡିଆନ ଚ୍ୟାମ୍ବର ଅଫ କମର୍ସ ମହିଳା ଉଦ୍ୟମିତା କମିଟିର ଉତ୍ସବ

ଭୁବନେଶ୍ୱର, ସକଳ ସୃଷ୍ଟି ଆଦିଶକ୍ତିରୁ ଉତ୍ପନ୍ନ । ମହିଳାମାନେ ହେଉଛନ୍ତି ଆଦିଶକ୍ତିଙ୍କ କ୍ରିୟାଶୀଳ ରୂପ । ସର୍ଜନଶୀଳତା ସେମାନଙ୍କର ସ୍ୱାଭାବିକତା । ସେହି ଶକ୍ତିର ସଫଳ ଉପଯୋଗରେ ଜଗତର ମଙ୍ଗଳ ବୋଲି ରାଜ୍ୟପାଳ ପ୍ରଫେସର ଗଣେଶୀ ଲାଲ ପ୍ରକାଶ କରିଛନ୍ତି । ଆଜି ରାଜଭବନରେ ଇଣ୍ଡିଆନ ଚ୍ୟାମ୍ବର ଅଫ କମର୍ସ ଉଇମେନ୍ସ ଏଂଟ୍ରପ୍ରେନରସିପ୍‍ କମିଟି ପକ୍ଷରୁ ଅନୁଷ୍ଠିତ ଉତ୍ସବରେ ଯୋଗ ଦେଇ ରାଜ୍ୟପାଳ ପ୍ରଫେସର ଗଣେଶୀ ଲାଲ କହିଲେ ଯେ, ଏ ପୃଥିବୀ ସୁନ୍ଦର ଏବଂ ଏହାକୁ ଆହୁରି ସୁନ୍ଦରତର କରିବାର ପ୍ରୟାସରେ ଅଛି ଜୀବନର ସାର୍ଥକତା । ସମାଜର ବୃହତ୍ତର କଲ୍ୟାଣ ମହିଳା ଉଦ୍ୟୋଗୀଙ୍କ ଲକ୍ଷ୍ୟ ଓ ଉଦ୍ଦେଶ୍ୟ ହେଉ ବୋଲି ରାଜ୍ୟପାଳ ଆଶା ପ୍ରକାଶ କରିଥିଲେ । 

ଇଣ୍ଡିଆନ ଚ୍ୟାମ୍ବର ଅଫ କମର୍ସ ପୃଷ୍ଠପୋଷକତାରେ ଶତାଧିକ ମହିଳା ଉଦ୍ୟୋଗୀ କ୍ରିୟାଶୀଳ ଥିବାରେ ରାଜ୍ୟପାଳ ସନ୍ତୋଷ ବ୍ୟକ୍ତ କରିବା ସହ ଶୁଭେଚ୍ଛା ଓ ଅଭିନନ୍ଦନ ଜଣାଇଥିଲେ । ଇଣ୍ଡିଆନ ଚ୍ୟାମ୍ବର ଅଫ କମର୍ସ- ଓଡ଼ିଶାର ଅଧ୍ୟକ୍ଷ ଜେ.ବି. ପାଣି, ସହ ଅଧ୍ୟକ୍ଷ ମହେନ୍ଦ୍ର ଗୁପ୍ତା ଓଡ଼ିଶାରେ ଔଦଗିକତାର ସ୍ଥିତି ଓ ପ୍ରଗତି ସମ୍ପର୍କରେ ସୂଚନା ଦେଇଥିଲେ। ମହିଳା ଉଦ୍ୟୋଗ କମିଟିର ଆବାହିକା ସୁକୀର୍ତି ପଟ୍ଟନାୟକ ମହିଳା ଉଦ୍ୟୋଗୀମାନଙ୍କ ସଫଳତା ସମ୍ପର୍କରେ ଆଲୋକପାତ କରିଥିଲେ । ମହିଳା ଉଦ୍ୟୋଗୀ କମିଟିର ସହ ଆବହିକା ତନୟା ପଟ୍ଟନାୟକଙ୍କ ସମେତ ପ୍ରାୟ ୫୦ରୁ ଉର୍ଦ୍ଧ ମହିଳା ଉଦ୍ୟୋଗୀ ଉତ୍ସବରେ ଯୋଗ ଦେଇଥିଲେ ।