ପାକିସ୍ତାନକୁ ଘାରିଲାଣି ଭୟ । ଭାରତ ପୁଣି ସର୍ଜିକାଲ ଷ୍ଟ୍ରାଇକ୍ କରିଦବନି ତ ?

ନୂଆଦିଲ୍ଲୀ, ଗତ ୨୦ ତାରିଖରେ ଜମ୍ମୁ ଓ କଶ୍ମୀରର ପୁଞ୍ଚରେ ହୋଇଥିବା ଆତଙ୍କବାଦୀ ଆକ୍ରମଣରେ ଭାରତର ୫ ଜଣ ସେନା ଯବାନ ସହିଦ ହୋଇଥିଲେ । ଏହି ଘଟଣାକୁ ନେଇ ଦେଶରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି ଓ ଭାରତ ସରକାରଙ୍କ ଉପରେ ପ୍ରବଳ ଚାପ ରହିଛି । ଏଣୁ ଭାରତ ପୁଣି ପାକିସ୍ତାନ ଉପରେ ସର୍ଜିକାଲ ଷ୍ଟ୍ରାଇକ୍ କରିପାରେ ବୋଲି ପାକିସ୍ତାନରେ ଆଲୋଚନା ହେଉଛି ।ପାକିସ୍ତାନର ପୂର୍ବତନ କୂଟନୀତିଜ୍ଞ (ଭାରତରେ ଅବସ୍ଥାପିତ ପାକିସ୍ତାନର ପୂର୍ବତନ ଉଚ୍ଚାୟୁକ୍ତ) ଅବଦୁଲ ବାସିତ ଏକ ଭିଡିଓରେ କହିଛନ୍ତି ଯେ, “ବର୍ତ୍ତମାନ ପାକିସ୍ତାନର ଲୋକମାନେ ଭାରତର ଆଉ ଏକ ସର୍ଜିକାଲ ଷ୍ଟ୍ରାଇକ୍ କିମ୍ବା ଏୟାର ଷ୍ଟ୍ରାଇକ୍ ବିଷୟରେ ଆଲୋଚନା କରୁଛନ୍ତି ଓ ଏହାକୁ ନେଇ ଆଶଙ୍କାରେ ଅଛନ୍ତି । 

କିନ୍ତୁ ମୁଁ ଭାବୁଛି ସେମାନେ ବର୍ତ୍ତମାନ ଏହା କରିବେ ନାହିଁ କାରଣ ସେମାନେ ଚଳିତ ବର୍ଷ ଏସସିଓ ବୈଠକ ଏବଂ ଜି-୨୦ ଅଧ୍ୟକ୍ଷତା କରୁଛନ୍ତି।  ସେ ଆହୁରି ମଧ୍ୟ କହିଛନ୍ତି ଯେ ଆସନ୍ତା ବର୍ଷ ନିର୍ବାଚନ ସମୟରେ ଭାରତ ଏହାକୁ ପୁଣି ଥରେ କରିପାରିବ ଏବଂ ଏହା ଭାରତରେ ନିର୍ବାଚନ ପୂର୍ବରୁ ହୋଇପାରେ । ଅବଦୁଲ ବାସିତ ପୁଞ୍ଚରେ ହୋଇଥିବା ଭୟଙ୍କର କାର୍ଯ୍ୟକୁ ଯଥାର୍ଥ ପ୍ରମାଣିତ କରିବାକୁ ଚେଷ୍ଟା କରିଥିଲେ, ଯେଉଁଥିରେ ୫ ଜଣ ସେନା ଯବାନ ସହିଦ ହୋଇଥିଲେ। ଯିଏ ଏପରି କରିଛି, ମୁଜାହିଦ୍ଦିନ ହେଉ କି ଅନ୍ୟ କେହି, ସେମାନେ ସାଧାରଣ ନାଗରିକଙ୍କୁ ନୁହେଁ, ସେନାକୁ ଟାର୍ଗେଟ କରିଛନ୍ତି। ସେମାନେ ଏକ ବୈଧ ସଂଗ୍ରାମରେ ନିୟୋଜିତ ଅଛନ୍ତି। ପାକିସ୍ତାନର ଏହି ପୂର୍ବତନ କୂଟନୀତିଜ୍ଞ ଆହୁରି ମଧ୍ୟ କହିଛନ୍ତି ଯେ  ପାକିସ୍ତାନର ଶକ୍ତି କଣ ତାହା ଭାରତ ଜାଣେ ।