ଆତଙ୍କବାଦୀ କାର୍ଯ୍ୟକଳାପ ତୁଳନାରେ ‘ହିନ୍ଦୁ ଆତଙ୍କବାଦ’ ଭାରତ ପାଇଁ ସବୁଠାରୁ ବିପଦଜନକ : ରାହୁଲ ଗାନ୍ଧୀ

ବେଙ୍ଗାଲୁରୁ, କର୍ଣ୍ଣାଟକ ବିଧାନସଭା ନିର୍ବାଚନ ପୂର୍ବରୁ ବିଜେପି ଏବଂ କଂଗ୍ରେସ ସହ ସବୁ ରାଜନୈତିକ ଦଳ ଭୋଟରଙ୍କୁ ନିଜ ଆଡ଼କୁ ଆକୃଷ୍ଟ କରିବା ପାଇଁ ଉଦ୍ୟମ କରୁଛନ୍ତି । କର୍ଣ୍ଣାଟକରେ ବିଧାନସଭା ନିର୍ବାଚନ ପୂର୍ବରୁ ବିଜେପି ଓ କଂଗ୍ରେସ ମଧ୍ୟରେ ଆରୋପ-ପ୍ରତ୍ୟାରୋପ ଲାଗି ରହିଛି। ବିଶେଷ କରି କଂଗ୍ରେସ ଇସ୍ତାହାରରେ ବଜରଙ୍ଗ ଦଳ ଉପରେ ପ୍ରତିବନ୍ଧକ ଲଗାଯିବା ନିଷ୍ପତ୍ତିକୁ ନେଇ ବିଜେପି ଏବେ କଂଗ୍ରେସକୁ ଟାର୍ଗେଟ କରୁଛି ।  ଏନେଇ ବାଙ୍ଗାଲୋର ଦକ୍ଷିଣରୁ ଲୋକସଭା ସାଂସଦ ଥିବା ତେଜସ୍ୱୀ ସୂର୍ଯ୍ୟା କଂଗ୍ରେସ ଉପରେ କଡ଼ା ଆକ୍ରମଣ କରିଛନ୍ତି। ଏକ ସାକ୍ଷାତକାରରେ ତେଜସ୍ୱୀ ସୂର୍ଯ୍ୟା କହିଛନ୍ତି ଯେ କଂଗ୍ରେସର ମାନସିକତା ହିନ୍ଦୁ ବିରୋଧୀ, ତେଣୁ ସେମାନେ ବଜରଙ୍ଗ ଦଳକୁ ଆତଙ୍କବାଦୀ ସଂଗଠନ ପିଏଫଆଇ ସହିତ ତୁଳନା କରିଥିଲେ। 

ତେଜସ୍ୱୀ କହିଛନ୍ତି ଯେ ‘ବଜରଙ୍ଗ ଦଳ ଏବଂ ପିଏଫଆଇ ଉପରେ ପ୍ରତିବନ୍ଧକ ଲଗାଯିବା ସମାନ କଥା ନୁହେଁ। ଏହା କଂଗ୍ରେସର ହିନ୍ଦୁ ବିରୋଧୀ ମାନସିକତାକୁ ଦର୍ଶାଉଛି। ଯେତେବେଳେ ୨୬/୧୧ ଆତଙ୍କବାଦୀ ଆକ୍ରମଣ ହୋଇଥିଲା, ସେତେବେଳେ ରାହୁଲ ଗାନ୍ଧୀ ଆମେରିକାର କନସୁଲେଟ୍ ଏବଂ ଆମେରିକା ସରକାରଙ୍କ ଅନ୍ୟ ସଦସ୍ୟଙ୍କ ସହ କଥାବାର୍ତ୍ତା ବେଳେ କହିଥିଲେ ଯେ ଅନ୍ୟ ଆତଙ୍କବାଦୀ କାର୍ଯ୍ୟକଳାପ ତୁଳନାରେ ‘ହିନ୍ଦୁ ଆତଙ୍କବାଦ’ଭାରତ ପାଇଁ ସବୁଠାରୁ ବିପଦଜନକ। କଂଗ୍ରେସ ପାର୍ଟି ନିଜ ସଂକଳ୍ପପତ୍ରରେ ବଜରଙ୍ଗବଲୀଙ୍କୁ ତାଲାରେ ବନ୍ଦୀ କରିବାକୁ ନିଷ୍ପତ୍ତି ନେଇଛି । କଂଗ୍ରେସ ପ୍ରଥମେ ଶ୍ରୀ ରାମଙ୍କୁ ତାଲାରେ ବନ୍ଦ କରିଥିଲା ଆଉ ଏବେ ଜୟ ବଜରଙ୍ଗବଲୀ କହୁଥିବା ଲୋକଙ୍କୁ ତାଲାରେ ବନ୍ଦୀ କରିବାକୁ ସଂକଳ୍ପ ନେଇଛି।

ତେଜସ୍ୱୀ କହିଛନ୍ତି ଯେ ବଜରଙ୍ଗ ଦଳ ଏକ ସାଂସ୍କୃତିକ ସଂଗଠନ, ଯାହାକୁ ସେମାନେ ଆତଙ୍କବାଦୀ ସଂଗଠନ ପିଏଫଆଇ ସହିତ ତୁଳନା କରୁଛନ୍ତି । କେନ୍ଦ୍ର ସରକାର ପୂର୍ବରୁ ପିଏଫଆଇ ଉପରେ ପ୍ରତିବନ୍ଧକ ଲଗାଇ ସାରିଛନ୍ତି। କଂଗ୍ରେସର ମାନସିକତା ହିନ୍ଦୁ ବିରୋଧୀ। ବଜରଙ୍ଗ ଦଳ ହିନ୍ଦୁତ୍ୱକୁ ବଞ୍ଚାଇବା ପାଇଁ କାର୍ଯ୍ୟ କରନ୍ତି ଏବଂ ସର୍ବଦା ହିନ୍ଦୁତ୍ୱ ସହିତ ଛିଡା ହୁଅନ୍ତି । ସେ କହିଛନ୍ତି ଯେ କଂଗ୍ରେସ ସରକାର କ୍ଷମତାରେ ଥିବାବେଳେ ବଜରଙ୍ଗ ଦଳ ବିରୋଧରେ ମିଛରେ ବିଭିନ୍ନ ଅଭିଯୋଗ ଆଣିଥିଲେ । ବଜରଙ୍ଗ ଦଳ ପରି ଏକ ସାଂସ୍କୃତିକ ସଂଗଠନର ନୈତିକତାକୁ ଭ୍ରଷ୍ଟ କରିବାକୁ ଏହା ଏକ ପ୍ରୟାସ । ପିଏଫଆଇ ଏବଂ ଏସଡ଼ିପିଆଇ ପରି ସଂଗଠନଗୁଡ଼ିକ ଦେଶର ସମ୍ମାନକୁ ନଷ୍ଟ କରୁଛନ୍ତି । ଏହି ସଂଗଠନଗୁଡ଼ିକୁ ବଜରଙ୍ଗ ଦଳ ପରି ଏକ ସାଂସ୍କୃତିକ ସଂଗଠନ ସହିତ ତୁଳନା କରାଯାଇପାରିବ ନାହିଁ ।