ଗଞ୍ଜେଇ ଚାଷ ବିରୁଦ୍ଧରେ ଚାଲିଥିବା ଅଭିଯାନର ସମୀକ୍ଷା କଲେ ରାଜ୍ୟ ଅବକାରୀ କମିଶନର ଆଶିଷ ସିଂହ

ଭୁବନେଶ୍ବର, ରାଜ୍ୟ ଅବକାରୀ କମିଶନର ଆଶିଷ ସିଂହ ଲଗାତାର ଦୁଇଦିନ ଧରି ରାଜ୍ୟର ଚାରିଟି ଜିଲ୍ଲା ଗସ୍ତ କରିବା ସହିତ ସେଠାରେ । ଗଞ୍ଜେଇ ଚାଷ ବିରୁଦ୍ଧରେ ଚାଲିଥିବା ଅଭିଯାନର ସମୀକ୍ଷା କରିଛନ୍ତି । ସମୀକ୍ଷା ସମୟରେ ଜଣାପଡିଛି ଯେ ଚାରି ଜିଲ୍ଲା ଗଜପତି, ରାୟଗଡା, କୋରାପୁଟ ଓ ମାଲକାନଗିରିରେ ଚଳିତବର୍ଷ ବର୍ଭମାନ ସୁଦ୍ଧା ୭୮୬ ଏକରରୁ ଉଦ୍ଧ ଜମିରୁ ୧୩ଲକ୍ଷ ଗଞ୍ଜେଇ ଗଛ ନଷ୍ଟ କରାଯାଇ ସାରିଲାଣି ।

କମିଶନଙ୍କ ଗସ୍ତର ଅନୁଯାୟୀ ଗଜପତି ଜିଲ୍ଲାରେ ସର୍ବାଧୂକ ୩୮ ୮ ଏକର ଜମିରୁ ୭,୭୬, ୬ ୨୦ ଗଞ୍ଜେଇ ଗଛ ନଷ୍ଟ କରାଯାଇଥିବାବେଳେ ମାଲକାନଗିରି ଜିଲ୍ଲାରେ ୧୯୪ ଏକର ଜମିରୁ ୨,୮୬, ୨୦୦ଟି, କୋରାପୁଟ ଜିଲ୍ଲାରେ ୧୬୧ ଏକର ଜମିରୁ ୧,୯୪, ୮୯୦ଟି ଓ ରାୟଗଡା ଜିଲ୍ଲାରେ ୪୩ ଏକର ଜମିରେ ହୋଇଥିବା ୪୩ହଜାର ଗଞ୍ଜେଇ ଗଛକୁ ଠାବ ସହିତ ନଷ୍ଟ କରାଯାଇଛି । ଅବକାରୀ କମିଶନର ଚଳିତ ମାସ ୨୨ ଓ ୨୩ ତାରିଖରେ ଗଜପତି, ରାୟଗଡା ଓ କୋରାପୁଟ ଜିଲ୍ଲା ଗସ୍ତ କରିବା ସମୟରେ ଏହିସବୁ ଜିଲ୍ଲା ସମେତ ନବରଙ୍ଗପୁର ଓ ମାଲକାନଗିରି ଜିଲ୍ଲାର ମଧ୍ୟ ସ୍ଥିତି ପରଖୁଥିଲେ । କମିଶନର ଶ୍ରୀ ସିଂହ ଗଜପତି, ରାୟଗଡା ଓ କୋରାପୁଟ ଜିଲ୍ଲାର ଜିଲ୍ଲାପାଳ, ଏସ୍‌ପି, ଡିଏଫ୍ଓ ଓ ଅବକାରୀ ଅଧୀକ୍ଷକମାନଙ୍କ ସହିତ ସେହିସବୁ ଜିଲ୍ଲାରେ ଗଞ୍ଜେଇ ଚାଷ ସହିତ ଅନ୍ୟାନ୍ୟ ନିଶା କାରବାର ସ୍ଥିତିର ସମୀକ୍ଷା କରିଥିଲେ । ବିଶେଷକରି ଏହିସବୁ ଜିଲ୍ଲାରେ ଗଞ୍ଜେଇ ଗଛକୁ କିଭଳି ନଷ୍ଟ କରାଯାଇ ପାରିବ ଓ ସ୍ଥାନୀୟ ଲୋକଙ୍କୁ କିଭଳି ଏ ସଂକ୍ରାନ୍ତରେ ସଚେତନ କରାଯାଇ ପାରିବ ତାହା ଉପରେ କମିଶନର ଗୁରୁତ୍ବ ଦେଇଥିଲେ ।

ଗଞ୍ଜେଇ ଚାଷରେ ଜଡିତ ବ୍ୟକ୍ତିମାନଙ୍କ ହାତକୁ ବିକଳ୍ପ ରୋଜଗାର ଯୋଗାଇବା ଉପରେ ଅବକାରୀ କମିଶନର ଗୁରୁତ୍ବ ଆରୋପ କରିଛନ୍ତି । କାରଣ ଆଦିବାସୀ ଅଧୁଷିତ ଇଲାକାର ଲୋକେ ଗଞ୍ଜେଇ ଚାଷ ବେଆଇନ୍ ଓ ଏଥିପାଇଁ ଥିବା ଜେଲ ଜୋରିମାନାର ଭୟାବହତା ସଂକ୍ରାନ୍ତରେ ଜାଣିବା ସହିତ ବିକଳ୍ପ କର୍ମସଂସ୍ଥାନ ପାଇଲେ ସେମାନେ ଆଉ ଏହି ବେଆଇନ୍ ଚାଷ ପ୍ରତି ମନ ବଳାଇବେ ନାହିଁ । ଅବକାରୀ କମିଶନରଙ୍କ କୋରାପୁଟ ଗସ୍ତ ସମୟରେ ଡିଆଇଜି ପୁଲିସ ଆଲୋଚନା ସମୟରେ ଉପସ୍ଥିତ ରହିବା ସହିତ ଗଞ୍ଜେଇ ଚାଷର ମୂଳୋତ୍ପାଟନ ପାଇଁ ଆଇନ୍ ଅନୁଯାୟୀ ସମସ୍ତ ପ୍ରକାର ସହାୟତା ଯୋଗାଇବାକୁ ପ୍ରତିଶ୍ରୁତି ଦେଇଛନ୍ତି । 

ସେହିଭଳି ଗଞ୍ଜେଇ ଚାଷ ଅଞ୍ଚଳରେ ଚଢାଉକୁ ବ୍ୟାପକ କରି କିଭଳି ନଷ୍ଟ କରାଯିବ ସେ ସଂକ୍ରାନ୍ତରେ ଅବକାରୀ ଓ ପୁଲିସ ବାହିନୀକୁ ସଚେତନ କରାଯିବା ସହିତ ଆବଶ୍ୟକ ସ୍ଥଳେ ଏଥିରେ ଜଡିତ ଲୋକଙ୍କ ବିରୁଦ୍ଧରେ ମାମଲା ରୁଜୁ ପାଇଁ କୁହାଯାଇଛି । ଗଞ୍ଜଇ ଚାଷରେ ଲିପ୍ତ ବ୍ୟକ୍ତିଙ୍କ ହାତକୁ ବିକଳ୍ପ କର୍ମସଂସ୍ଥାନ ଯୋଗାଇବାପାଇଁ ତଳ ସ୍ତରରେ ଯୋଜନା ପ୍ରସ୍ତୁତ ସହିତ ସେମାନଙ୍କୁ ବିଭିନ୍ନ ପ୍ରକାର ଅର୍ଥକରୀ ଚାଷ ଯଥା କୁକୁଡ଼ା ଚାଷ, ଛେଳି ଚାଷ, ଫୁଲଚାଷ ଆଦି ଯୋଗାଇ ଦେବାକୁ କୁହାଯାଇଛି ।

ସେହିଭଳି ବ୍ଲକ, ପଞ୍ଚାୟତ ଓ ଗ୍ରାମ ସ୍ତରରେ କମିଟିମାନ ଗଠନ କରି ଗଞ୍ଜେଇ ଚାଷ ହେଉଥିବା ଅଞ୍ଚଳରେ ଏହାର ଭୟାବହତା ଓ ଆଇନ୍‌ଗତ ଦିଗ ସଂକ୍ରାନ୍ତରେ ଲୋକଙ୍କୁ ସଚେତନ ପାଇଁ ଜିଲ୍ଲା ପ୍ରଶାସନକୁ କୁହାଯାଇଛି । କୌଣସି ପ୍ରକାରେ ଏହିସବୁ ଜିଲ୍ଲାରେ ଗଞ୍ଜେଇ ଚାଷକୁ ସମୂଳେ ନଷ୍ଟ କରିବା ଉପରେ ଅବକାରୀ କମିଶନର ଗୁରୁତ୍ୱ ଦେବା ସହିତ କାର୍ଯ୍ୟାନୁଷ୍ଠାନ ସମୟରେ ସାଧାରଣ ଲୋକେ ଯେଭଳି ହଇରାଣ ନହୁଅନ୍ତି ତାହା ଉପରେ ଧ୍ୟାନ ଦେବାକୁ କହିଛନ୍ତି ।