ମଣିପୁରରେ ଜଳୁଛି ହିଂସାର ନିଆଁ । ବିଜେପି ବିଧାୟକଙ୍କୁ ଆକ୍ରମଣ । ୨୦ ହଜାର ଲୋକଙ୍କୁ ସୁରକ୍ଷିତ ସ୍ଥାନକୁ ନିଆଗଲା

ଇମ୍ପାଲ, ମଣିପୁରରେ ଶାନ୍ତ ହୋଇନି ହିଂସାର ନିଆଁ । ବିଭିନ୍ନ ଜିଲ୍ଲାରେ କର୍ଫ୍ୟୁ ଲାଗିଥିବା ବେଳେ ଇଣ୍ଟରନେଟ ସେବା ବନ୍ଦ ରହିଛି ଏବଂ ସୁଟ ଆଟ ସାଇଟ ଅର୍ଡର ମଧ୍ୟ ଦିଆଯାଇଛି । ତଥାପି ବିଭିନ୍ନ ସ୍ଥାନରେ ପୋଡ଼ାଜଳା ଏବଂ ହିଂସା ଦେଖିବାକୁ ମିଳିଛି । ସେପଟେ ଦଙ୍ଗାକାରୀ  ବିଜେପି ବିଧାୟକ ଭୁଙ୍ଗଜାଗିନ ଭାଲଟେଙ୍କୁ ଆକ୍ରମଣ କରିଛନ୍ତି । ସେ ଗୁରୁତର ଥିବା ବେଳେ ତାଙ୍କ ଅବସ୍ଥା ସଂକଟାପନ୍ନ ରହିଛି । ମୁଖ୍ୟମନ୍ତ୍ରୀ ଏନ ବୀରେନ ସିଂହଙ୍କ ଅଧ୍ୟକ୍ଷତାରେ ଅନୁଷ୍ଠିତ ହୋଇଥିବା ଗୁରୁତ୍ବପୂର୍ଣ୍ଣ ବୈଠକରେ ଯୋଗଦେବାକୁ ରାଜ୍ୟ ସଚିବାଳୟକୁ ଯାଇଥିଲେ । ସେଠାରୁ ସେ ଫେରିବା ବେଳେ ଇମ୍ଫାଲ ରାଜରାସ୍ତାରେ କିଛି ଲୋକ ତାଙ୍କୁ ଆକ୍ରମଣ କରିଥିଲେ । 

ମଣିପୁରରେ ଚାଲିଥିବା ଆଦିବାସୀ-ଅଣଆଦିବାସୀ ହିଂସାକୁ ଦମନ କରିବାକୁ ସରକାର ଏପର୍ଯ୍ୟନ୍ତ ୧୪ କମ୍ପାନୀ ଅର୍ଦ୍ଧସାମରିକ ବାହିନୀ (ଆରଏଏଫ୍, ସିଆରପିଏଫ୍, ବିଏସ୍ଏଫ୍) ବହୁ ସଂଖ୍ୟାରେ ମୁତୟନ କରିଛନ୍ତି । ଏହା ସହିତ ଆହୁରି ଅଧିକ ଅର୍ଦ୍ଧସାମରିକ ବାହିନୀ ପଠାଯିବାକୁ ନିର୍ଦ୍ଦେଶ ଦିଆଯାଇଛି । ଅନ୍ୟପକ୍ଷରେ ପ୍ରଶାସନ ପକ୍ଷରୁ ହିଂସାଗ୍ରସ୍ତ ଅଂଚଳରୁ ଲୋକଙ୍କୁ ଉଦ୍ଧାର କରି ସୁରକ୍ଷିତ ସ୍ଥାନକୁ ନିଆଯାଉଛି । ବର୍ତ୍ତମାନ ସୁଦ୍ଧା ମଣିପୁରରୁ ୧୫ରୁ ୨୦ ହଜାର ଲୋକଙ୍କୁ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରାଯାଇଛି। ସେପଟେ ହିଂସାଗ୍ରସ୍ତ ସ୍ଥାନରୁ ସାଧାରଣ ଲୋକଙ୍କୁ ଉଦ୍ଧାର କରାଯାଉଛି । ଭାରତୀୟ ସେନା ଏବଂ ଆସାମ ରାଇଫଲର ଯବାନ ସ୍ଥିତି ସୁଧାରିବା ପାଇଁ ଜୋରଦାର ପ୍ରୟାସ ଚଳାଇଛନ୍ତି । ସେପଟେ ହିଂସାଗ୍ରସ୍ତ ଜିଲ୍ଲାର ହଜାରେ ଲୋକ କାଛର ଜିଲ୍ଲାକୁ ପ୍ରବେଶ କରିଛନ୍ତି । ସେମାନଙ୍କୁ ବିଭିନ୍ନ ଆଶ୍ରୟସ୍ଥଳରେ ରଖାଯାଇଛି ।

ଅନ୍ୟପକ୍ଷରେ ୨୩ଟି ସମ୍ବେଦନଶୀଳ ଥାନାକୁ ସୁରକ୍ଷା ବାହିନୀ ଚିହ୍ନଟ କରିଛି । ସେଠାରେ କେନ୍ଦ୍ରୀୟ ଫୋର୍ସ ମୁତୟନ କରିବା ସହ ବରିଷ୍ଠ ପୁଲିସ ଅଧିକାରୀମାନେ ଦାୟିତ୍ୱ ତୁଲାଉଛନ୍ତି । ପରିସ୍ଥିତିରେ ଉନ୍ନତି ପରିଲକ୍ଷିତ ହେବା ସହ ଜନସାଧାରଣଙ୍କୁ ସହଯୋଗ କରିବାକୁ ନିବେଦନ କରାଯାଇଛି । ହିଂସାବେଳେ ୭-୮ଟି ପୁଲିସ ପୋଷ୍ଟରୁ ଲୋକମାନେ ଲୁଟି ନେଇଥିବା ଅସ୍ତ୍ରଶସ୍ତ୍ରକୁ ଯଥାଶୀଘ୍ର ଫେରାଇଦେବାକୁ କରିବାକୁ ଜନସାଧାରଣଙ୍କୁ ନିବେଦନ କରାଯାଇଛି । ଯେଉଁମାନେ ଅସ୍ତ୍ରଶସ୍ତ୍ର ଫେରାଇଦେବେ ସେମାନଙ୍କ ପ୍ରତି କୋହଳ ଆଭିମୁଖ୍ୟ ଗ୍ରହଣ କରାଯିବ । ଯେଉଁମାନେ ଅସ୍ତ୍ରଶସ୍ତ୍ର ଜମା କରିବାରେ ବିଫଳ ହେବେ ସେମାନଙ୍କୁ ଗୁରୁତର ଆଇନଗତ ପରିଣାମ ଭୋଗିବାକୁ ପଡ଼ିବ। ଏହା ସହ ଅସ୍ତ୍ରଶସ୍ତ୍ର ଆତ୍ମସମର୍ପଣ କରିବାରେ ବିଫଳ ହେଲେ ମାମଲାକୁ ମଧ୍ୟ ଏନଆଇଏକୁ ହସ୍ତାନ୍ତର କରାଯାଇପାରେ ବୋଲି ଚେତାବନୀ ଦିଆଯାଇଛି ।