ସମ୍ ହସ୍ପିଟାଲରେ ଦିବ୍ୟାଙ୍ଗ ଶିଶୁଙ୍କୁ ମାଗଣା କୋଭିଡ୍ ଭାକ୍ସନ୍ ପ୍ରଦାନ

ଭୁବନେଶ୍ୱର, କରୋନା ମହାମାରୀକୁ ପ୍ରତିହିତ କରିବା ନିମନ୍ତେ ସବୁବେଳେ ଆଗଧାଡିରେ ରହିଥିବା ଆଇଏଏସ୍ ଆଣ୍ଡ ସମ୍ ହସ୍ପିଟାଲ୍ ପକ୍ଷରୁ ଦିବ୍ୟାଙ୍ଗ ଶିଶୁଙ୍କୁ ମାଗଣା କୋଭିଡ୍ ଭାକ୍ସନ୍ ପ୍ରଦାନ କରାଯାଇଛି । ବୁଧବାର ୧୫ ରୁ ୧୮ ବର୍ଷ ବୟସର ପିଲାମାନଙ୍କୁ ସମ୍ ହସ୍ପିଟାଲରେ ମାଗଣା କୋଭିଡ୍ ଭାକ୍ସନ୍ ପ୍ରଦାନ ପ୍ରକ୍ରିୟା ଆରମ୍ଭ କରାଯାଇଥିବା ବେଳେ ପ୍ରଥମ ଦିନରେ ଦିବ୍ୟାଙ୍ଗ ମାନଙ୍କୁ ଏହି ଭାକ୍ସନ୍ ପ୍ରଦାନ କରାଯାଇଛି । ଆଇସିଆଇସିଆଇ ଫାଉଣ୍ଡେସନ୍‌ର ସହଯୋଗରେ ଏହି ପ୍ରକ୍ରିୟା ଆରମ୍ଭ କରାଯାଇଥିବା ବେଳେ ୧୫ ରୁ ୧୮ ବୟସର ପ୍ରାୟ ହଜାର ଜଣଙ୍କୁ ଏହି ଭାକ୍ସନ୍ ପ୍ରଦାନ କରାଯିବାର ଯୋଜନା ରହିଛି । 

ଭାକ୍ସନ୍ ପ୍ରଦାନ କାର୍ଯ୍ୟକ୍ରମରେ ଆଇଏଏସ୍ ଆଣ୍ଡ ସମ୍ ହସ୍ପିଟାଲର ମେଡିକାଲ ସୁପରିଟେଣ୍ଡେଟ୍ ପ୍ରଫେସର ପୁଷ୍ପରାଜ ସାମନ୍ତସିଂହାର, ଶିଶୁରୋଗ ବିଭାଗ ମୁଖ୍ୟ ପ୍ରଫେସର ମମତାଦେବୀ ମହାନ୍ତି, କମ୍ୟୁନିଟି ମେଡିସିନ୍ ବିଭାଗର ପ୍ରଫେସର ଲିପିଲେଖା ପଟ୍ଟନାୟକ ଓ ଅନ୍ୟାନ୍ୟ କର୍ମକର୍ତା ଉପସ୍ଥିତ ଥିଲେ । ଯେଉଁ ଅଭିଭାବକମାନେ ନିଜ ପିଲାମାନଙ୍କୁ ଭାକ୍ସନ୍ ଦେଇପାରି ନାହାନ୍ତି ସେମାନେ ସମ୍ ହସ୍ପିଟାଲରେ ଆସି ଭାକ୍ସନ୍ ନେଇପାରିବେ ବୋଲି ହସ୍ପିଟାଲ୍ ପକ୍ଷରୁ କୁହାଯାଇଛି ।