ଜାତୀୟ ସଶସ୍ତ୍ର ବାହିନୀ ପତାକା ଦିବସରେ ଗୃହରାଷ୍ଟ୍ର ମନ୍ତ୍ରୀ କ୍ୟାପଟେନ୍‌ ଦିବ୍ୟଶଙ୍କର ମିଶ୍ରଙ୍କୁ ପତାକା ପ୍ରଦାନ

ଭୁବନେଶ୍ୱର, ଆଜି ପୂର୍ବାହ୍ନରେ ଜାତୀୟ ସଶସ୍ତ୍ରବାହିନୀ ପତାକା ଦିବସ ଉପଲକ୍ଷେ ବିଧାନସଭା କାର୍ଯ୍ୟାଳୟ ପ୍ରକୋଷ୍ଠରେ ଶକ୍ତି, ଶିଳ୍ପ, ଏମ୍‌ଏସ୍‌ଏମ୍‌ଇ ଓ ଗୃହରାଷ୍ଟ୍ର ମନ୍ତ୍ରୀ କ୍ୟାପଟେନ୍‌ ଦିବ୍ୟଶଙ୍କର ମିଶ୍ରଙ୍କୁ କମୋଡର ଘନଶ୍ୟାମ୍ ଓଝା ସଶସ୍ତବାହିନୀ ପତାକା ପ୍ରଦାନ କରିଥିଲେ । ରାଜ୍ୟ ସୈନିକ ବୋର୍ଡ ଆନୁକୂଲ୍ୟରେ ପ୍ରତିବର୍ଷ ଏହି କାର୍ଯ୍ୟକ୍ରମ । ଆୟୋଜନ କରାଯାଇ ଦିବଂଗତ ସୈନିକଙ୍କ ପରିବାରବର୍ଗଙ୍କ ଆର୍ଥିକ ସହାୟତା ନିମନ୍ତେ ଦାନ ପାଣ୍ଠି ସଂଗ୍ରହ ଅଭିଯାନ କରାଯାଇଥାଏ । 

ଏହା ବ୍ୟତୀତ ଆଘାତପ୍ରାପ୍ତ ସୈନିକଙ୍କ ଚିକିତ୍ସା, ଯୁଦ୍ଧବିଧବା, ଅନାଥ ଶିଶୁ, ଅକର୍ମଣ୍ୟ ସୈନିକ, ବୁଦ୍ଧ ଓ ଦୁର୍ବଳ ସୈନିକମାନଙ୍କ ସହାୟତାରେ ଏହି ଅର୍ଥ ବିନିଯୋଗ କରାଯାଇଥାଏ । ଏହି ଅବସରରେ ଅନୌପଚାରିକ ଭାବେ ରାଜ୍ୟ ସୈନିକ ବୋର୍ଡ ନିମନ୍ତେ ଭୁବନେଶ୍ୱରଠାରେ ଏକ ଦପ୍ତର ଖୋଲିବା ସକାଶେ ରାଜ୍ୟ ସରକାରଙ୍କଠାରୁ ଖଣ୍ଡେ ଜମି ପାଇଁ ଆବେଦନ କରିବାକୁ ବୋର୍ଡ ତରଫରୁ ପରାମର୍ଶ ମଗାଯାଇଥିଲା । ଆଗାମୀ ଦିନରେ ଅବସରପ୍ରାପ୍ତ ସୈନିକମାନଙ୍କୁ ନେଇ ଏକ ବୈଠକ ଆହୁତ କରିବା ଏବଂ ସୈନିକ ବୋର୍ଡର ପରିସରକୁ ଆହୁରି ବ୍ୟାପକ କରିବାରେ ମନ୍ତ୍ରୀ କ୍ୟାପଟେନ୍‌ ଦିବ୍ୟଶଙ୍କର ମିଶ୍ର ସହଯୋଗ ପ୍ରଦାନ କରିବେ ବୋଲି ପ୍ରତିଶ୍ରୁତି ଦେଇଥିଲେ ।