Unnatipathe

ଭୁବନେଶ୍ୱର, ୨୮ ଫେବୃଆରୀ ୨୦୨୫

ଭୁବନେଶ୍ୱର, ୨୮ ଫେବୃଆରୀ ୨୦୨୫

ଓଡିଆ ଚଳଚ୍ଚିତ୍ର ଜଗତର ସର୍ବାଧିକ ଲୋକପ୍ରିୟ ତଥା ବରିଷ୍ଠ ଅଭିନେତା ଉତମ ମହାନ୍ତିଙ୍କ ନୂଆଦିଲ୍ଲୀ ସ୍ଥିତ ମେଦାନ୍ତ ହସ୍ପିଟାଲରେ ଚିକିତ୍ସାଧିନ ଅବସ୍ଥାରେ ଗତକାଲି ପରଲୋକ ଘଟିଛି। ମୃତ୍ୟୁ ବେଳକୁ ତାଙ୍କୁ ୬୭ବର୍ଷ ବୟସ ହୋଇଥିଲା। ତାଙ୍କ ବିୟୋଗରେ ରାଜ୍ୟ ବିଜେପି ସଭାପତି ଶ୍ରୀ ମନମୋହନ ସାମଲ ଗଭୀର ଶୋକ ବ୍ୟକ୍ତ କରିଛନ୍ତି ।

ସ୍ୱର୍ଗତଃ ମହାନ୍ତି ଜଣେ ଯୁଗଜନ୍ମା କଳାକାର ଭାବେ ଅନେକ ଚଳଚ୍ଚିତ୍ରରେ ତାଙ୍କ ନିପୁଣ ଅଭିନୟରେ ଶ୍ରେଷ୍ଠ ପୁରସ୍କାର ପ୍ରାପ୍ତ କରିବା ସହ ଅନେକ ସୁନାମ ଅର୍ଜନ କରିଥିଲେ। ତାଙ୍କର ଜୀବନ୍ତ ଅଭିନୟ ମାଧ୍ୟମରେ ଓଡିଶାବାସୀଙ୍କ ହୃଦୟରେ ସେ ଯେଉଁ ସ୍ଥାନ ଅଧିକୃତ କରିଛନ୍ତି ତାହା ଚିର କାଳ ପାଇଁ ଅମର। ଓଡିଶାରେ ଚଳଚ୍ଚିତ୍ର ମାଧ୍ୟମରେ ଦର୍ଶକଙ୍କୁ ମନୋରଞ୍ଜନର ଏକ ଖୋରାକ୍ ଯୋଗାଇଥିଲା ତାଙ୍କ ଅଭିନୟ। ସ୍ୱର୍ଗତଃ ମହାନ୍ତିଙ୍କ ବିୟୋଗ ରାଜ୍ୟ ଚଳଚ୍ଚିତ୍ର ଜଗତ ପାଇଁ ଅପୁରଣୀୟ କ୍ଷତି ବୋଲି ଶ୍ରୀ ସାମଲ କହିଛନ୍ତି। 

ସ୍ୱର୍ଗତଃ ମହାନ୍ତିଙ୍କ ଭୁବନେଶ୍ୱରସ୍ଥିତ ବାସଭବନକୁ ଯାଇ ରାଜ୍ୟ ସଭାପତି ଶ୍ରୀ ମନମୋହନ ସାମଲ, ରାଜ୍ୟ ଉପସଭାପତି ଶ୍ରୀ ଗୋଲକ ମହାପାତ୍ର, ରାଜ୍ୟ ସମ୍ପାଦକ ସରୋଜ କର, ରାଜ୍ୟ କାର୍ଯ୍ୟକାରିଣୀ ସଦସ୍ୟ ଶ୍ରୀତମ ଦାସ ଓ ପିଙ୍କି ପ୍ରଧାନଙ୍କ ସମେତ ଅନ୍ୟାନ୍ୟ ନେତୃବୃନ୍ଦ ପ୍ରାର୍ଥୀବ ଶରୀରର ଶେଷଦର୍ଶନ କରିଛନ୍ତି। 

ମହାପ୍ରଭୁ ଶ୍ରୀ ଜଗନ୍ନାଥଙ୍କ ନିକଟରେ ସ୍ୱର୍ଗତଃ ମହାନ୍ତିଙ୍କ ପରଲୋକଗତ ଆତ୍ମାର ସଦ୍‌ଗତି କାମନା କରିବା ସହିତ ତାଙ୍କର ଶୋକସନ୍ତପ୍ତ ପରିବାରବର୍ଗ ପ୍ରତି ଶ୍ରୀ ସାମଲ ସମବେଦନା ଜ୍ଞାପନ କରିଛନ୍ତି ।

ଭୁବନେଶ୍ୱର, ୨୮ ଫେବୃଆରୀ ୨୦୨୫ 

3 ଫେବୃଆରୀ 1925 ରେ ଭାରତର ପ୍ରଥମ ବିଦ୍ୟୁତ୍ ଟ୍ରେନର ଶୁଭାରମ୍ଭ ପରଠାରୁ 100 ବର୍ଷର ପ୍ରଯୁକ୍ତିବିଦ୍ୟା ବିକାଶ ଏବଂ କାର୍ଯ୍ୟକ୍ଷମ ଉତ୍କର୍ଷତାକୁ ଲକ୍ଷ୍ୟ କରି ଗର୍ବର ସହିତ ବୈଦ୍ୟୁତିକ ଟ୍ରାକ୍ସନର ଶତବାର୍ଷିକୀ ପାଳନ କରୁଛି ଭାରତୀୟ ରେଳବାଇ । ବିଗତ ଶତାବ୍ଦୀରେ, ବିଦ୍ୟୁତୀକରଣ ରେଳବାଇ କାର୍ଯ୍ୟରେ ବିପ୍ଳବ ଆଣିଛି, ଜୀବାଶ୍ମ ଇନ୍ଧନ ଉପରେ ନିର୍ଭରଶୀଳତା ହ୍ରାସ କରିବା ସହିତ ଦକ୍ଷତା, ସ୍ଥାୟୀତ୍ୱ ଏବଂ ପ୍ରଗତିକୁ ଉଲ୍ଲେଖନୀୟ ଭାବରେ ବୃଦ୍ଧି କରିଛି ।

ଏହି ଅବସରରେ ଆୟୋଜିତ ଏକ କାର୍ଯ୍ୟକ୍ରମରେ ପୂର୍ବତଟ ରେଳପଥ ମହାପ୍ରବନ୍ଧକ ଶ୍ରୀ ପରମେଶ୍ୱର ଫୁଙ୍କୱାଲ ଆଧୁନିକ ରେଳବାଇ କାର୍ଯ୍ୟରେ ସ୍ୱୟଂଚାଳିତ, ରକ୍ଷଣାବେକ୍ଷଣ ଏବଂ ନିଦାନର ଗୁରୁତ୍ୱପୂର୍ଣ୍ଣ ଭୂମିକା ଉପରେ ଆଲୋକପାତ କରିଥିଲେ। ସେ ଭାରତୀୟ ରେଳବାଇକୁ ଦ୍ରୁତ ପ୍ରଯୁକ୍ତିବିଦ୍ୟା ଉନ୍ନତି ସହିତ ଖାପ ଖୁଆଇବା ଏବଂ ଆଗାମୀ 25 ବର୍ଷ ପାଇଁ ପ୍ରସ୍ତୁତ ହେବା ଉପରେ ଗୁରୁତ୍ୱାରୋପ କରିଥିଲେ। ଶ୍ରୀ ଫୁଙ୍କୱାଲ ରେଳବାଇ ଭିତ୍ତିଭୂମି ରକ୍ଷଣାବେକ୍ଷଣରେ ଉନ୍ନତି ଆଣିବାର କାର୍ଯ୍ୟକଳାପକୁ ମଧ୍ୟ ଗୁରୁତ୍ୱାରୋପ କରିଥିଲେ ଏବଂ ଭାରତୀୟ ରେଳବାଇ ମଧ୍ୟରେ ଟ୍ରାକ୍ସନ୍ ବଣ୍ଟନ (TRD)କୁ ଏକ ରୋଲ୍ ମଡେଲ୍ ଭାବରେ ସ୍ୱୀକାର କରିଥିଲେ।

ଏହି ଅବସରରେ ପୂର୍ବତଟ ରେଳପଥର ଅତିରିକ୍ତ ମହାପ୍ରବନ୍ଧକ, ସମସ୍ତ ପ୍ରମୁଖ ବିଭାଗୀୟ ମୁଖ୍ୟ, ବରିଷ୍ଠ ଅଧିକାରୀ ମାନଙ୍କ ସହିତ ପ୍ରମୁଖ ମୁଖ୍ୟ ବୈଦ୍ୟୁତିକ ଇଞ୍ଜିନିୟର ଯୋଗ ଦେଇଥିଲେ, ଯେଉଁମାନେ ସାମୂହିକ ଭାବରେ ଭାରତରେ ରେଳ ବିଦ୍ୟୁତୀକରଣର ଉଲ୍ଲେଖନୀୟ ଯାତ୍ରାକୁ ସ୍ୱୀକୃତି ଦେଇଥିଲେ।

ଭାରତରେ ରେଳ ବିଦ୍ୟୁତୀକରଣର ମୂଳଦୁଆ 3 ଫେବୃଆରୀ 1925 ରେ ପ୍ରାରମ୍ଭ କରାଯାଇଥିଲା ଯେତେବେଳେ ଗ୍ରେଟ୍ ଇଣ୍ଡିଆନ୍ ପେନିନସୁଲା ରେଲୱେ (GIPR) ବମ୍ବେ VT (ବର୍ତ୍ତମାନ ଛତ୍ରପତି ଶିବାଜୀ ମହାରାଜ ଟର୍ମିନସ୍) ଏବଂ କୁର୍ଲା ମଧ୍ୟରେ ପ୍ରଥମ ବୈଦ୍ୟୁତିକ ଟ୍ରେନ ସେବା ପ୍ରଚଳନ କରିଥିଲା । ଏହି 16 ରୁଟ୍ କିଲୋମିଟର (RKM) ସେକ୍ସନ 1500V DC ଟ୍ରାକ୍ସନ୍ ସିଷ୍ଟମରେ ପରିଚାଳିତ ହୋଇଥିଲା ଏବଂ ବମ୍ବେର ତତ୍କାଳୀନ ରାଜ୍ୟପାଳ ସାର୍ ଲେସଲି ୱିଲସନ୍ ଙ୍କ ଦ୍ୱାରା ଏହାକୁ ଉଦଘାଟନ କରାଯାଇଥିଲା। ଏହି ମାଇଲଖୁଣ୍ଟ ସହିତ, ଭାରତ ବୈଦ୍ୟୁତିକ ଟ୍ରାକ୍ସନ୍ ଗ୍ରହଣ କରିବାରେ ବିଶ୍ୱର 24ତମ ଦେଶ ପାଲଟିଲା।

ରେଳ ବିଦ୍ୟୁତୀକରଣର ପ୍ରାରମ୍ଭିକ ପର୍ଯ୍ୟାୟ ଅନେକ ବୈଷୟିକ ଓ ପ୍ରଯୁକ୍ତିବିଦ୍ୟା ଗୁଡିକର ଚ୍ୟାଲେଞ୍ଜ ସୃଷ୍ଟି କରିଥିଲା। ତଥାପି, ନିରନ୍ତର ନବସୃଜନ ଯୋଗୁଁ 1950 ଦଶକରେ 3000V DC ଟ୍ରାକ୍ସନ ଗ୍ରହଣ କରାଯାଇଥିଲା ଏବଂ 1957 ମସିହାରେ ହାଓଡା-ବର୍ଦ୍ଧମାନ ସେକ୍ସନ ଏହି ସିଷ୍ଟମ ଅଧୀନରେ ପ୍ରଥମ ବିଦ୍ୟୁତୀକରଣ ହୋଇଥିଲା। 25 kV AC ଟ୍ରାକ୍ସନର ଉତ୍କୃଷ୍ଟ ଦକ୍ଷତାକୁ ସ୍ୱୀକାର କରି, ଭାରତୀୟ ରେଳବାଇ ଟ୍ରାକ୍ସନ ପରାମର୍ଶଦାତା କମିଟିର ସୁପାରିଶ ଆଧାରରେ 1957 ମସିହାରେ ଏହି ସିଷ୍ଟମକୁ ମାନକୀକରଣ କରିଥିଲା।

ରେଳ ବିଦ୍ୟୁତୀକରଣରେ ମାଇଲଖୁଣ୍ଟ

1. 1947: ଭାରତରେ 1500V DC ଟ୍ରାକ୍ସନରେ 388 RKM ବିଦ୍ୟୁତୀକରଣ ହୋଇଥିଲା।

2. 1960: ରାଜ ଖରସୁଆଁ-ଡୋଙ୍ଗୋଆପୋସି ମଧ୍ୟରେ ପ୍ରଥମ 25 kV AC ବିଦ୍ୟୁତୀକରଣ ସେକ୍ସନରେ ଟ୍ରେନ ଚଳାଚଳ କରିଥିଲା ।

3. 1984: କୋଲକାତା ମେଟ୍ରୋ 750V DC ତୃତୀୟ ରେଳ ସିଷ୍ଟମ ସହିତ ଆରମ୍ଭ ହୋଇଥିଲା।

4. 1995: ବିନା-କଟନି ଏବଂ କଟନି-ଅନୁପପୁର-ବିଶ୍ରାମପୁର ସେକ୍ସନରେ 2x25 kV AT ସିଷ୍ଟମ ପ୍ରଚଳନ କରାଯାଇଥିଲା।

5. 2006: ମୁମ୍ବାଇ ଉପନଗରୀୟ ରେଳ ମାର୍ଗ ମାନଙ୍କରେ DC ଟ୍ରାକ୍ସନକୁ 25 kV AC ରେ ସମ୍ପୂର୍ଣ୍ଣ ପରିବର୍ତ୍ତନ।

6. 2024: ବ୍ରଡଗେଜ୍ ରୁଟ୍‌ର 100% ବିଦ୍ୟୁତୀକରଣ ହାସଲ, 65,000 ରୁଟ କିଲୋମିଟର - RKM ଅତିକ୍ରମ।

ପୂର୍ବତଟ ରେଳପଥ (ECoR) ରେ ବିଦ୍ୟୁତୀକରଣ ସଫଳତା

2003 ମସିହାରେ ପୂର୍ବତଟ ରେଳପଥର ଗଠନ ହେବା ପରଠାରୁ, ପୂର୍ବତଟ ରେଳପଥ ଭାରତର ବିଦ୍ୟୁତୀକରଣ ଅଭିଯାନରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଛି। ପୂର୍ବତଟ ରେଳପଥରେ ପ୍ରଥମ ବିଦ୍ୟୁତୀକରଣ ସେକ୍ସନ ଥିଲା ୧୯୮୩ ମସିହାରେ କୋଟ୍ଟଭାଲାସା-କିରନ୍ଦୁଲ (K-K) ଲାଇନର ଜଗଦଲପୁର-କୋରାପୁଟ ରେଳ ସେକ୍ସନ, ଯାହା ସେତେବେଳେ ଦକ୍ଷିଣ ପୂର୍ବ ରେଳପଥ (SER) ର ଅଂଶ ଥିଲା । ବର୍ଷ ବର୍ଷ ଧରି, ପ୍ରମୁଖ କରିଡରରେ ବିଦ୍ୟୁତିକରଣ ବିସ୍ତାର ହୋଇ 2024 ସୁଦ୍ଧା 100% ବିଦ୍ୟୁତିକରଣରେ ପରିଣତ ହେଲା |

ପୂର୍ବତଟ ରେଳପଥରେ ବିଦ୍ୟୁତିକରଣର ପ୍ରମୁଖ ମାଇଲଖୁଣ୍ଟ:

କୋଟ୍ଟଭାଲାସା-କୋରାପୁଟ-କିରାଣ୍ଡୁଲ ଲାଇନ 1983 ରେ ବିଦ୍ୟୁତକରଣ ହୋଇଛି, କୋରାପୁଟ - ଦାମନଯୋଡି 1989 ରେ, 2000 ରେ ଦୁଭାଡା-ପଲାସା, 2002 ରେ ପାଲାସା-ଖୋର୍ଦ୍ଧା ରୋଡ, 2004 ରେ ବାରଙ୍ଗ-ତାଳଚେର, 2005 ରେ ଖୋର୍ଦ୍ଧା ରୋଡ-ପୁରୀ, 2006 ରେ ଖୋର୍ଦ୍ଧା ରୋଡ-ଭଦ୍ରକ, 2008 ରେ କଟକ-ପାରାଦୀପ,  2016 ରେ ବିଜୟନଗରମ-ସିଙ୍ଗାପୁର ରୋଡ୍, 2017 ରେ ଝାରସୁଗୁଡା-ସମ୍ବଲପୁର, 2018 ରେ ସିଙ୍ଗାପୁର ରୋଡ୍-ଦାମନଯୋଡି, 2019 ରେ ସମ୍ବଲପୁର-ଟିଟିଲାଗଡ-ଲାଖୋଲି ଏବଂ ସମ୍ବଲପୁର-ଅନୁଗୁଳ ରେଳ ବିଦ୍ୟୁତୀକରଣ ହୋଇଛି।

ବିଦ୍ୟୁତ ଟ୍ରାକ୍ସନର ଶତବାର୍ଷିକୀ ଭାରତୀୟ ରେଳବାଇର ଆଧୁନିକୀକରଣ ଏବଂ ସ୍ଥାୟୀତ୍ୱ ଦିଗରେ ରେଳବାଇ ରୂପାନ୍ତରଣ ଯାତ୍ରାରେ ଏକ ଗୁରୁତ୍ୱପୂର୍ଣ୍ଣ ମାଇଲଖୁଣ୍ଟ। 1925 ରେ ୧୬ କିଲୋମିଟର ଦୈର୍ଘ୍ୟ ବୈଦ୍ୟୁତିକ ଟ୍ରେନ୍ ସେବା ଆରମ୍ଭ ହେବାଠାରୁ 2024ରେ ଶତପ୍ରତିଶତ ବ୍ରଡଗେଜ୍ ବିଦ୍ୟୁତୀକରଣ ହାସଲ କରିବା ପର୍ଯ୍ୟନ୍ତ, ପରିବର୍ତ୍ତନ ସାଧାରଣ ହୋଇନଥିଲା । 2030 ସୁଦ୍ଧା ନେଟ୍-ଶୂନ୍ୟ କାର୍ବନ ନିର୍ଗମନ ହାସଲ କରିବାର ଦୃଷ୍ଟିକୋଣ ସହିତ, ଭାରତୀୟ ରେଳବାଇ ଭାରତରେ ରେଳ ପରିବହନର ଭବିଷ୍ୟତକୁ ପୁନଃପରିଭାଷିତ କରିବାକୁ ପ୍ରସ୍ତୁତ ଯାହାକି ଏହାକୁ ଦ୍ରୁତ, ସବୁଜ ଏବଂ ଅଧିକ ଦକ୍ଷ କରିପାରିବ ।

ଭୁବନେଶ୍ୱର, ୨୮ ଫେବୃଆରୀ ୨୦୨୫

ବାଲିଅନ୍ତା ପଞ୍ଚାୟତ ସମିତି ଅଧ୍ୟକ୍ଷା ଗଣମାଧ୍ୟମର ପ୍ରତିନିଧିଙ୍କୁ ଅସମ୍ମାନିତ କରିବା ପ୍ରତିବାଦରେ ବାଲିଅନ୍ତା ବ୍ଲକ ସମ୍ମୁଖରେ ଆନ୍ଦୋଳନରତ ବାଲିଅନ୍ତା-ବାଲିପାଟଣା-ଧଉଳିର ସାମ୍ବାଦିକମାନଙ୍କୁ ଆଜି କଂଗ୍ରେସ ଦଳର ପ୍ରତିନିଧିମାନେ ସାକ୍ଷାତ କରି ସେମାନଙ୍କର ଆନ୍ଦୋଳନକୁ ସମର୍ଥନ ଜଣାଇଛନ୍ତି। ଏହି ଅବସରରେ ପ୍ରତିନିଧି ଦଳ ପକ୍ଷରୁ ଶ୍ରୀଯୁକ୍ତ ମାନସ ଚୌଧୁରୀ କହିଛନ୍ତି ଯେ ବିଜେପି ସରକାର ଅମଳରେ ଗଣମାଧ୍ୟମ ଅସୁରକ୍ଷିତ। ଗଣମାଧ୍ୟମକୁ ନୀରପେକ୍ଷ ଭାବରେ କାର୍ଯ୍ୟ କରିବାକୁ ଦିଆଯାଉନାହିଁ। ବାଲିପାଟଣା ବ୍ଲକ ଅଧ୍ୟକ୍ଷା ନିଜର ସୀମା ସରହଦ ଟପି ଯେଉଁଭଳି ଭାବରେ ଆଚରଣ କରିଛନ୍ତି ଏହା ଅତ୍ୟନ୍ତ ନିନ୍ଦନୀୟ। ସାମ୍ବାଦିକମାନେ ଶାସନର ସ୍ୱଚ୍ଛତା ପାଇଁ ସଂଗ୍ରାମ କରିଥାନ୍ତି। ବ୍ଲକ ଅଧ୍ୟକ୍ଷା ତୁରନ୍ତ ନିଜର ଭୁଲ ସ୍ୱୀକାର କରନ୍ତୁ ଓ ସାମ୍ବାଦିକମାନଙ୍କୁ ଭୁଲ ମାଗନ୍ତୁ ବୋଲି ଶ୍ରୀ ଚୌଧୁରୀ ଦାବି କରିଛନ୍ତି। ସେ ଏହି ପ୍ରସଙ୍ଗକୁ ନେଇ ଜିଲ୍ଲାପାଳଙ୍କ ସହିତ ଆଲୋଚନା କରିବେ ଏବଂ ବ୍ଲକ ଅଧ୍ୟକ୍ଷାଙ୍କ ଉପରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଶ୍ରୀ ଚୌଧୁରୀ ସାମ୍ବାଦିକମାନଙ୍କୁ ପ୍ରତିଶ୍ରୁତି ଦେଇଛନ୍ତି। 

ଏହି ପ୍ରତିନିଧିଦଳରେ ଭୁବନେଶ୍ୱର କଂଗ୍ରେସ ସାଂସଦ ପ୍ରାର୍ଥୀ ୟାସିର ନୱାଜ, ରଞ୍ଜିତ ପାତ୍ର, ବେଣୁଧର ଭୋଇ, ଅମୀୟ ପାଣ୍ଡବ, ମନୋଜ ବିଶ୍ୱାଳ, ମିଲନ ପଟ୍ଟନାୟକ, ମହମ୍ମଦ ପରଭେଜ, ଅମରେଶ ପରିଡ଼ା, ରାହୁଲ ମହାନ୍ତି, ବଟକୃଷ୍ଣ ରାଉତରାୟ, ଜନ୍ମେଜୟ ଲେଙ୍କା ଓ ସନ୍ଦୀପ ରାଉତରାୟ ପ୍ରମୁଖ ଅଂଶ ଗ୍ରହଣ କରିଥିଲେ।

ଭୁବନେଶ୍ୱର, ୨୭ ଫେବୃଆରୀ ୨୦୨୫

ଭାରତୀୟ ଷ୍ଟେଟ ବ୍ଯାଙ୍କ ଭୁବନେଶ୍ବର ମଣ୍ଡଳ ଦ୍ଵାରା ତା 27 ଫେବୃୟାରୀ ଦିନ ବିଶ୍ଵ ସ୍ଵେଚ୍ଛାସେବୀ ସଂଗଠନ ଦିବସ ୨୦୨୫ ପାଳିତ ହୋଇଯାଇଛି । ସ୍ଥାନୀୟ ପ୍ରଧାନ କାର୍ଯ୍ଯାଳୟ ଠାରେ ଆୟୋଜିତ କାର୍ଯ୍ୟକ୍ରମରେ ମୁଖ୍ୟ ମହାପ୍ରବନ୍ଧକ ଶ୍ରୀ ଦିନେଶ ପରୁଥି ଓଡିଶାରେ ପ୍ରତିଷ୍ଠିତ ଓ ବିଭିନ୍ନ କ୍ଷେତ୍ରରେ କାର୍ଯ୍ୟରତ ସ୍ଵେଚ୍ଛାସେବୀ ସଂଗଠନ ମାନଙ୍କୁ ସମ୍ବର୍ଦ୍ଧିତ କରିଥିଲେ । ଓଡିଶା ରାଇଜିଙ୍ଗ ଫାଉଣ୍ଡେଶନ , ଆଇନା , ଗ୍ରାମ ବିକାଶ , ଜାଗୃତି ଓ ନିୟତୀ ଆଦି ସଂସ୍ଥାର ପ୍ରତିନିଧି ମାନେ ନିଜ ସଂଗଠନର ଅନୁଭବ ବର୍ଣ୍ଣନା କରିଥିଲେ । ଅପହଞ୍ଚ ଓ ଗ୍ରାମାଞ୍ଚଳରେ ନିସ୍ଵାର୍ଥ ସେବା ଯୋଗାଉଥିବା  ସେଚ୍ଛାସେବୀ ସଂଗଠନମାନଙ୍କୁ ଚିହ୍ନଟ କରି ସମ୍ମାନିତ କରିବାର ପ୍ରୟାସ ପାଇଁ ଭାରତୀୟ ଷ୍ଟେଟ ବ୍ଯାଙ୍କ ଭୁବନେଶ୍ବର ମଣ୍ଡଳକୁ ଭୂଯସୀ ପ୍ରଶଂସା  କରିଥିଲେ । ମହାପ୍ରବନ୍ଧକ ଶ୍ରୀ କୌଶଳ କିଶୋର ସିଂ, ମଣ୍ଡଲ ବିକାଶ ଅଧିକାରୀ ଶ୍ରୀ ମନୋଜ କୁମାର ସିଂ ଙ୍କ ସମେତ ବହୁ ବରିଷ୍ଠ ଅଧିକାରୀ ଓ କର୍ମଚାରୀ ଏହି କାର୍ଯ୍ୟକ୍ରମରେ ଉପସ୍ଥିତ ଥିଲେ । 

ଭୁବନେଶ୍ୱର, ୨୭ ଫେବୃଆରୀ ୨୦୨୫

ଭୁବନେଶ୍ୱର, ୨୭ ଫେବୃଆରୀ ୨୦୨୫

ଆଜି ପ୍ରଦେଶ କଂଗ୍ରେସ କାର୍ଯ୍ୟାଳୟରେ ଏକ ସାମ୍ବାଦିକ ସମ୍ମିଳନୀରେ ବରିଷ୍ଠ କଂଗ୍ରେସ ନେତା ତଥା ପୂର୍ବତନ ଅର୍ଥମନ୍ତ୍ରୀ ଶ୍ରୀ ପଂଚାନନ କାନୁନଗୋ କହିଛନ୍ତି ଯେ ଯଦି ବିଦ୍ୟୁତ ଦେୟ ୧ ପଇସା ବୃଦ୍ଧି କରାଯିବ ତେବେ ରାଜ୍ୟବ୍ୟାପି ଆନ୍ଦୋଳନ ହେବେ। ସାଧାରଣ ବିଦ୍ୟୁତ ଖାଉଟିଙ୍କ ସ୍ୱାର୍ଥ ରକ୍ଷାପାଇଁ କଂଗ୍ରେସ ପ୍ରତିଶୃତିବଦ୍ଧ ବୋଲି ଶ୍ରୀ କାନୁନଗୋ ଘୋଷଣା କରିଛନ୍ତି। ସେ କହିଲେ ଯେ ବିଜେପି କ୍ଷମତାକୁ ଆସିଲେ ତୁରନ୍ତ ୩୦୦ ୟୁନିଟ ବିଜୁଳି ମାଗଣା ଯୋଗାଇ ଦେବ ବୋଲି ନିର୍ବାଚନୀ ଘୋଷଣା କରାଯାଇଥିଲା। ପୁଣି ବିଜେପି ପକ୍ଷରୁ କୁହାଗଲା ଯେ “ପ୍ରଧାନମନ୍ତ୍ରୀ ସୂର୍ଯ୍ୟଘର ମୋଫତ ବିଜୁଳି ଯୋଜନା” ମାଧ୍ୟମରେ ଖାଉଟିଙ୍କୁ ବିଜୁଳି ଯୋଗାଇ ଦିଆଯିବ। ୮ ମାସର ଶାସନ ପରେ ବି କ୍ଷମତାସୀନ ବିଜେପି ସରକାର ନିଜ ପ୍ରତିଶୃତିରେ ବିଫଳ ହୋଇଛନ୍ତି। ୩୦୦ ୟୁନିଟ ମାଗଣା ବିଜୁଳି ଦେବା ପରିବର୍ତେ ଏବେ ବିଜୁଳି ଦେୟ ୟୁନିଟ ପିଛା ୧୨.୪୨ ପଇସା ବୃଦ୍ଧି ପାଇଁ ଓଇଆରସିଙ୍କ ପାଖରେ ଟିପିସିଓଡିଏଲର ପ୍ରସ୍ତାବ ଦୁର୍ଭାଗ୍ୟଜନକ। ଏ ବାବଦରେ ରାଜ୍ୟ ସରକାର ଏବେବି ନିରୁତ୍ତର।

ଟିପିସିଓଡିଏଲର ପକ୍ଷରୁ ଦର୍ଶାଯାଇଛି ଯେ ଆସନ୍ତା ବର୍ଷ ପାଇଁ ଗ୍ରୀଡ଼କୋ ଠାରୁ ଅଧିକ ୧୩୧୦ ନିୟୁତ ୟୁନିଟ ବିିଜୁଳି ଅଧିକ କ୍ରୟ ହେବ। ସମୁଦାୟ ୧୩୮୨୩ ନିୟୁତ ୟୁନିଟ ବିଜୁଳି କ୍ରୟ କରିବାକୁ ୪୬୮୮.୩୬ କୋଟି ଟଙ୍କା ପୈଠ ହେବ। ଟାଟା ପାୱାର ପକ୍ଷରୁ ଆହୁରି ମଧ୍ୟ ଦର୍ଶାଯାଇଛି ଯେ ବିତରଣ କ୍ଷତି ୨୩୭୪ ୟୁନିଟ ହେବ ଯାହାକି ୧୭.୧୭ ପ୍ରତିଶତ ଅଟେ। ଅବଶିଷ୍ଟ ୧୧୪୪୯ ନିୟୁତ ୟୁନିଟ ଉପଭୋକ୍ତାଙ୍କୁ ବିକ୍ରୟ କରାଯିବ। 

ଟିପିସିଓଡିଏଲର ପକ୍ଷରୁ କୁହାଯାଇଛି ଯେ ରାଜସ୍ୱ ଆବଶ୍ୟକତା ସମୁଦାୟ ୬୮୬୨.୫୪୨୦ କୋଟି ଟଙ୍କା ଆକଳନ ହୋଇଥିବା ବେଳେ ୬୭୨୦.୩୯ କୋଟି ଟଙ୍କା ଆଦାୟ ହେବ ବୋଲି ଜଣାପଡ଼ିଛି। ସୁତରାଂ ୧୪୨.୧୫ କୋଟି ଟଙ୍କା ରାଜସ୍ୱ ନିଅଂଟ ରହିବ ବୋଲି ଦର୍ଶାଇ କ୍ଷତି ଭରଣା ପାଇଁ ୟୁନିଟ ପିଛା ୧୨.୪୨ ପଇସା ବଢ଼ାଇବା ପାଇଁ ପ୍ରସ୍ତାବ ଦିଆଯାଇଛି।

ଶ୍ରୀ କାନୁନଗୋ ଅଭିଯୋଗ କରିଛନ୍ତି ଯେ ୨୦୨୩-୨୪ ପାଇଁ ଆୟୋଗ ନିର୍ଦ୍ଧାରିତ କରିଥିବା ଶୁଳ୍କ ଠାରୁ ଟାଟା ୟୁନିଟ ପିଛା ପ୍ରାୟ ୨୮ ପଇସା ଅଧିକ ଆଦାୟ କରିଛି ଯାହା ଫଳରେ ୨୪୬.୪୭ ଲକ୍ଷ ଟଙ୍କା ଅଧିକ ପାଇଛି। ତେଣୁ ବିଦ୍ୟୁତ ଆଇନ ୨୦୦୩ ଧାରା ୬୨ (୬) ଅନୁସାରେ ଟାଟା ଉପଭୋକ୍ତା ମାନଙ୍କୁ ସୁଧ ସହ ଅର୍ଥ ଫେରସ୍ତ କରୁ। ଏଭଳି ପରିସ୍ଥିତି ସ୍ଥଳେ ଟିପିସିଓଡିଏଲର ବିଦ୍ୟୁତ ଦେୟ ପ୍ରସ୍ତାବ ଏକ କ୍ଷୋଭର ପ୍ରସଙ୍ଗ। ଶ୍ରୀ କାନୁନଗୋ ଦାବି କରିଛନ୍ତି ଯେ ରାଜ୍ୟ ସରକାରଙ୍କର ପ୍ରତିଶ୍ରୁତି ଅନୁଯାୟୀ ତୁରନ୍ତ ୩୦୦ ୟୁନିଟ ମାଗଣା ବିଜୁଳିର ବ୍ୟବସ୍ଥା କରନ୍ତୁ ଏବଂ ବିଦ୍ୟୁତ ଉପଭୋକ୍ତାଙ୍କୁ ଶୋଷଣ ମନବୃତ୍ତିରୁ ସରକାର ନିବୃତ ରୁହନ୍ତୁ। ଗ୍ରୀଡ଼କୋ ରାଜ୍ୟ ସରକାରଙ୍କ ଅଧିନରେ ଥିବାରୁ ରାଜ୍ୟ ସରକାର ବିଜୁଳି ଦର ନିୟନ୍ତ୍ରଣ ପାଇଁ ଉପଯୁକ୍ତ ପଦକ୍ଷେପ ନିଅନ୍ତୁ। 

ଏହି ସାମ୍ବାଦିକ ସମ୍ମିଳନୀରେ ଭୁବନେଶ୍ୱର କଂଗ୍ରେସ ଲୋକସଭା ପ୍ରାର୍ଥୀ ସୟଦ ୟାସିର ନୱାଜ କହିଥିଲେ ଯେ ବିଦ୍ୟୁତ ଦେୟ କ୍ଷେତ୍ରରେ ଓଡ଼ିଶାରେ ଦୁଇ ଦୁଇଟି ଆଇନ ଚାଲୁଛି। ଶିଳ୍ପପତି ଓ ପୁଞ୍ଜିପତିମାନଙ୍କୁ କୋଟି କୋଟି ଟଙ୍କା ବିଦ୍ୟୁତ ଦେୟ ଛାଡ଼ କରାଯାଉଥିବା ବେଳେ ସାଧାରଣ ଉପଭୋକ୍ତାଙ୍କ ତଂଟିଚିପି ଅର୍ଥ ଆଦାୟ କରାଯାଉଛି। ସ୍ମାର୍ଟ ମିଟର ଲଗାଇ ଉପଭୋକ୍ତାଙ୍କ ଶୋଷଣ କରିବାକୁ ଚକ୍ରାନ୍ତ ଚାଲିଛି। ଶ୍ରୀ ନୱାଜ କହିଥିଲେ ଯେ ବିଧାନସଭାରେ ଉପସ୍ଥାପିତ ତଥ୍ୟ ଅନୁଯାୟୀ ଗତ ୧୦ ବର୍ଷରେ ୧୪ ଜଣ ଶିଳ୍ପପତିଙ୍କୁ ୪୦୯୭.୬୭ କୋଟି ବିଦ୍ୟୁତ ଦେୟ ବିଭିନ୍ନ ଯୋଜନାରେ ଛାଡ଼ କରାଯାଇଛି। ସେହିଭଳି ୨୩ଟି ଶିଳ୍ପ ଉପରେ ୧୦୯୬.୩୨ କୋଟି ଟଙ୍କା ବିଦ୍ୟୁତ ଦେୟ ବାକି ପଡ଼ିଛି। ସେମାନଙ୍କ ଠାରୁ ବକେୟା ଅର୍ଥ ଆଦାୟ କରାଯାଉ ନାହିଁ କାହିଁକି ବୋଲି ଶ୍ରୀ ନୱାଜ ପ୍ରଶ୍ନ କରିଛନ୍ତି। ମାତ୍ର କିଭଳି ସାଧାରଣ ଉପଭୋକ୍ତାଙ୍କୁ ହନ୍ତସନ୍ତ କରାଯିବ ତାର ଷଡ଼ଯନ୍ତ୍ର କରାଯାଉଛି। ଯଦି ବିଜେପି ସରକାର ତା’ର ପ୍ରତିଶ୍ରୁତି ଅନୁଯାୟୀ ୩୦୦ ୟୁନିଟ ମାଗଣା ବିଜୁଳି ଦେବାର ବ୍ୟବସ୍ଥା ନକରି ସାଧାରଣ ଉପଭୋକ୍ତାଙ୍କ ଉପରେ ପୁଣି ବିଜୁଳି ଦେୟ ବୃଦ୍ଧି କରିବେ ତେବେ ପ୍ରଦେଶ କଂଗ୍ରେସ ସଭାପତି ଶ୍ରୀ ଭକ୍ତ ଚରଣ ଦାସଙ୍କ ନେତୃତ୍ୱରେ ସାରା ରାଜ୍ୟରେ ଦୁର୍ବାର ଆନ୍ଦୋଳନ ହେବ। ଶ୍ରୀ କାନୁନଗୋ କହିଲେ ଯେ ବିଦ୍ୟୁତ ଉପଭୋକ୍ତାଙ୍କ ସ୍ୱାର୍ଥ ଦୃଷ୍ଟିରୁ ସମସ୍ତ ଅଣ ବିଜେପି ଦଳ ଯେଉଁମାନେ ବିଦ୍ୟୁତ ଉପଭୋକ୍ତାଙ୍କ ପାଇଁ ଲଢ଼େଇ କରିବେ ସେମାନଙ୍କର ସହଯୋଗରେ କଂଗ୍ରେସ ପୁରପଲ୍ଲୀରୁ ଭୁବନେଶ୍ୱର ପର୍ଯ୍ୟନ୍ତ ଆନ୍ଦୋଳନ କରିବ। ଏହି ସାମ୍ବାଦିକ ସମ୍ମିଳନୀରେ ପୂର୍ବତନ ପିସିସି ମୁଖପାତ୍ର ମନୋରଞ୍ଜନ ଦାଶ, ପୂର୍ବତନ ପିସିସି ସାଧାରଣ ସମ୍ପାଦକ ମନୋଜ ବିଶ୍ୱାଳ ଓ ପ୍ରଦେଶ ଛାତ୍ର କଂଗ୍ରେସ ସଭାପତି ଉଦିତ ପ୍ରଧାନ ଉପସ୍ଥିତ ଥିଲେ।

ଭୁବନେଶ୍ୱର, ୨୭ ଫେବୃଆରୀ ୨୦୨୫

ଶ୍ରୀ ଲିଙ୍ଗରାଜ ମହାପ୍ରଭୁଙ୍କ ମହାଦୀପ ଧରି ମନ୍ଦିର ଉପରକୁ ଚଢ଼ୁଥିବା ବେଳେ ତଳେ ଖସିପଡ଼ି ଗୁରୁତର ଆହତ ହୋଇ କ୍ୟାପିଟାଲ ହସ୍ପିିଟାଲରେ ଚିକିତ୍ସିତ ହେଉଥିବା ସେବାୟତ ଯୋଗେନ୍ଦ୍ର ସମର୍ଥାଙ୍କୁ ଆଜି ପିସିସି ସଭାପତି ଶ୍ରୀ ଭକ୍ତଚରଣ ଦାସ କ୍ୟାପିଟାଲ ହସପିଟାଲରେ ସାକ୍ଷାତ କରି ତାଙ୍କର ସ୍ୱାସ୍ଥ୍ୟବସ୍ଥା ସମ୍ପର୍କରେ ଅବଗତ ହୋଇଥିଲେ। ଏହି ପରିପ୍ରେକ୍ଷୀରେ ପିସିସି ସଭାପତି ଶ୍ରୀ ଦାସ କହିଛନ୍ତି ଯେ ଏଭଳି ଅଘଟଣ ଘଟିବା ଦୁଃଖଦାୟକ। ଭୁବନେଶ୍ୱରର ପ୍ରଭୁ ଲିଙ୍ଗରାଜଙ୍କ ମନ୍ଦିର ବିଶ୍ୱବିଖ୍ୟାତ ଏଣୁ ମୁଖ୍ୟମନ୍ତ୍ରୀ ନିଜେ ଏହି ଘଟଣାର ଗୁରୁତ୍ୱ ଉପଲବ୍ôଧ କରି ତୁରନ୍ତ ତଦନ୍ତ କରିବା ଆବଶ୍ୟକ। ପୁରୀ ରଥଯାତ୍ରାରେ ପ୍ରଭୁ ବଳଭଦ୍ର ପଡ଼ିଯାଇଥିଲେ। ମାତ୍ର ସରକାର ସେ ଉପରେ କ’ଣ ତଦନ୍ତ କଲେ ତାହା ଏପର୍ଯ୍ୟନ୍ତ ଜଣାପଡ଼ିଲା ନାହିଁ। ଲିଙ୍ଗରାଜଙ୍କ ସେବକ ଯୋଗେନ୍ଦ୍ର ବାବୁ ୩୦ ବର୍ଷ ଧରି ଏହି କାର୍ଯ୍ୟ କରୁଥିଲେ। ମାତ୍ର କ’ଣ ଅବ୍ୟବସ୍ଥା ହେଲା ଯାହା ଫଳରେ ସେ ପଡ଼ିଗଲେ। ଅଭିଯୋଗ ହେଉଛି ଯେ ସେ ଯେଉଁ ଶିଢ଼ିରେ ଯାଉଥିଲେ ସେ ଶିଢ଼ିରେ ବାଲି ଦିଆଯାଏ, ଯାହାଫଳରେ ତେଲ ଲାଗିଲେ ମଧ୍ୟ ଖସୁ ନଥିଲା। ମାତ୍ର ଏଥର ବାଲି ଦିଆଯାଇ ନାହିଁ। ଜଣେ ସେବାୟତ ଏହି କାର୍ଯ୍ୟ କରୁଥିବା ବେଳେ କିପରି ସୁରକ୍ଷିତ ରହିବେ ସେଥିପ୍ରତି ସରକାର ଧ୍ୟାନ ଦେବା ଉଚିତ। ସୁତରାଂ ଏହି ତ୍ରୁଟି ପାଇଁ ସରକାର ଦାୟୀ ଏବଂ ଆହତ ଯୋଗେନ୍ଦ୍ର ସମର୍ଥାଙ୍କୁ ସରକାର କ୍ଷତିପୂରଣ ବାବଦକୁ ଅର୍ଥ ବ୍ୟବସ୍ଥା କରନ୍ତୁ। ଆମ ପକ୍ଷରେ ଯାହା ସମ୍ଭବ ତାହା ଆମେ ସହଯୋଗ କରିବୁ। ଶ୍ରୀ ଦାସ ସମର୍ଥାଙ୍କ ପରିବାରବର୍ଗଙ୍କୁ ମଧ୍ୟ ଦୁଃଖ ଜଣାଇଛନ୍ତି। ଏତଦ୍‌ଭିନ୍ନ ଠେଲାପେଲାରେ ମଧ୍ୟ ୫ ଜଣ ଅଚେତ୍ ହୋଇଥିଲେ। ଏଥିରୁ ସ୍ପଷ୍ଟ ହୋଇଛି ଯେ ପ୍ରଶାସନ ପକ୍ଷରୁ ଠିକ୍ ଭାବେ ପରିଚାଳନା କରାଯାଇନାହିଁ। ସରକାର ସଠିକ୍ ଭାବେ ଯତ୍ନବାନ ହୋଇନାହାନ୍ତି। ଉଭୟ ପୁରୀ ରଥଯାତ୍ରା ସମୟରେ ପ୍ରଭୁ ବଳଦେବ ପଡ଼ିଯିବା ଘଟଣା ଏବଂ ଗତକାଲି ଲିଙ୍ଗରାଜଙ୍କ ସେବକ ମନ୍ଦିରରୁ ପଡ଼ିଯିବା ଘଟଣା ସଂପର୍କରେ ଶ୍ୱେତପତ୍ର ପ୍ରକାଶ କରିବାରୁ ଶ୍ରୀ ଦାସ ଦାବି କରିଛନ୍ତି। ବିଜେପି ଧର୍ମକୁ ନେଇ ରାଜନୀତି କରେ ଏବଂ ଠାକୁରଙ୍କ ନାମ ନେଇ ଭୋଟ ଭିକ୍ଷା କରେ। ମାତ୍ର ବାସ୍ତବ କ୍ଷେତ୍ରରେ ଯାହା ପରିଦୃଷ୍ଟ ହୋଇଛି ଠାକୁରଙ୍କ ସେବା ଓ ନିତିକାନ୍ତିରେ ଯେଉଁ ବିଭ୍ରାଟ ହୋଇଛି ସେଥିପ୍ରତି ବିଜେପି ସରକାର ଆଦୌ ଯତ୍ନବାନ ନୁହଁନ୍ତି। 

ପିସିସି ସଭାପତିଙ୍କ ସହ ଏହି ସାକ୍ଷାତରେ ପୂର୍ବତନମନ୍ତ୍ରୀ ଶ୍ରୀ ପଞ୍ଚାନନ କାନୁନ୍‌ଗୋ, ମାନସ ଚୌଧୁରୀ, ୟାସିର ନୱାଜ, ରଞ୍ଜିତ ପାତ୍ର, ମହମ୍ମଦ ଇନ୍‌ଦାଜ, ମନୋଜ ବିଶ୍ୱାଳ, ସୁଧାଂସୁ ଶେଖର ଦେଓ, ଇଂ ସିଦ୍ଧାର୍ଥସ୍ୱରୂପ ଦାସ, ରଜନୀ ମହାନ୍ତି, ମହମ୍ମଦ ପରଭେଜ, ସୁଶାନ୍ତ ତ୍ରୀପାଠୀ,ଅମରେଶ ପରିଡ଼ା ପ୍ରମୁଖ ଅଂଶ ଗ୍ରହଣ କରିଥିଲେ।

ଭୁବନେଶ୍ୱର, ୨୫ ଫେବୃଆରୀ ୨୦୨୫

ହେଲ୍‌ଥ ରେକର୍ଡସ ଆସୋସିଏସନ୍ ଅଫ୍ ଇଣ୍ଡିଆର ୨୪ତମ ଜାତୀୟ ସମ୍ମିଳନୀ ସୋଆ ପରିଚାଳିତ ସମ୍ ଅଲ୍ଟିମେଟ ମେଡିକେୟାର (ସମ୍ମମ) ଠାରେ ଗତ ଫେବୃଆରୀ ୨୧ ଓ ୨୨ ତାରିଖରେ ଅନୁଷ୍ଠିତ ହୋଇଯାଇଛି। ଏଥିରେ ଦେଶର ବିଭିନ୍ନ ପ୍ରାନ୍ତରୁ ୪୫୦ରୁ ଊର୍ଦ୍ଧ୍ୱ ସ୍ୱାସ୍ଥ୍ୟ ଓ ମେଡିକାଲ୍ ରେକର୍ଡ ବିଶେଷଜ୍ଞ ଯୋଗ ଦେଇଥିଲେ।

ସମ୍ମମର ମେଡିକାଲ୍ ରେକର୍ଡସ ବିଭାଗ ଦ୍ୱାରା ଆୟୋଜିତ ଏହି ସମ୍ମିଳନୀକୁ ହସ୍ପିଟାଲ୍‌ର ଚିଫ୍ ଏଗ୍‌ଜିକ୍ୟୁଟିଭ୍ ଅଫିସର ଡ. ଶ୍ୱେତପଦ୍ମା ଦାଶ ଉଦ୍‌ଘାଟନ କରିଥିଲେ। ଏହି ଅବସରରେ ହସ୍ପିଟାଲ୍‌ର ମେଡିକାଲ୍ ସର୍ଭିସେସ୍ ମୁଖ୍ୟ ବ୍ରିଗେଡିୟର (ଡ.) ବିରାଜ ମୋହନ ମିଶ୍ର ତଥା ହେଲ୍‌ଥ ରେକର୍ଡସ ଆସୋସିଏସନ୍ ଅଫ୍ ଇଣ୍ଡିଆନର ସଭାପତି ଶ୍ରୀ ସୁରେଶ କାର୍ଲେଟନ ଓ ସଂପାଦକ ଶ୍ରୀ ୱିଲସନ୍ ଥାୟା ଜି ଉପସ୍ଥିତ ଥିଲେ। 

ଡ. ଦାଶ ତାଙ୍କ ବକ୍ତୃତାରେ ଆର୍ଟିଫିସିଆଲ୍ ଇନ୍‌ଟେଲିଜେନ୍ସର ଅଭ୍ୟୁଦୟ ପରିପ୍ରେକ୍ଷୀରେ ଡାକ୍ତରୀ ଚିକିତ୍ସାରେ ମେଡିକାଲ୍ ରେକର୍ଡସର ଭୂମିକା ଉପରେ ଆଲୋକପାତ କରିଥିଲେ। 

ଏହି ସମ୍ମିଳନୀର ମୂଳ ପ୍ରସଙ୍ଗ ଥିଲା ‘କରେଂଟ ଟ୍ରେଣ୍ଡସ୍ ଇନ୍ ମେଡିକାଲ୍ ରେକର୍ଡସ ଆଣ୍ଡ ହେଲ୍‌ଥ ଇନ୍‌ଫର୍ମେସନ୍ ମ୍ୟାନେଜମେଂଟ ଉଇଥ ରେଫରେନ୍ସ ଟୁ କ୍ୱାଲିଟି ଆକ୍ରେଡିଟେସନ୍ ଆଣ୍ଡ ମେଡିକୋ ଲିଗାଲ ଆସ୍‌ପେକ୍ଟସ’। 

ଡ. ଦାଶ ମଧ୍ୟ ଆସୋସିଏସନ୍‌ର ୱେବସାଇଟ୍ ଓ ଅନଲାଇନ୍ ପୋର୍ଟାଲକୁ ଏହି ଅବସରରେ ଉନ୍ମୋଚିତ କରିଥିଲେ। ଏହାଛଡ଼ା ଆସୋସିଏସନ୍‌ର ଓଡ଼ିଶା ଶାଖାର ୭ ଜଣ ସଭ୍ୟଙ୍କୁ ସେମାନଙ୍କର ଏହି କ୍ଷେତ୍ରରେ ଅବଦାନ ନିମନ୍ତେ ସମ୍ମାନିତ କରାଯାଇଥିଲା। 

ସମ୍ମାନିତ ସଭ୍ୟମାନେ ହେଲେ ଶ୍ରୀ ବିଜୟ କୁମାର ବେହେରା, ଶ୍ରୀ ପ୍ରଫୁଲ୍ଲ ଚନ୍ଦ୍ର ରଣା, ଶ୍ରୀ ମନୋଜ କୁମାର ବେହେରା, ଶ୍ରୀ ନାରାୟଣ ଚନ୍ଦ୍ର ବେହେରା, ଶ୍ରୀ ଅଜୟ କୁମାର ମହାପାତ୍ର, ଶ୍ରୀ ସୁଜିତ କୁମାର ରାଉଳ ଓ ଶ୍ରୀ ରତିକାନ୍ତ ବାରିକ।

ଭୁବନେଶ୍ୱର, ୨୫ ଫେବୃଆରୀ ୨୦୨୫

ଭୁବନେଶ୍ୱର, ୨୫ ଫେବୃଆରୀ ୨୦୨୫

ଭୁବନେଶ୍ୱର, ୨୫ ଫେବୃଆରୀ ୨୦୨୫

ଆଜି ପ୍ରଦେଶ ଯୁବ କଂଗ୍ରେସ, ପ୍ରଦେଶ ଛାତ୍ର କଂଗ୍ରେସ ଏବଂ ଉତ୍କଳ ବିଶ୍ୱବିଦ୍ୟାଳୟ କ୍ୟାମ୍ପସ ଛାତ୍ର କଂଗ୍ରେସ କମିଟି ପକ୍ଷରୁ କିଟ୍ ପ୍ରତିଷ୍ଠାତା ଅଚ୍ୟୁତ ସାମନ୍ତଙ୍କ ଗିରଫ ଦାବିରେ ଉତ୍କଳ ବିଶ୍ୱବିଦ୍ୟାଳୟ ସମ୍ମୁଖରେ ବିକ୍ଷୋଭ ପ୍ରଦର୍ଶନ କରାଯାଇଥିଲା। ସଂଗଠନ ପକ୍ଷରୁ ଅଭିଯୋଗ କରାଯାଇଛି ଯେ କିଟ୍‌ରେ ନେପାଳୀ ଛାତ୍ରୀ ଆତ୍ମହତ୍ୟା ଓ ଏହାର ପରବର୍ତୀ ପରିସ୍ଥିତିରେ ନେପାଳୀ ଛାତ୍ର ଛାତ୍ରୀମାନଙ୍କୁ ଜବରଦସ୍ତକରି ବଳପୂର୍ବକ କିଟ୍ ହଷ୍ଟଲରୁ ତଡି ଦିଆଯାଇଛି। ଏହି ପ୍ରସଙ୍ଗରେ କିଟ୍ ପ୍ରତିଷ୍ଠାତା ସାମନ୍ତଙ୍କ ଭୂମିକାକୁ ଯୁବ ଓ ଛାତ୍ର କଂଗ୍ରେସ ପକ୍ଷରୁ ଦୃଢ଼ ନିନ୍ଦା କରାଯାଇଛି। ଏହି ଛାତ୍ରଛାତ୍ରୀମାନେ ସାଇନ୍ ଏ ଡାଏ ଘୋଷଣା ହେବା ପରେ ଏବଂ କିଟ୍ କର୍ତୃପକ୍ଷଙ୍କ ଠାରୁ ଅତ୍ୟାଚାରିତ ହୋଇ ହଷ୍ଟେଲରୁ ବାହାରିବା ପରେ ଉପାସ ଭୋକରେ ରହିଲେ। ସେମାନେ ବହୁ କଷ୍ଟରେ ନେପାଳ ଫେରିଗଲେ। ମୂଳ କଥାଟି ହେଉଛି କିଟ୍ ପ୍ରତିଷ୍ଠାତା ଅଚ୍ୟୁତ ସାମନ୍ତ ଷଡଯନ୍ତ୍ର କରି ନିଜ କର୍ମଚାରୀମାନଙ୍କୁ ଏଥିରେ ଫସାଇ ନିଜେ ଦୋଷମୁକ୍ତ ହୋଇଯାଉଛନ୍ତି। ଅଚ୍ୟୁତ ସାମନ୍ତଙ୍କ ବିନା ନିର୍ଦ୍ଦେଶରେ କିଟ୍‌ରେ ଗଛପତ୍ର ହଲେ ନାହିଁ। ସୁତରାଂ ନେପାଳୀ ଛାତ୍ରୀଛାତ୍ରୀଙ୍କ ଉପରେ ଯେଉଁ ନିର୍ଯ୍ୟାତନା ଦିଆଯାଇଥିଲା ତାହା ସାମନ୍ତଙ୍କ ନିର୍ଦ୍ଦେଶରେ ହୋଇଥିଲା ବୋଲି ସଂଗଠନ ପକ୍ଷରୁ କୁହାଯାଉଛି। କିଟ୍ ପରିସରରେ ପ୍ରତିବର୍ଷ ମୃତ୍ୟୁ ଘଟଣା ଖବର ପ୍ରସାରିତ ହେଉଛି ମାତ୍ର ଏହାର ସଠିକ୍ ତଦନ୍ତ ହୋଇପାରୁନାହିଁ। କାରଣ କିଟ୍‌ର ପ୍ରତିଷ୍ଠାତା ଶ୍ରୀ ସାମନ୍ତ ପ୍ରଶାସନକୁ ପ୍ରଭାବିତ କରିବାରେ ସଫଳ ହୋଇପାରୁଛନ୍ତି। କିଟ୍‌ରେ ଛାତ୍ରୀ ଅସୁରକ୍ଷିତ। ସେଠରେ ଶୈକ୍ଷିକ ବାତାବରଣ ନାହିଁ। ସରକାରଙ୍କ ପାଖରେ ନିଶ୍ଚିତ ଭାବେ ଏ ଖବର ଅଛି କିନ୍ତୁ ଏହାର ପ୍ରତିକାର କରିବାକୁ ସରକାର ପଛଘୁଞ୍ଚା ଦେଉଛନ୍ତି। କିଟ୍ କେଳେଙ୍କାରୀକୁ ନେଇ ଓଡ଼ିଶାରେ ଘରେ ଘରେ ଚର୍ଚ୍ଚା ହେଉଥିବାବେଳେ ମୁଖ୍ୟମନ୍ତ୍ରୀ ଓ କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଏ ଘଟଣା ସଂପର୍କରେ କୌଣସି ଟିପ୍ପଣି ନଦେବା ଆଶ୍ଚର୍ଯ୍ୟଜନକ କଲା? ଶ୍ରୀ ସାମନ୍ତ ଓ ଓଡ଼ିଶା ସରକାରଙ୍କ ମଧ୍ୟରେ ଯେଉଁ ଭିତିରି ସଂପର୍କ ରହିଛି ତାହା ଜଳଜଳ ହୋଇ ଦିଶୁଛି। ଯଦି ଅଚ୍ୟୁତ ସାମନ୍ତ ଗିରଫ ନ ହୁଅନ୍ତି ତେବେ ଆମର ଓ ଓଡ଼ିଶାର ସାଧାରଣ ଜନତାଙ୍କର ଯେଉଁ ସନ୍ଦେହ ପ୍ରକଟିତ ହୋଇଛି ତାହା ସତ୍ୟ ବୋଲି ପ୍ରମାଣିତ ହେବ। ବିଶ୍ୱବିଦ୍ୟାଳୟର କର୍ତୃପକ୍ଷଙ୍କ ଦ୍ୱାରା ଛାତ୍ରଛାତ୍ରୀମାନେ ଅତ୍ୟାଚାରିତ ହୋଇ ଅସହାୟ ହୋଇପଡ଼ୁଛନ୍ତି। ସେମାନଙ୍କୁ ନ୍ୟାୟ ଦେବା ସରକାରଙ୍କ କର୍ତବ୍ୟ। ଏଣୁ ସ୍ୱତନ୍ତ୍ର ଭାବେ ଛାତ୍ରଛାତ୍ରୀମାନଙ୍କ ପାଇଁ ବିଭିନ୍ନ ଜିଲ୍ଲା ମୁଖ୍ୟାଳୟରେ ଏବଂ ସଂପକ୍ତ ଶିକ୍ଷାନୁଷ୍ଠାନର ନିକଟବର୍ତି ଥାନାରେ ସ୍ୱତନ୍ତ୍ର ଅଭିଯୋଗ ପ୍ରକୋଷ୍ଠ ଖୋଲାଯାଉ, ଯେଉଁଠାରେ ଛାତ୍ରଛାତ୍ରୀମାନେ ନିଜର ଅସନ୍ତୋଷ ବ୍ୟକ୍ତ କରିପାରିବେ ଓ ନ୍ୟାୟ ଭିକ୍ଷା କରିପାରିବେ। କିଟ୍ ଯେଉଁଭଳି ଭାବରେ ପରିଚାଳିତ ହେଉଛି ଏଥିରୁ ସ୍ପଷ୍ଟ ହେଉଛି ଯେ କିଟ୍ ପାଖରେ ଆଉ ଡିମିଡ୍ ୟୁନିଭରସିଟ୍ ମାନ୍ୟତା ରହିବା ଉଚିତ୍ ନୁହେଁ। ତେଣୁ ତୁରନ୍ତ ଏହି ମାନ୍ୟତା ପ୍ରତ୍ୟାହାର କରିନିଆଯାଉ। ଛାତ୍ରଛାତ୍ରୀମାନଙ୍କ ସ୍ୱାର୍ଥ ଦୃଷ୍ଟିରୁ ସରକାର କିଟ୍ ୟୁନିଭରସିଟିକୁ ସ୍ୱତନ୍ତ୍ର ଭାବେ ନିୟନ୍ତ୍ରଣ କରିବାକୁ ବ୍ୟବସ୍ଥା କରନ୍ତୁ। ନେପାଳୀ ଓ ଅନ୍ୟ ସମସ୍ତ ଛାତ୍ରଛାତ୍ରୀମାନଙ୍କୁ ନ୍ୟାୟ ଦିଆଯାଉ।

ନେପାଳ ଓ ଭାରତ ମଧ୍ୟରେ ବହୁ ପୁରୁଣା ସାଂସ୍କୃତିକ ଓ ଧାମିର୍କ କ୍ଷେତ୍ରରେ ନିବିଡ଼ ସଂପର୍କ ରହିଛି। ମାତ୍ର ସାମନ୍ତ ଏହି ଯୁଗ ଯୁଗର ସୁ ସଂପର୍କକୁ କ୍ଷୁର୍ଣ୍ଣ କରିଛି। ଆନ୍ତର୍ଜାତିକ କ୍ଷେତ୍ରରେ ମଧ୍ୟ ଓଡ଼ିିଶାକୁ ଶ୍ରୀ ସାମନ୍ତ ନିନ୍ଦିତ କରୁଛନ୍ତି। 

ଅନ୍ୟପକ୍ଷରେ ଶ୍ରୀ ସାମନ୍ତ କିଟ୍ ୟୁନିଭରସିଟିର ଉନ୍ନତି ଆଳରେ ବହୁ ଜଙ୍ଗଲ ଜମି, ଗୋଚର ଜମି ଓ ଆଦିବାସୀ ଜମି ବେଆଇନ ଭାବେ ଦଖଲ କରିଛନ୍ତି। ଏପରିକି ବହୁ ନିରିହ ଲୋକଙ୍କର ଜମି ମଧ୍ୟ ଶ୍ରୀ ସାମନ୍ତ ସେଠାରେ ମାଡ଼ି ବସିଛନ୍ତି। ସରକାରୀ ଜମିକୁ ଶ୍ରୀ ଅଚ୍ୟୁତ ସାମନ୍ତଙ୍କ କବଜ୍ଜାରୁ ମୁକ୍ତ କରିବା ସହ ସାଧାରଣ ଲୋକଙ୍କ ଜମିକୁ ସେମାନଙ୍କୁ ଫେରାଇବାକୁ ସରକାର ବ୍ୟବସ୍ଥା କରନ୍ତୁ। ଶିକ୍ଷା ମାଫିଆ, ଜମି ଜବରଦଖଲକାରୀ ଓ ଛାତ୍ରଛାତ୍ରୀ ଓ ଅଭିଭାବକଙ୍କ ଶୋଷଣକାରୀ ଶ୍ରୀ ଅଚ୍ୟୁତ ସାମନ୍ତଙ୍କୁ ତୁରନ୍ତ ଗିରଫ କରିବାକୁ ଯୁବ ଓ ଛାତ୍ର କଂଗ୍ରେସ ପକ୍ଷରୁ ଦାବି କରାଯାଇଛି। 

ଏହି କାର୍ଯ୍ୟକ୍ରମରେ ପିସିସିର ପୂର୍ବତନ ସାଧାରଣ ସମ୍ପାଦକ ମନୋଜ ବିଶ୍ୱାଳ, ପ୍ରଦେଶ ଯୁବ କଂଗ୍ରେସ ସଭାପତି ରଞ୍ଜିତ ପାତ୍ର, ଚୁନୁ ସିଂ, ଉଦ୍ଦିତ ପ୍ରଧାନ, ମହମ୍ମଦ ଇମ୍‌ଦାର, କିରଣ ସାହୁ, ନିହାର ରଞ୍ଜନ ବେହେରା, ଗୋପନ ମାର୍ଥା, ଅଖିଳେଷ ଯାଦବ, ସ୍ୱାଗତ କର, ଅମରେଶ ପରିଡ଼ା, ସୌମ୍ୟ ବରାଳ, ଶୁଭମ ରାଜ, ରାଜେଶ ଦାସ, କିର୍ତିମାନ ନାୟକ, ସରୋଜ ବାରିକ, ଲେଲିନ୍ ଜେନା, ସତ୍ୟ ମହାଳିକ୍‌, ଯୁବରାଜ ମହାନନ୍ଦ ଓ ଆଶିଷ ରଞ୍ଜନ ଦାସ ପ୍ରମୁଖ ଉପସ୍ଥିତ ଥିଲେ।

ଭୁବନେଶ୍ୱର, ୨୪ ଫେବୃଆରୀ ୨୦୨୫

ମହାପ୍ରଭୁ ଶ୍ରୀ ଲିଙ୍ଗରାଜଙ୍କ ମହାଶିବରାତ୍ରି ଉପଲକ୍ଷେ ଏକାମ୍ର ସାଂସ୍କୃତିକ ପ୍ରକାଶନୀ ପକ୍ଷରୁ ଏକ ସାମ୍ବାଦିକ ସମ୍ମିଳନୀ ଲିଙ୍ଗରାଜ ଲାଇବ୍ରେରୀ ହଲ୍‌ରେ ସୋମବାର ଅନୁଷ୍ଠିତ ହୋଇଯାଇଛି। ଅନୁଷ୍ଠାନର ସଭାପତି ସୁରେଶ କୁମାର ରାଉତରାୟ ଓ ସାଧାରଣ ସାମ୍ପାଦକ ସନତ ମିଶ୍ର ସାମ୍ବାଦିକ ସମ୍ମିଳନୀରେ ସୂଚନା ଦେଇ କହିଛନ୍ତି ଯେ, ଜାତୀୟସ୍ତରୀୟ ଏହି ଭଜନ ସମାରୋହ ଚଳିତବର୍ଷ ୩୬ବର୍ଷ ପାଳନ କରିବ। ଏହାକୁ ଅଧିକ ଆକର୍ଷଣୀୟ କରିବା ପାଇଁ ଅନୁଷ୍ଠାନ ପକ୍ଷରୁ ବ୍ୟାପକ ଉଦ୍ୟମ ହୋଇଛି। ମୁମ୍ବାଇର ଖ୍ୟାତନାମା କଣ୍ଠଶିଳ୍ପୀ ଉଷା ଉଥପ, ଅନୁରାଧା ପଡୱାଲ, ଅଭିଜିତ ଘୋଷାଲ, କୁମାର ସଞ୍ଜୟ, ପ୍ରତ୍ୟୋଷ ଶର୍ମା, ମଧୁମିତା ପାଉଲଙ୍କ ସମେତ ଓଡ଼ିଶାର ୨୫ରୁ ଉର୍ଦ୍ଧ୍ୱ ଖ୍ୟାତନାମା କଣ୍ଠଶିଳ୍ପୀ ଯୋଗଦାନ କରିବେ।

ଉକ୍ତ ଦିନ ଭୋର ୪ ଘଟିକାରୁ ଶଙ୍ଖଧ୍ୱନି, ବେଦପାଠ, ଶିବ ସହସ୍ରନାମ, ଭାଗବତ, ଗୀତା ପାଠ, ଶିବ ଚେତନା, ହରି ଭଜନ, ରାମ ଚରିତ ପାରାୟଣ କରାଯିବ। ସନ୍ଧ୍ୟାରେ ପ୍ରବଚନ ଅନୁଷ୍ଠିତ ହେବ। ଏହାପରେ ଜାତୀୟସ୍ତରୀୟ ଭଜନ ସମାରୋହ ଆୟୋଜନ କରାଯିବ। ଚଳିତବର୍ଷ ବିଶିଷ୍ଟ ସଙ୍ଗୀତ ନିର୍ଦ୍ଦେଶକ ମନ୍ମଥ ମିଶ୍ରଙ୍କ ୨୨ତମ ନିର୍ଦ୍ଦେଶନାରେ ଭଜନ ପରିବେଷଣ କରାଯିବ। ଏହି ଉତ୍ସବରେ ବିଶିଷ୍ଟ କଣ୍ଠଶିଳ୍ପୀ ଉଷା ଉଥପ, ଅନୁରାଧା ପଡୱାଲ, ଅଭିଜିତ ଘୋଷାଲ, କୁମାର ସଞ୍ଜୟ, ପ୍ରତ୍ୟୋଷ ଶର୍ମା, ମଧୁମିତା ପାଉଲ, ଡ. ମୃତ୍ୟୁଞ୍ଜୟ ମହପାତ୍ର, ପ୍ରସନ୍ନ କୁମାର ସ୍ୱାଇଁ, ଜିତୁ ଦାସ, ପଙ୍କଜ ଲୋଚନ ମହାନ୍ତି, ଭାଗବତ ସାହୁ, ଚନ୍ମୟନନ୍ଦ ବଡ଼ଜେନା, ମାଧବାନନ୍ଦ ବେହୁରା, କେ ମୁରୁଗାସନ, ରାଜୀବ ଶେଖର ସାହୁ, ପ୍ରେମାନନ୍ଦ, ଡ. ବଦ୍ରୀନାଥ ପଟ୍ଟନାୟକ, ଦୀପକ ଦାଶ, ସତ୍ୟ ରଞ୍ଜନ ସେନାପତି, ଡ. ଶଙ୍କର ଆଚାର୍ଯ୍ୟ, ଡ. ତିରୁପତି ପାଣିଗ୍ରାହୀ, ଶ୍ରୀବତ୍ସ ପତି ଓ ଇପ୍‌ସିତା ଦାସ ପ୍ରମୁଖ ୨୩ଜଣଙ୍କୁ ଏକାମ୍ରଶ୍ରୀ ସମ୍ମାନରେ ସମ୍ବର୍ଦ୍ଧିତ କରାଯବ। ଏ ନେଇ ସାମ୍ବାଦିକ ସମ୍ମିଳନୀରେ ଅନୁଷ୍ଠାନର ସଭାପତି ତଥା ପୂର୍ବତନ ମନ୍ତ୍ରୀ ସୁରେଶ କୁମାର ରାଉତରାୟ, ସାଧାରଣ ସମ୍ପାଦକ ସନତ ମିଶ୍ର, ଉପସଭାପତି ଶିବାନନ୍ଦ ରାୟ, କୋଷାଧ୍ୟକ୍ଷ ରତିକାନ୍ତ ମହାସୁଆର, ଲଲଟେନ୍ଦୁ ମହାନ୍ତି, ମୁଖପାତ୍ର ଲିଙ୍ଗରାଜ ସାହୁ, ଯୁଗ୍ମ ସମ୍ପାଦକ ପ୍ରଦ୍ୟୁମ୍ନ କୁମାର ମହାନ୍ତି, କେଦାରନାଥ ମହାପାତ୍ର, ବାବନଚନ୍ଦ୍ର ମହାପାତ୍ର, ପ୍ରମୋଦ ମହାନ୍ତି ଓ ପ୍ରତାପ ପଟ୍ଟନାୟକ ପ୍ରମୁଖ ସୂଚନା ଦେଇଛନ୍ତି। ଏହି ଉତ୍ସବରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ, କେନ୍ଦ୍ରମନ୍ତ୍ରୀ, ବିଭିନ୍ନ ବିଭାଗର ମନ୍ତ୍ରୀ, ସ୍ଥାନୀୟଏକାମ୍ର ବିଧାୟକ ତଥା ଅନୁଷ୍ଠାନର ଉପସଭାପତି ବାବୁ ସିଂ, ପୂର୍ବତନ ବିଜେପି ସଭାପତି ତଥା ଅନୁଷ୍ଠାନର ଉପସଭାପତି ସମୀର ମହାନ୍ତିଙ୍କ ସମେତ ବହୁ ବିଶିଷ୍ଟ ବ୍ୟକ୍ତି ଯୋଗଦେବେ ବୋଲି ସେମାନେ କହିଛନ୍ତି।

ଭୁବନେଶ୍ୱର, ୨୪ ଫେବୃଆରୀ ୨୦୨୫

ଭୁବନେଶ୍ୱର, ୨୪ ଫେବୃଆରୀ ୨୦୨୫

• ଭାରତୀୟ ଷ୍ଟେଟ୍ ବ୍ୟାଙ୍କର ସିଏସଆର ପାଣ୍ଠିରୁ ୧୫ ଲକ୍ଷ ଟଙ୍କା ବ୍ୟୟରେ କମ୍ପ୍ୟୁଟର ଲ୍ୟାବ୍ ନିର୍ମିତ

• ଓଡ଼ିଶାର ଶିକ୍ଷା କ୍ଷେତ୍ରକୁ ସୁସମୃଦ୍ଧ କରିବାରେ ସରସ୍ୱତୀ ଶିଶୁ ବିଦ୍ୟା ମନ୍ଦିରର ରହିଛି ବଡ଼ ଭୂମିକା 

• ଭାରତୀୟ ଶିକ୍ଷା ବ୍ୟବସ୍ଥା ଓ ଭାରତୀୟ ମୂଲ୍ୟବୋଧକୁ ପୁନଃସ୍ଥାପିତ କରିବା ଆମର ଲକ୍ଷ୍ୟ 

• ଅଟଳ ଟିଙ୍କରିଂ ଲ୍ୟାବ୍ ସ୍କୁଲ ଛାତ୍ରଛାତ୍ରୀଙ୍କ ମଧ୍ୟରେ ଥିବା ବୈଜ୍ଞାନିକ ମନୋବୃତ୍ତିକୁ ବଢାଉଛି  

ଭୁବନେଶ୍ୱର, ୨୪ ଫେବୃଆରୀ ୨୦୨୫

ଭୁବନେଶ୍ୱର, ୨୩ ଫେବୃଆରୀ ୨୦୨୫