ରାଜଭବନରେ ଭାରତମାତାଙ୍କ ମୂର୍ତ୍ତିର ଅନାବରଣ ଉତ୍ସବ

ଭୁବନେଶ୍ୱର, ସ୍ଵାଧୀନତାର ଅମୃତ ମହୋତ୍ସବ ଅବସରରେ ପବିତ୍ର ସ୍ଵାଧୀନତା ଦିବସରେ ରାଜଭବନରେ ସ୍ଥାପିତ ଭାରତମାତାଙ୍କ ମୂର୍ତ୍ତିକୁ ରାଜ୍ୟପାଳ ପ୍ରଫେସର ଗଣେଶୀ ଲାଲ ଅନାବରଣ କରିଛନ୍ତି । ମୂର୍ତ୍ତି ଅନାବରଣ କରି ରାଜ୍ୟପାଳ ପ୍ରଫେସର ଲାଲ ଭାରତକୁ କେବଳ ମାତ୍ର ଭୁଗୋଳ ନୁହେଁ, ଜୀବନ୍ତ ଦେବୀ ଏବଂ ଆଦିଶକ୍ତିଙ୍କ ଏକ ରୂପ ଭାବେ ଅଭିହିତ କରିଛନ୍ତି । ସମଗ୍ର ବିଶ୍ଵର କଲ୍ୟାଣ ଉଦେଶ୍ୟରେ ମାତାଙ୍କର ଆବିର୍ଭାବ ହୋଇଛି ବୋଲି ଉଲ୍ଲେଖ କରି ପ୍ରଫେସର ଲାଲ ଏହି ମୂର୍ତ୍ତି ଆମ ସମସ୍ତଙ୍କୁ ଅନୁପ୍ରାଣିତ ଓ ଅନୁପ୍ରେରିତ କରିବ ବୋଲି ଆଶା ପ୍ରକଟ କରିଛନ୍ତି ।

ଅନାବରଣ ଉତ୍ସବରେ ପଦ୍ମଭୂଷଣ ବିଜୟିନୀ ପ୍ରତିଭା ରାୟଙ୍କ ସହ ପଦ୍ମଶ୍ରୀପ୍ରାପ୍ତା ପ୍ରିୟମ୍ବଦା ମହାନ୍ତି ହେଜମାଦି, ତୁଳସୀ ମୁଣ୍ଡା, କୁକୁମ୍ ମହାନ୍ତି, ଇଲିଆନା ସିତାରିଷ୍ଟ, ଅରୁଣା ମହାନ୍ତି, ସାବରମତୀ ଓ ଶ୍ୟାମାମଣି ଦେବୀ ଅତିଥି ରୂପେ ଯୋଗଦେଇଥିଲେ । ଶିଳ୍ପୀ ବିଶ୍ୱନାଥ ରଣା ଭାରତମାତାଙ୍କ ଏହି ମୂର୍ତ୍ତି ନିର୍ମାଣ କରିଛନ୍ତି । ରାଜ୍ୟପାଳଙ୍କ ପ୍ରମୁଖ ଶାସନ ସଚିବ ଶାଶ୍ବତ ମିଶ୍ର ଓ ରାଜଭବନର ଅକାରୀ ତଥା କର୍ମଚାରୀମାନେ କାର୍ଯ୍ୟକ୍ରମରେ ଉପସ୍ଥିତ ଥିଲେ ।