ରୋଜଗାର ଅଛି ନା ଚାକିରି ମିଳୁଛି । ଚୀନରେ ରେକର୍ଡ ସ୍ତରରେ ବେରୋଜଗାରୀ

ନୂଆଦିଲ୍ଲୀ, ଦୁନିଆର ଅନେକ ଦେଶ ଧୀରେ ଧୀରେ କରୋନା କବଳରୁ ମୁକୁଳି ଆସିଛନ୍ତି, କିନ୍ତୁ ଏହାର କୁପ୍ରଭାବରୁ ଚୀନ ଏବେବି ବାହାରି ଆସିପାରି ନାହିଁ । ଦୁନିଆର ଦ୍ୱିତୀୟ ସବୁଠୁ ବଡ଼ ଅର୍ଥବ୍ୟବସ୍ଥା ଉପରୁ ଆର୍ଥିକ ସଂକଟ ଦୂର ହେଉ ନାହିଁ । ନ୍ୟାସନାଲ ବ୍ୟୁରୋ ଅଫ୍ ଷ୍ଟାଟିଷ୍ଟିକ୍ସର କହିବା ଅନୁସାରେ ଚୀନରେ ବେରୋଜଗାରୀ ହାର ରେକର୍ଡ ୨୦.୮ ସ୍ତରରେ ପହଞ୍ଚିଛି । ସ୍ଥିତି ଏପରି ହୋଇଛି ଯେ ଯୁବକଙ୍କ ପାଖରେ ନା ରୋଜଗାର ଅଛି ନା ଚାକିରି ମିଳୁଛି । ୧୬ରୁ ୨୪ ବର୍ଷ ବୟସର ଚୀନ ଯୁବକଙ୍କ ମଧ୍ୟରେ ବେରୋଜଗାରୀ ସବୁଠୁ ଅଧିକ ରହିଛି ।

ନ୍ୟାସନାଲ ବ୍ୟୁରୋ ଅଫ୍ ଷ୍ଟାଟିଷ୍ଟିକ୍ସ ନିଜ ରିପୋର୍ଟରେ କହିଛି ଯେ ୧୬ରୁ ୨୪ ବର୍ଷ ବୟସର ଚୀନ ନାଗରିକଙ୍କ ବେରୋଜଗାରୀ ହାର ବଢି ୨୦.୮ ପ୍ରତିଶତ ହୋଇଛି, ଯାହା ଏପ୍ରିଲରେ ୨୦.୪ ପ୍ରତିଶତ ଥିଲା । ଏନବିଏସ ଏକ ବୟାନରେ କହିଛି, ମୋଟ ଉପରେ ଚୀନରେ ସହରୀ ବେରୋଜଗାରୀ ହାର ୫.୨ ପ୍ରତିଶତ ରହିଛି ।

ସିଏନଏନ ଏକ ରିପୋର୍ଟ ଅନୁସାରେ, ଚୀନରେ ପ୍ରାୟ ୧.୬ କୋଟି ଛାତ୍ରଛାତ୍ରୀ ନିଜ ପାଠ ପଢା ଶେଷ କରିବା ପରେ ଚାକିରି ଖୋଜୁଛନ୍ତି । ଚୀନରେ କରୋନା ପରେ ସଦ୍ୟତମ ସ୍ଥିତି ଏପରି ହୋଇଛି ଯେ ଦେଶରେ ବଡ଼ ସଂଖ୍ୟାରେ ନିଯୁକ୍ତି ମିଳିବା କଷ୍ଟକର ହୋଇପଡ଼ିଛି । ତେବେ ସ୍ଥିତିକୁ ଦେଖି ଚୀନ ସରକାର ପ୍ରଭାବୀ ପଦକ୍ଷେପ ଗ୍ରହଣ କରୁଛନ୍ତି । ନିକଟରେ ପିପୁଲ୍ସ ବ୍ୟାଙ୍କ ଅଫ୍ ଚାଇନା ନିଜର ପ୍ରମୁଖ ନୀତି ହାରରେ ପରିବର୍ତ୍ତନ କରିଛି । ମଧ୍ୟମ ଅବଧି ଋଣ ହାରକୁ ୨.୭ ପ୍ରତିଶତରୁ କମ କରି ୨.୬୨ ପ୍ରତିଶତ କରାଯାଇଛି ।