Unnatipathe

ଭୁବନେଶ୍ବର, ରାଜ୍ୟରେ ଉଦବେଗନଜନକ ସ୍ଥିତି ସୃଷ୍ଟି କଲାଣି ମହିଳା ନିଖୋଜ ପ୍ରସଙ୍ଗ। ଓଡ଼ିଶା ଏବେ ମହିଳା ନିଖୋଜରେ ମଧ୍ୟପ୍ରଦେଶ, ମହାରାଷ୍ଟ୍ର ଓ ପଶ୍ଚିମବଙ୍ଗ ପରେ ଦେଶର ଚତୁର୍ଥ ସ୍ଥାନରେ ରହିଥିବା ସଦ୍ୟ ଏନ୍‌ସିଆରବି ରିପୋର୍ଟ କହୁଛି। ସେପଟେ ସର୍ବଭାରତୀୟ ତୁଳନାରେ ରାଜ୍ୟରେ ମହିଳାଙ୍କ ଉଦ୍ଧାର ହାର ମଧ୍ୟ କମ୍‌ ଥିବାରୁ ଏହା ଏବେ ଚିନ୍ତାର ବିଷୟ ପାଲଟିଛି।ଏଭଳି ସ୍ଥିତିରେ ଜାତୀୟ ଅପରାଧ ରେକର୍ଡ ବ୍ୟୁରୋ (NCRB) ତଥ୍ୟ ଏ କ୍ଷେତ୍ରରେ ଓଡ଼ିଶାର ସ୍ଥିତି ଯେଉଁ ତଥ୍ୟ ରଖିଛି, ତାହା ଅତି ଉଦବେଗଜନକ। ଯାହା ରାଜ୍ୟର ବୁଦ୍ଧିଜୀବୀ ଓ ଏ କ୍ଷେତ୍ରରେ କାର୍ଯ୍ୟ କରୁଥିବା ସାମାଜିକ କର୍ମୀଙ୍କ ଚିନ୍ତା ବଢାଇ ଦେଇଛି।

ସୁନ୍ଦରଗଡ଼ ବାଲିଶଙ୍କରା ବ୍ଲକ୍ ସରଜଙ୍ଘା ଗାଁର ଫ୍ଲୋରା ଲାକଡ଼ାଙ୍କ ଝିଅକୁ ୧୪ ବର୍ଷ ହୋଇଥିଲା। ସେବେଠାରୁ ସେ ଦଲାଲ ସହ ଦିଲ୍ଲୀ ଯାଇ ଆଉ ଫେରିନଥିଲେ। ଏହାରି ଭିତରେ ୨୩ ବର୍ଷ ବିତିଥିଲା। ତା’ର ଫେରିବା ବାଟକୁ ଅନାଇ ବସିଛନ୍ତି ବୁଢ଼ା ବାପା-ମାଆ। ସେହି ସରଜଂଘା ଗାଁର ବ୍ଲାସିଉସ ଲାକାଡ଼ାଙ୍କ ବଡ଼ ଝିଅ ମଧ୍ୟ ଆଜିକୁ ୨୦ ବର୍ଷ ଧରି ନିଖୋଜ ଅଛନ୍ତି। ସମ୍ପର୍କୀୟଙ୍କ କଥାରେ ପଡ଼ି ମାତ୍ର ୧୪ ବର୍ଷ ବୟସରେ ଝିଅକୁ ଚାକିରି ପାଇଁ ମୁମ୍ବାଇରେ ଛାଡ଼ି ଥିଲେ। ହେଲେ ତା’ପରେ ତାଙ୍କର ଆଉ ପତ୍ତା ମିଳିନଥିଲା। ଏମାନଙ୍କ ଭଳି କେତେ ଯେ ବାପା-ମାଆ ଆଜି ମଧ୍ୟ ସେମାନଙ୍କ ନିଖୋଜ ପିଲାଙ୍କ ଫେରିବା ବାଟକୁ ଅନାଇ ବସିଛନ୍ତି। ତା’ର ହିସାବ କାହା ପାଖରେ ନାହିଁ। 

NCRBର ରିପୋର୍ଟ କହୁଛି, ଓଡ଼ିଶାରେ ୨୦୨୧ ସୁଦ୍ଧା ମୋଟ୍ ୩୫ ହଜାର ୯୮୧ ମହିଳା ନିଖୋଜ ନେଇ ରିପୋର୍ଟ ହୋଇଛି। ତା’ଭିତରୁ ୧୬ ହଜାର ୬୦୮ ଜଣ ଉଦ୍ଧାର ବା ଚିହ୍ନଟ ହୋଇଥିବା ବେଳେ ଏବେ ମଧ୍ୟ ନିଖୋଜ ଅଛନ୍ତି ୧୯ ହଜାର ୧୭୫ ମହିଳା। ସେହିଭଳି ସର୍ବଭାରତୀୟ ସ୍ତରରେ ନିଖୋଜ ମହିଳା ଉଦ୍ଧାର ହାର ୫୬.୨ ପ୍ରତିଶତ ରହିଥିବା ବେଳେ ଓଡ଼ିଶାରେ ଏ ହାର ମାତ୍ର ୪୬. ୭ ପ୍ରତିଶତ। ଯାହାକି ରାଜ୍ୟରେ ନିଖୋଜ ମହିଳାଙ୍କୁ ଉଦ୍ଧାର କ୍ଷେତ୍ରରେ ପୁଲିସ୍‌ ପାରିବା ପଣିଆ ଉପରେ ପ୍ରଶ୍ନବାଚୀ ଲଗାଇଛି। ସେହିଭଳି ୧୮ ବର୍ଷରୁ କମ୍ ବୟସର ଯୁବତୀ ଚାଲାଣ କ୍ଷେତ୍ରରେ ମଧ୍ୟରେ ଢେର ଆଗରେ ରହିଛି ଓଡ଼ିଶା। ଏପରିକି ଏହି ବର୍ଗର ଝିଅଙ୍କୁ ଉଦ୍ଧାର ହାର ୬୫.୫ ପ୍ରତିଶତ ରହିଥିବା ବେଳେ ଆମ ରାଜ୍ୟରେ ଏ ହାର ୬୧.୬ ପ୍ରତିଶତ। 

ଏ ପ୍ରସଙ୍ଗ ରାଜ୍ୟବାସୀଙ୍କ ଉଦବେଗ ବଢାଉଥିବା ବେଳେ ଏବେ ଗତ ବିଧାନସଭାରେ ଗୃହରାଷ୍ଟ୍ରମନ୍ତ୍ରୀଙ୍କ ଉତ୍ତର ମଧ୍ୟ ବଚଳିତ କଲା ଭଳି ଥିଲା। ଗତ ମାର୍ଚ୍ଚ ୨୦ ତାରିଖରେ ଗୃହ ରାଷ୍ଟ୍ର ମନ୍ତ୍ରୀ ତୁଷାରକାନ୍ତି ବେହେରା ଗତ ୫ ବର୍ଷର ତଥ୍ୟ ଦେଇ ରାଜ୍ୟରେ ଏବେ ବି ୨୬ ହଜାର ୨୪୭ ମହିଳା ଓ ୩ ହଜାର ୭୯୧ ଝିଅଙ୍କୁ ଉଦ୍ଧାର କରାଯାଇ ପାରିନଥିବା ସ୍ୱୀକାର କରିଥିଲେ। ସେପଟେ ମାନବ ଚାଲାଣ ବା ହ୍ୟୁମାନ୍‌ ଟ୍ରାଫିକିଂରେ ମଧ୍ୟ ଓଡ଼ିଶାର ସ୍ଥାନ ଅତ୍ୟନ୍ତ ଖରାପ ବୋଲି ଏନସିଆରବି ରିପୋର୍ଟ ଦର୍ଶାଇଛି। ମାନବଚାଲାଣ କ୍ଷେତ୍ରରେ ସର୍ବଭାରତୀୟ ସ୍ତରରେ ଚାର୍ଜସିଟ ହାର ୮୪.୭ ପ୍ରତିଶତ ହୋଇଥିବା ବେଳେ ଓଡ଼ିଶାରେ ଏହା ମାତ୍ର ୭୦.୪ ପ୍ରତିଶତ ରହିଛି।

ପୋଲିସ୍ ସିଷ୍ଟମର ସମସ୍ୟା ଏହା ଯେ ସେମାନେ ନିଖୋଜ ମାମଲାକୁ ଗୁରୁତର ସହ ନେଉ ନାହାନ୍ତି । ଏପରି ମାମଲା ହତ୍ୟାଠାରୁ ମଧ୍ୟ ଗମ୍ଭୀର ଅଟେ । ଏହା ଏଥିପାଇଁ କାରଣ ଯେତେବେଳେ ଗୋଟିଏ ପିଲା ନିଖୋଜ ହୁଏ, ସେତେବେଳେ ମାଆ-ବାପା ନିଜ ପିଲା ପାଇଁ ବର୍ଷ ବର୍ଷ ଧରି ଅପେକ୍ଷା କରନ୍ତି । ନିଖୋଜ ମାମଲାର ତଦନ୍ତ ହତ୍ୟା ମାମଲା ପରି ଗମ୍ଭୀରତା ସହ କରାଯିବ ଦରକାର । ନିଖୋଜ ଲୋକଙ୍କ ମାମଲାକୁ ଅଧିକାଂଶ ସମୟରେ ଅଣାଦେଖା କରାଯାଉଛି କାରଣ ତାଙ୍କ ତଦନ୍ତ ବ୍ରିଟିଶ କାଳର ପ୍ରକ୍ରିୟାରେ କରାଯାଉଛି।

ପାଟଣାଗଡ଼, ଆଲିସାନ ସିନେମା ହଲରେ ଗଣ୍ଡଗୋଳ ମାମଲାରେ କଣ୍ଟାବାଞ୍ଜି ବିଧାୟକ ସନ୍ତୋଷ ସିଂ ସାଲୁଜାଙ୍କ ପୁଅ ସେଜି ଓରଫ ଅମିତ ସିଂ ସାଲୁଜାଙ୍କ ସମେତ ମୋଟ ୭ ଜଣ ଜେଲରୁ ବାହାରିଛନ୍ତି। ଜେଲରୁ ବାହାରିଥିବା ବ୍ୟକ୍ତିମାନେ ହେଲେ କଣ୍ଟାବାଞ୍ଜି ବିଧାୟକ ସନ୍ତୋଷ ସିଂ ସାଲୁଜାଙ୍କ ପୁଅ ସେଜି ଓରଫ ଅମିତ ସିଂ ସାଲୁଜା(୩୨), ଅଜୟ ଅଗ୍ରୱାଲ(୪୦), ବିକି ଓରଫ ବିକାଶ ଅଗ୍ରୱାଲ(୩୭), ବିପୁଲ ମାରୁ(୩୭), ରାଜା ପାତ୍ର (୨୩), ରାକେଶ ସେଠ ଓ ହରିଆନାର ସିରଶା ଜିଲ୍ଲା ଡାବୁବାଲି ମଣ୍ଡି ଥାନା ଅନ୍ତର୍ଗତ ଧରମବୀର ଗୁପ୍ତା(୩୧)।

ଫେବ୍ରୁଆରି ୧ ତାରିଖରେ ବେଲପଡା ଥାନା ଅଧିନରେ ଥିବା ଆଲିସାନ ସିନେମା ହଲରେ ଗଣ୍ଡଗୋଳ ହୋଇଥିଲା। ଏହି ଗଣ୍ଡଗୋଳକୁ ନେଇ ଆଲିସାନ ସିନେମା ହଲ ମାଲିକ ବେଲପହା ଥାନାରେ ତାଙ୍କୁ ଆକ୍ରମଣ କରା ଯାଇଥିବା ନେଇ ଅଭିଯୋଗ କରିଥିଲେ। ଏହାକୁ ଭିତ୍ତି କରି ବେଲପଡା ପୁଲିସ କେସ ନଂ ୨୪ରେ ଏକ ମାମାଲା ରୁଜୁ କରି ଘଟଣାରେ ସମ୍ପୃକ୍ତ ଥିବା ଦର୍ଶାଇ କଣ୍ଟାବାଞ୍ଜି ବିଧାୟକ ସନ୍ତୋଷ ସିଂ ସାଲୁଜାଙ୍କ ପୁଅ ସେଜି ଓରଫ ଅମିତ ସିଂ ସାଲୁଜା, ଅଜୟ ଅଗ୍ରୱାଲ, ବିକି ଓରଫ ବିକାଶ ଅଗ୍ରୱାଲ, ବିପୁଲ ମାରୁ, ରାଜା ପାତ୍ର, ରାକେଶ ସେଠ ଓ ହରିଆନାର ସିରଶା ଜିଲ୍ଲା ଡାବୁବାଲି ମଣ୍ଡି ଥାନା ଅନ୍ତର୍ଗତ ଧରମବୀର ଗୁପ୍ତାଙ୍କୁ ଗିରଫ କରି କୋର୍ଟ ଚାଲାଣ କରିଥିଲା। ସେ ସମୟରେ ଜାମିନ ନମଞ୍ଜୁର ହେବାରୁ ସେମାନଙ୍କୁ ପାଟଣାଗଡ ଜେଲକୁ ପଠାଇ ଦିଆ ଯାଇଥିଲା। ପରେ ପାଟଣାଗଡ଼ ଏଡିଜେ କୋର୍ଟରେ ଜାମିନ ଆବେଦନ କରିଥିଲେ। ହେଲେ ଜାମିନ ନାମଞ୍ଜୁର ହୋଇଥିଲା।

ପରେ ମାନ୍ୟବର ହାଇକୋର୍ଟଙ୍କ ଦ୍ବାରସ୍ଥ ହୋଇଥିଲେ। ସେଠାରେ ଜାମିନ ଆବେଦନର ଶୁଣାଣି କରି ମାନ୍ୟବର ହାଇକୋର୍ଟ ଜାମିନ ଦେଇଥିବା ଜଣାପଡିଛି। ଉକ୍ତ ଜାମିନ କାଗଜ ସ୍ଥାନୀୟ/ପାଟଣାଗଡ଼ ଏସଡିଜେଏମ କୋର୍ଟରେ ଦାଖଲ କରିବା ପରେ ସେଜିଙ୍କ ସହ ଆଉ ୬ ଜଣଙ୍କୁ ସର୍ତ୍ତ ମୂଳକ ଜାମିନରେ ଜେଲରୁ ବାହାରିବା ପାଇଁ ଆଦେଶ ଦେଇଥିବା ଜଣାପଡିଛି। ଫଳରେ ଜେଲରେ ଥିବା ସେଜିଙ୍କୁ ମିଶାଇ ୭ ଜଣ ଜାମିନରେ ବାହାରିଥିବା ନେଇ ଜଣାପଡିଛି। ତାଙ୍କୁ ନେବା ପାଇଁ ତାଙ୍କ ଓକିଲ ବିଷ୍ଣୁ ପ୍ରସାଦ ଶର୍ମାଙ୍କ ସହ ତାଙ୍କ ଭାଇ ଓ ବନ୍ଧୁ ତଥା ସମ୍ପର୍କୀୟମାନେ ପାଟଣାଗଡ଼ ଜେଲ ପରିସରକୁ ପହଞ୍ଚିଥିଲେ।

ନୂଆଦିଲ୍ଲୀ, ଟିଜର ଏବଂ ଟ୍ରେଲର ରିଲିଜ ହେବା ପରଠୁ ବିବାଦରେ ଥିବା ଫିଲ୍ମ ଦ କେରଳ ଷ୍ଟୋରୀ ସିନେମାଘରେ ରିଲିଜ୍ ହୋଇଛି । ଦର୍ଶକ ଏହି ଫିଲ୍ମକୁ ଦେଖିବାକୁ ଯେପରି ମନ ସ୍ଥର କରି ନେଇଛନ୍ତି । ପ୍ରଥମ ଦିନ ବକ୍ସ ଅଫିସ୍ କଲେକ୍ସନରୁ ଏହି ଅନୁମାନ କରାଯାଉଛି । ଫିଲ୍ମରେ ଅଦା ଶର୍ମା, ଯୋଗିତା ବିହାନୀ, ସିଦ୍ଧି ଇଡନାନୀ ଏବଂ ସୋନିଆ ବଲାନୀ ମୁଖ୍ୟ ଭୂମିକାରେ ଅଭିନୟ କରିଛନ୍ତି ।ବକ୍ସ ଅଫିସ ଆୟ ଉପରେ ନଜର ରଖୁଥିବା ତରଣ ଆଦର୍ଶ ପ୍ରଥମ ଦିନ କଲେକ୍ସନ ଡାଟା ସେୟାର କରିଛନ୍ତି । ସେ କହିଛନ୍ତି ଯେ ପ୍ରଥମ ଦିନରେ ଫିଲ୍ମ ବମ୍ପର ଆୟ କରିଛି  । ପ୍ରଥମ ଦିନରେ ଫିଲ୍ମ ୮.୦୩ କୋଟି ଆୟ କରିଛି ।

ଦି କେରଳ ଷ୍ଟୋରୀର ଟ୍ରେଲର ରିଲିଜ ହେବା ପରେ ହିଁ ଏହି ଫିଲ୍ମକୁ ନେଇ ଲୋକ ମାନଙ୍କ ମଧ୍ୟରେ ଉତ୍ସାହ ଦେଖିବାକୁ ମିଳିଥିଲା । ତେବେ କିଛି ଲୋକ ଏହି ସିନେମାକୁ ବିରୋଧ ମଧ୍ୟ କରିଥିଲେ । ମାମଲା ସୁପ୍ରିମକୋର୍ଟ ଓ ହାଇକୋର୍ଟକୁ ମଧ୍ୟ ଯାଇଥିଲା । ହେଲେ କୋର୍ଟ ଫିଲ୍ମ ଉପରେ ବ୍ୟାନ କରିବାକୁ ସ୍ପଷ୍ଟ ଭାବେ ମନା କରି ଦେଇଥିଲେ । ଏବେ ଶୁକ୍ରବାର ଦିନ ଏହି ଫିଲ୍ମ ଦେଶର ବିଭିନ୍ନ ସିନେମା ହଲ ମାନଙ୍କରେ ରିଲିଜ ହୋଇଛି । ପ୍ରଥମ ଦିନ ଏହି ସିନେମାକୁ ସାରା ଦେଶରେ ପ୍ରବଳ ରେସ୍ପୋନ୍ସ ମିଳିଛି ।

ଲୋକ ମାନଙ୍କ ମଧ୍ୟରେ ଏହି ସିନେମାକୁ ନେଇ ପ୍ରବଳ ଉତ୍ସାହ ଦେଖିବାକୁ ମିଳିଛି । ଦେଶର ପାଖାପାଖି ସବୁ ସିନେମା ହଲରେ ଏହି ଫିଲ୍ମର ଶୋ ରେ ଭରପୁର ଦର୍ଶକ ରହିଥିବା ଦେଖିବାକୁ ମିଳିଛି । ଲୋକ ମାନେ ଏହି ଫିଲ୍ମକୁ ପ୍ରଶଂସା କରୁଥିବା ବେଳେ ଫିଲ୍ମର ନିର୍ଦେଶକ ସୁଦୀପ୍ତ ସେନଙ୍କୁ ମଧ୍ୟ ଖୁବ ପ୍ରଶଂସା କରୁଛନ୍ତି । କେରଳ ଷ୍ଟୋରୀ ଫିଲ୍ମରେ କଟ୍ଟରପନ୍ଥୀ ମୁସଲମାନ ମାନ ମୁସଲମାନ ଯୁବକ ମାନଙ୍କୁ ହିନ୍ଦୁ ଝିଅ ମାନଙ୍କୁ ଫସାଇବାକୁ ତାଲିମ ଦେଉଥିବା ନେଇ  ଦର୍ଶାଯାଇଛି  । ଏହା ପରେ ସେମାନେ ଅଣ ମୁସଲମାନ ହିନ୍ଦୁ ଓ ଖ୍ରୀଷ୍ଟିଆନ ଝିଅ ମାନଙ୍କର ଧର୍ମାନ୍ତରୀକରଣ କରାଯିବା ପରେ ସେହି ଝିଅ ମାନଙ୍କୁ ଇସଲାମୀ ଆତଙ୍କବାଦୀ ସଂଗଠନ ଆଇଏସଆଇଏସର ସେକ୍ସ ସ୍ଲେଭ  ଭାବେ ପଠାଇ ଦିଆଯାଏ । ସତ୍ୟ ଘଟଣା ଉପରେ ଆଧାରିତ ଏହି ଫିଲ୍ମରେ ଏହାକୁ ଅତ୍ୟନ୍ତ ନିଖୁଣ ଭାବେ ଦର୍ଶା ଯାଇଥିବା କୁହାଯାଉଛି । 

ଶୁକ୍ରବାର ୮.୦୩ କୋଟି ଟଙ୍କା।ବଲିଉଡ୍ ହଙ୍ଗାମାର ରିପୋର୍ଟ ଅନୁସାରେ, ରାଷ୍ଟ୍ରୀୟ ଚେନ ପିଭିଆ, ଆଇନକ୍ସ ଏବଂ ସିନେପୋଲିସରେ ୪ କୋଟି ଟଙ୍କାର ଆୟ ହୋଇଛି । ଫିଲ୍ମକୁ ଦର୍ଶକଙ୍କ ଭଲ ପାଇବା ମିଳିବା ଦେଖି ହଲ ମାକିଲ ଫିଲ୍ମର ଶୋ ସଂଖ୍ୟା ବଢାଇଛନ୍ତି ।‘ଦ କଶ୍ମୀର ଫାଇଲ୍ସ’ ତୁଳନାରେ ‘ଦ କେରଳ ଷ୍ଟୋରୀ’ର ପ୍ରଥମ ଦିନ ଆୟ ଦ୍ୱିଗୁଣାରୁ ଅଧିକ ରହିଛି । ଫିଲ୍ମର ୱିକେଣ୍ଡ ମଧ୍ୟ ଭଲ ରହିବା ନେଇ ଅନୁମାନ କରାଯାଉଛି । ‘ଦ କଶ୍ମୀର ଫାଇଲ୍ସ’ ପ୍ରଥମ ଦିନରେ ୩.୫୫ କୋଟି ଟଙ୍କା ଆୟ କରିଥିଲା । ‘ଦ କେରଳ ଷ୍ଟୋରୀ’ ଚଳିତ ବର୍ଷ ଟପ୍ ୫ ଓପନିଂ ଫିଲ୍ମରେ ସାମିଲ ହୋଇଛି । ଏହି ଲିଷ୍ଟର ପ୍ରଥମ ସ୍ଥାନରେ ଶାହରୁଖ ଖାନଙ୍କ ପଠାନ (୫୫ କୋଟି) ରହିଛି । ଦ୍ୱିତୀୟ ସ୍ଥାନରେ କିସି କା ଭାଇ କିସି କି ଜାନ (୧୫.୮୧ କୋଟି), ତୃତୀୟ ସ୍ଥାନରେ ତୁ ଝୁଟି ମେ ମକ୍କାର (୧୫.୭୦ କୋଟି) ଏବଂ ଚତୁର୍ଥ ସ୍ଥାନରେ ଭୋଲା (୧୧.୨୦ କୋଟି) ରହିଛି ।   

ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ମଧ୍ୟ କର୍ଣ୍ଣାଟକ ବିଧାନସଭା ନିର୍ବାଚନ  ପ୍ରଚାର ଅଭିଯାନ ବେଳେ ବେଲାରୀ ଠାରେ ଏକ ନିର୍ବାଚନୀ ସଭାକୁ ସମ୍ବୋଧିତ କରି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ କେରଳ ଷ୍ଟୋରୀ ଫିଲ୍ନମର ଉଲ୍ଲେଖ କରିଥିଲେ  । ସେ କହିଥିଲେ ଯେ ଗତ କିଛି ବର୍ଷ ମଧ୍ୟରେ ଆତଙ୍କର ଏକ ଭୟଙ୍କର ସ୍ୱରୂପ ତିଆରି ହୋଇଛି । ବୋମା ବନ୍ଧୁକ ଓ ପିସ୍ତଲର ସ୍ୱର ଶୁଣା ଯାଏ ହେଲେ ସମାଜକୁ ଭିତରକୁ ଫମ୍ପା କରୁଥିବା  ଆତଙ୍କବାଦର ଏହି ସ୍ୱରୂପର କୌଣସି ଶବ୍ଦ ଶୁଣା ଯାଏ ନାହିଁ । ହେଲେ ଏହା ସମାଜକୁ ଭିତରୁ ଫମ୍ପା କରି ଦେଇଥାଏ । ଦେଶର ନ୍ୟାୟାଳୟ ମାନେ ମଧ୍ୟ ଏହାକୁ ନେଇ ଗଭୀର ଉଦବେଗ ପ୍ରକାଶ କରି ସାରିଛନ୍ତି ।ବର୍ତମାନ କେରଳ ଷ୍ଟୋରୀ ଫିଲ୍ମ ଚର୍ଚାରେ ଅଛି । ଏହି ଫିଲ୍ମରେ ଉକ୍ତ ରାଜ୍ୟରେ ଆତଙ୍କବାଦୀ ମାନଙ୍କର ଷଡଯନ୍ତ୍ରର ଏହି ଫିଲ୍ମରେ ଖିୁଲାସା ହୋଇଛି ବୋଲି କୁହାଯାଉଛି । ଅତ୍ୟନ୍ତ ପରିଶ୍ରମୀ, ପ୍ରତିଭାଶାଳୀ, ବୌଦ୍ଧିକ ଲୋକ ମାନଙ୍କ ସୁନ୍ଦର ଭୂମି ପାଇଁ ଜଣା ଶୁଣା କେରଳ ରେ କିଭଳି ଭାବେ ଆତଙ୍କବାଦୀ ଷଡଯନ୍ତ୍ରକୁ ପ୍ରୋତ୍ସାହନ ଦିଆଯାଉଛି, ତାହା ଏହି ଫିଲ୍ମରୁ ଜଣା ପଡୁଛି ବୋଲି କହିଥିଲେ ।

ପୁରୀ, ଓଡ଼ିଶାରେ ସୁପ୍ରିମକୋର୍ଟ ପ୍ରଧାନ ବିଚାରପତି ଜଷ୍ଟିସ୍ ଡି.ୱାଇ. ଚନ୍ଦ୍ରଚୂଡ଼ । ଦୁଇ ଦିନିଆ ଓଡିଶା ଗସ୍ତରେ ଆସିଥିବା ପ୍ରଧାନ ବିଚାରପତି ଭୁବନେଶ୍ବରରେ ପହଞ୍ଚିବା ପରେ ସିଧା ପୁରୀ ଯାଇ ଶ୍ରୀମନ୍ଦିରରେ ମହାପ୍ରଭୁ ଶ୍ରୀଜଗନ୍ନାଥଙ୍କୁ ଦର୍ଶନ କରିଛନ୍ତି । ଭିତର କାଠ ନିକଟରୁ ସେ ରତ୍ନସିଂହାସନରେ ଆସିନ ଚତୁର୍ଦ୍ଧା ବିଗ୍ରହଙ୍କୁ ଦର୍ଶନ କରିବା ପରେ ମା’ ବିମଳା, ମା’ ଲକ୍ଷ୍ମୀ, ସାକ୍ଷୀଗୋପୀନାଥ, କାନପୋତା ହନୁମାନ ଓ ଅନ୍ୟାନ୍ୟ ପାର୍ଶ୍ଵ ଦେବାଦେବୀଙ୍କୁ ଦର୍ଶନ କରିଛନ୍ତି ।

ପ୍ରଧାନ ବିଚାରପତିଙ୍କୁ ଶ୍ରୀମନ୍ଦିରରେ ଜିଲ୍ଲା ପ୍ରଶାସନ ଓ ଶ୍ରୀମନ୍ଦିର ପ୍ରଶାସନ ପକ୍ଷରୁ ସ୍ବାଗତ କରାଯାଇଥିଲା । ଶ୍ରୀମନ୍ଦିର ସିଂହଦ୍ବାର ନିକଟରେ ହାଇକୋର୍ଟ ମୁଖ୍ୟ ବିଚାରପତି, ଅନ୍ୟ ବିଚାରପତି, ରାଜ୍ୟ ମୁଖ୍ୟ ଶାସନ ସଚିବ ପ୍ରଦୀପ ଜେନା, ଆଡଭୋକେଟ୍ ଜେନେରାଲ ପ୍ରମୁଖ ପ୍ରଧାନ ବିଚାରପତିଙ୍କୁ ସ୍ବାଗତ କରିଥିଲେ । ଦୁଇ ଦିନ ଓଡିଶାରେ ରହଣି ଅବସରରେ ପ୍ରଧାନ ବିଚାରପତି ଶନିବାର କଟକ ଜୁଡିସିଆଲ ଏକାଡେମୀରେ ହେବାକୁ ଥିବା ନ୍ୟାସନାଲ କନ୍‌ଫରେନ୍ସ ଅନ୍ ଡିଜିଟାଇଜେସନ ପେପରଲେସ୍ କୋର୍ଟ ସମ୍ମିଳନୀରେ ଯୋଗଦେବେ ।

ପାଟନା,ବିହାର ମୁଖ୍ୟମନ୍ତ୍ରୀ ନୀତୀଶ କୁମାରଙ୍କ ନିର୍ଦ୍ଦେଶରେ ରାଜ୍ୟ ସରକାର ଆରମ୍ଭ କରିଥିବା ଜାତିଭିତ୍ତିକ ଜନଗଣନା କାର୍ଯ୍ୟକ୍ରମକୁ ଲାଗିଛି ଝଟକା। ରାଜ୍ୟ ସରକାର ଆରମ୍ଭ କରିଥିବା ଜାତି ଭିତ୍ତିକ ଜନଗଣନା କାର୍ଯ୍ୟକ୍ରମ ଉପରେ ରୋକ ଲଗାଇଲେ ପାଟନା ହାଇକୋର୍ଟ। ରାଜ୍ୟ ସରକାର ଜାତି ଭିତ୍ତିକ ଜନଗଣନା କାର୍ଯ୍ୟକ୍ରମ ଆରମ୍ଭ କରିଥିବା ବେଳେ ଏହାର ବୈଧତାକୁ ଚ୍ୟାଲେଞ୍ଜ କରି ଏକାଧିକ ପିଟିସନ ଦାଖଲ ହୋଇଥିଲା। ଏହି ଜାତିଭିତ୍ତିକ ଜନଗଣନା ଉପରେ ରୋକ ଲଗାଇ ଦେଇଛନ୍ତି ପାଟନା ହାଇକୋର୍ଟ। ପଛୁଆ ବର୍ଗର ଲୋକଙ୍କ ପାଇଁ ସ୍ୱତନ୍ତ୍ର ଯୋଜନା କରିବା ଲକ୍ଷ୍ୟ ନେଇ ବିହାର ସରକାର ଏପରି ସର୍ଭେ ଆରମ୍ଭ କରିଥିଲେ। କିନ୍ତୁ ସରକାରଙ୍କ ସବୁ ଯୋଜନା ହାଇକୋର୍ଟରେ କାଟ ଖାଇ ଯାଇଛି। ଏବେ ବିହାର ସରକାର ଏହି ରାୟକୁ ସୁପ୍ରିମକୋର୍ଟରେ ଚ୍ୟାଲେଞ୍ଜ କରିବେ ବୋଲି ଜଣାପଡ଼ିଛି।

ରାଜ୍ୟ ସରକାର ଜାତି ଭିତ୍ତିକ ଜନଗଣନା କାର୍ଯ୍ୟକ୍ରମ ଆରମ୍ଭ କରିଥିବା ବେଳେ ଏହାର ବୈଧତାକୁ ଚ୍ୟାଲେଞ୍ଜ କରି ଏକାଧିକ ପିଟିସନ ହାଇକୋର୍ଟରେ ଦାଖଲ କରାଯାଇଥିଲା। କୋର୍ଟ ଏହାର ଶୁଣାଣି କରି ତୁରନ୍ତ ଜାତିଭିତ୍ତିକ ଜନଗଣନା ସର୍ଭେ ଉପରେ ରୋକ ଲଗାଇବାକୁ ନିର୍ଦ୍ଦେଶ ଦେଇଛନ୍ତି। ସେହିପରି ଚୂଡ଼ାନ୍ତ ରାୟ ପ୍ରକାଶ ନ ପାଇବା ଯାଏ ସଂଗୃହୀତ ହୋଇଥିବା ତଥ୍ୟକୁ ସୁରକ୍ଷିତ କରି ରଖାଯିବ ଓ କେହି ଯେମିତି ଏହି ତଥ୍ୟ ବିଷୟରେ ନ ଜାଣିବେ, ସେକଥାକୁ ସରକାର ନିଶ୍ଚିତ କରିବେ। କୋର୍ଟ ମାମଲା ପରବର୍ତ୍ତୀ ଶୁଣାଣି ଜୁଲାଇ ୭ରେ କରିବେ।କୋର୍ଟ କହିଛନ୍ତି, ବିହାର ସରକାର ଚଳାଇଥିବା ଜାତିଭିତ୍ତିକ ଜନଗଣନା ବିରୋଧରେ ଏକାଧିକ ଆବେଦନ ହୋଇଛି। ସର୍ଭେ ବେଳେ ସଂଗ୍ରହ ହେଉଥିବା ତଥ୍ୟର ସୁରକ୍ଷା ଓ ଅଖଣ୍ଡତା ଉପରେ ମଧ୍ୟ ପ୍ରଶ୍ନ ଉଠିଛି। ଏହି ପ୍ରସଙ୍ଗରେ ରାଜ୍ୟ ସରକାର ବିସ୍ତୃତ ଭାବେ ସମସ୍ତଙ୍କୁ ଅବଗତ କରାଇବା ଦରକାର। ପ୍ରଥାମିକ ଭାବେ ଆମର ମତାମତ ହେଲା ଯେ ଜାତିଭିତ୍ତିକ ସର୍ଭେ କରିବାର ଅଧିକାର ରାଜ୍ୟ ପାଖରେ ନାହିଁ। ଏପରି ସର୍ଭେ ଜନଗଣନା ସହ ସମାନ। ଏହାର ଅର୍ଥ ଜନଗଣନା ଅଧିକାର ସଂସଦର ରହିଛି।”

ରାଜ୍ୟ ବିଧାନସଭାରେ ବିଭିନ୍ନ ରାଜନେତାଙ୍କ ମଧ୍ୟରେ ସର୍ଭେରୁ ସଂଗ୍ରହ ହେଉଥିବା ତଥ୍ୟକୁ ଶେୟାର କରିବା ପାଇଁ ସରକାର ରଖିଥିବା ଆଭିମୁଖ୍ୟକୁ ନେଇ ମଧ୍ୟ କୋର୍ଟ ଚିନ୍ତା ପ୍ରକଟ କରିଛନ୍ତି। ଗୋପନୀୟତା ଅଧିକାର ସହ ଏହା ଜଡ଼ିତ ବୋଲି କୋର୍ଟ କହିଛନ୍ତି। ଜାନୁଆରୀ ୭ରୁ ୨୧ ଯାଏ ବିହାରରେ ପ୍ରଥମ ପର୍ଯ୍ୟାୟ ଜାତି ଭିତ୍ତିକ ସର୍ଭେ କରାଯାଇଥିଲା। ଦ୍ୱିତୀୟ ରାଉଣ୍ଡ ସର୍ଭେ ଏପ୍ରିଲ ୧୫ରୁ ଆରମ୍ଭ ହୋଇଥିବା ବେଳେ ମେ ୧୫ ଯାଏ ଚାଲିବାର ଥିଲା। କୋର୍ଟ ମାମଲା ପରବର୍ତ୍ତୀ ଶୁଣାଣି ଜୁଲାଇ ୭ରେ କରିବେ। ଜାତି ଭିତ୍ତିକ ଜନଗଣନାରେ ଖର୍ଚ୍ଚ ହେବାକୁ ଥିବା ୫୦୦ କୋଟିକୁ ଅଜଥା ଖର୍ଚ୍ଚ ବୋଲି ଦର୍ଶାଇଥିଲେ ପିଟିସନରଙ୍କ ଓକିଲ। ଏହାସହ ଏହା ଷ୍ଟାଟସ ଆଣ୍ଡ ସେନସସ୍ ଆକ୍ଟ 1948କୁ ଉଲ୍ଲଂଘନ କରୁଥିବା ଯୁକ୍ତି ବାଢ଼ିଥିଲେ।  

ନୂଆଦିଲ୍ଲୀ, ଫିଲ୍ମ ‘ଟିପୁ’ର ଟିଜର ଜାରି ହୋଇଛି । ଟିଜର ରିଲିଜ୍ ହେବା ସହ ସୋସିଆଲ୍ ମିଡିଆରେ ବିବାଦ ମଧ୍ୟ ଆରମ୍ଭ ହୋଇଛି । ଫିଲ୍ମଟି ମହୀଶୂରର ଟିପୁ ସୁଲତାନଙ୍କ ଉପରେ ଆଧାରିତ ଅଟେ । ଅନେକ ପୁସ୍ତକରେ ଟିପୁ ସୁଲତାନଙ୍କ ଉପଲବ୍ଧି ବିଷୟରେ କୁହାଯାଇଛି । କିନ୍ତୁ ଫିଲ୍ମରେ ଟିପୁ ସୁଲତାନ ହିନ୍ଦୁଙ୍କ ଉପରେ କରିଥିବା ବର୍ବରତା ବିଷୟରେ କୁହାଯାଇଛି । ଫିଲ୍ମର ନିର୍ମାତା ଟିଜର ଜରିଆରେ ଦାବି କରିଛନ୍ତି ଯେ ଟିପୁ ସୁଲତାନ ସମୟରେ ୮ ହଜାର ହିନ୍ଦୁ ମନ୍ଦିର ନଷ୍ଟ କରାଯାଇଛି । କେବଳ ଏତିକି ନୁହେଁ, ଟିପୁ ସୁଲତାନ ଲକ୍ଷାଧିକ ହିନ୍ଦୁଙ୍କ ଧର୍ମଙ୍କ ଭ୍ରଷ୍ଟ କରିଥିଲେ ।

ଫିଲ୍ମର ନିର୍ମାତା ଟିଜରର ପ୍ରଥମ ଟେକ୍କଟରେ ଟିପୁ ସୁଲତାନଙ୍କ ହିନ୍ଦୁ ବିରୋଧୀ ହେବା ନେଇ ପ୍ରମାଣ ଦିଆଯାଇଛି । ପରେ ଫିଲ୍ମରେ ଟିପୁ ସୁଲତାନର ଭୂମିକା ନିର୍ବାହ କରୁଥିବା ଅଭିନେତାଙ୍କ ଉପରେ ବିକୃତ ଚେହେରା ଦେଖାଯାଇଛି । ଫିଲ୍ମ ନିର୍ମାତା ସନ୍ଦୀପ ସିଂ ରିଜର ଲଞ୍ଚ ବେଳେ କହିଛନ୍ତି, ସତ କହିବାକୁ ଗଲେ ଟିପୁ ସୁଲତାନ, ସୁଲତାନ କରିବା ପାଇଁ ଯୋଗ୍ୟ ନୁହେଁ । ଆମ ଇତିହାସର ପାଠ୍ୟପୁସ୍ତକରେ ଦର୍ଶାଯାଇଛି ଯେ ଟିପୁ ସୁଲତାନ ଜଣେ ବାହାଦୂର ଥିଲେ । କିନ୍ତୁ କେହି ମଧ୍ୟ ତାର ଖରାପ ପକ୍ଷକୁ ଜାଣି ନାହାନ୍ତି । ମୁଁ ଭବିଷ୍ୟତର ପିଢିକୁ ତାର ଅସଲ ଚେହେରା ଦେଖାଇବାକୁ ଚାହୁଁଛି ।

ଅନ୍ୟପଟେ ଫିଲ୍ମର ଲେଖକ ରଜତ ସେଠୀ କହିଛନ୍ତି, ଟିପୁ ସୁଲତାନ ଏପରି ଏକ ଐତିହାସିକ ବ୍ୟକ୍ତି ଯାହାଙ୍କୁ ବଡ଼ ଆକାର ଦର୍ଶାଯାଇଛି । ଏବଂ କ୍ରୁରତାକୁ ଲୁଚାଇ ଦିଆଯାଇଛି । କେବଳ ଇତିହାସରେ ନୁହେଁ ବରଂ ଲୋକପ୍ରିୟ ସଂକୃତି, ଫିଲ୍ମ, ଥିଏଟର ଆଦିରେ ମଧ୍ୟ ଟିପୁର ଚରିତ୍ରକୁ ସନ୍ତୁଳିତ କରାଯାଇଛି । କିନ୍ତୁ ଆମର ଏହି ଫିଲ୍ମ ଏହି କାହାଣୀରେ ସୁଧାର ଆଣିବାରେ ପ୍ରୟାସ କରିବ।

ନୂଆଦିଲ୍ଲୀ, ମଣିପୁର ହିଂସାକାଣ୍ଡ ମଧ୍ୟରେ ସରକାର ଦଙ୍ଗାକାରୀଙ୍କୁ ଦେଖିବା କ୍ଷଣି ଗୁଳି ମାରିବାକୁ ଆଦେଶ ଦେଇଛନ୍ତି। ସରକାରଙ୍କ ତରଫରୁ ଜାରି ଆଦେଶରେ କୁହାଯାଇଛି ପ୍ରଶାସନ ଏଭଳି ଭୀଷଣ ପରିସ୍ଥିତିରେ ଏଭଳି ପଦକ୍ଷେପ ନିଅନ୍ତୁ। ଆଦିବାସୀ ଓ ମୈତୈ ସଂପ୍ରଦାୟ ମଧ୍ୟରେ ସୃଷ୍ଟି ହୋଇଥିବା ଭୟଙ୍କର ସଂଘର୍ଷ ଯୋଗୁ ମଣିପୁର ସ୍ଥିତି ସାଂଘାତିକ ହୋଇଛି। ବିଭିନ୍ନ ସ୍ଥାନରେ ପୋଡ଼ାଜଳା ଓ ହିଂସାକାଣ୍ଡ ଯୋଗୁ ସ୍ଥିତି ଅଣାୟାତ୍ତ ହେବାରେ ଲାଗିଛି। ସ୍ଥିତିକୁ ଦେଖି ଆଜି ରାଜ୍ୟପାଳ ଶୁଟ ଆଟ ସାଇଟ୍‌ ବା ବିକ୍ଷୋଭକାରୀଙ୍କୁ ଦେଖିବା ମାତ୍ରେ ଗୁଳି କରି ଦେବାକୁ ନିର୍ଦ୍ଦେଶ ଦେଇଛନ୍ତି। ପ୍ରଥମେ ଏହି ଶୁଟ ଆଟ ସାଇଟ୍‌ ପ୍ରସ୍ତାବ ମଣିପୁର ଗୃହ ବିଭାଗ ପକ୍ଷରୁ ରାଜ୍ୟପାଳଙ୍କ ପାଖକୁ ପଠା ଯାଇଥିଲା। ରାଜ୍ୟପାଳ ସ୍ଥିତିକୁ ଦେଖି ଏହି ପ୍ରସ୍ତାବ ଉପରେ ମୋହର ମାରିଛନ୍ତି। ଏଥିସହ ସବୁ ଲୋକଙ୍କୁ ଘର ଭିତରେ ରହିବାକୁ ନିର୍ଦ୍ଦେଶ ଜାରି କରାଯାଇଛି।

ମେ ୩ ତାରିଖରେ ଆଦିବାସୀଙ୍କ ପକ୍ଷରୁ ଗୋଟିଏ ଶୋଭାଯାତ୍ରା କରାଯାଉଥିଲା। ଏହି ସମୟରେ ସେମାନଙ୍କ ଉପରେ ମୈତୈ ସଂପ୍ରଦାୟର ଲୋକମାନେ ଆକ୍ରମଣ କରିଥିଲେ। ଫଳରେ ମଣିପୁରର ବିଭିନ୍ନ ସ୍ଥାନରେ ପୋଡ଼ାଜଳା ଦେଖାଯାଇଥିଲା। ସ୍ଥିତିକୁ ଦେଖି ୧୪୪ ଧାରା ଲାଗୁ କରାଯିବା ସହ ଇଣ୍ଟରନେଟ ସେବାକୁ ବନ୍ଦ କରାଯାଇଛି।ତଥାପି ବିଭିନ୍ନ ସ୍ଥାନରେ ହିଂସାକାଣ୍ଡ ଘଟିବାରୁ ରାଜ୍ୟପାଳ ସମସ୍ତ ଜିଲ୍ଲା ମାଜିଷ୍ଟ୍ରେଟ, ସବୁ ଡିଭିଜନାଲ ମାଜିଷ୍ଟ୍ରେଔ କାର୍ଯ୍ୟ ନିର୍ବାହୀ ମାଜିଷ୍ଟ୍ରେଟ/ ସ୍ପେଶାଲ ମାଜିଷ୍ଟ୍ରେଟଙ୍କୁ ବିଶେଷ କ୍ଷେତ୍ରରେ ଓ ସ୍ଥିତିକୁ ଦେଖି ଶୁଟ ଆଟ ସାଇଟ ନିର୍ଦ୍ଦେଶ ଦେବାର ଅଧିକାର ପ୍ରଦାନ କରିଛନ୍ତି। ଏଥିସହ ସ୍ଥିତିକୁ ନିୟନ୍ତ୍ରଣ ମଧ୍ୟକୁ ଆଣିବା ପାଇଁ ଆବଶ୍ୟକ ସବୁ ପ୍ରକାରର ପଦକ୍ଷେପ ନେବାକୁ ମଧ୍ୟ ସେ କହିଛନ୍ତି।

ସ୍ଥିତିକୁ ଦେଖି ମଣିପୁରରେ ଆର୍ମି ଓ ଆସାମ ରାଇଫଲର ୫ କଲମ ଯବାନଙ୍କୁ ମୁତୟନ କରାଯାଇଛି। ଆଉ ୧୪ କଲମ ଯବାନଙ୍କୁ ଷ୍ଟାଣ୍ଡବାଇରେ ରଖାଯାଇଛି। ହିଂସା କ୍ଷତିଗ୍ରସ୍ତ ଅଞ୍ଚଳରୁ ଇତି ମଧ୍ୟରେ ୯ ହଜାର ଲୋକଙ୍କୁ ସୁରକ୍ଷିତ ଭାବେ ଉଦ୍ଧାର କରାଯାଇ ଆଶ୍ରୟ ସ୍ଥଳରେ ରଖାଯାଇଛି। ଏବେ ଲୋକଙ୍କୁ ଉଦ୍ଧାର କରିବା ପ୍ରକ୍ରିୟା ଜାରି ରହିଥିବା ପ୍ରତିରକ୍ଷା ମନ୍ତ୍ରଣାଳୟ ପକ୍ଷରୁ ସୂଚନା ଦିଆଯାଇଛି। ମୈତୈ ସଂପ୍ରଦାୟର ଲୋକମାନେ ନିଜକୁ ଅନୁସୂଚିତ ଜନଜାତି ବର୍ଗରେ ସାମିଲ କରିବାକୁ ଦାବି କରୁଛନ୍ତି। ହେଲେ ଏହାକୁ ଆଦିବାସୀ ଛାତ୍ର ସଙ୍ଗଠନ ‘ଆଦିବାସୀ ଏକତା ମୋର୍ଚ୍ଚା’ବିରୋଧ କରୁଛି। ବୁଧବାର ‘ଆଦିବାସୀ ଏକତା ମୋର୍ଚ୍ଚା’ପକ୍ଷରୁ ଏହା ବିରୋଧରେ ଗୋଟିଏ ଶୋଭାଯାତ୍ରା ବାହାରିଥିବା ବେଳେ ଏଥିରେ ହଜାର ହଜାର ସଂଖ୍ୟାରେ ଲୋକେ ସାମିଲ ହୋଇଥିଲେ।

ଉକ୍ତ ଶୋଭଯାତ୍ରା ବେଳେ ଉଭୟ ଆଦିବାସୀ ଓ ଅଣଆଦିବାସୀ ମୁହାଁମୁହିଁ ହୋଇଥିଲେ। ଘଟଣାସ୍ଥଳରେ ତୀବ୍ର ଉତ୍ତେଜନା ପ୍ରକାଶ ପାଇଥିଲା। ସ୍ଥିତିକୁ ନିୟନ୍ତ୍ରଣ କରିବା ପାଇଁ ପୁଲିସ୍‌କୁ ଲୁହବୁହା ଗ୍ୟାସ ପ୍ରୟୋଗ କରିଥିଲା। ତଥାପି ବିଭିନ୍ନ ଜିଲ୍ଲାରେ ଏହାକୁ ନେଇ ପୋଡ଼ାଜଳା ଦେଖିବାକୁ ମିଳିଛି। ରାଜ୍ୟର ମୋଟ ଜନସଂଖ୍ୟାର ୫୩% ହେଉଛନ୍ତି ମୈତୈ ସଂପ୍ରଦାୟର ଲୋକ। ସେମାନେ ନିଜକୁ ମଣିପୁରର ଆଦିମ ଅଧିବାସୀ ବୋଲି ଦାବି କରିଛନ୍ତି।

ଏହାରି ମଧ୍ୟରେ ମୁଖ୍ୟମନ୍ତ୍ରୀ ଏନ ବିରେନ ସିଂହ ଭିଡିଓ ଜାରି କରି ଲୋକଙ୍କୁ ଶାନ୍ତି ରକ୍ଷା କରିବାକୁ ଅପିଲ୍ କରିଛନ୍ତି। ରାଜ୍ୟରେ ଦୁଇ ସମୁଦାୟଙ୍କ ମଧ୍ୟରେ ଭୁଲ ବୁଝାମଣା ଯୋଗୁଁ ଏଭଳି ହିଂସା ହେଉଥିବା କହିଛନ୍ତି ମୁଖ୍ୟମନ୍ତ୍ରୀ ଏନ ବିରେନ। ସେ ଆହୁରି କହିଛନ୍ତି ଆଗକୁ ଯାହାବି ଭଙ୍ଗାରୁଜା ଏବଂ ହିଂସା ହେବ ତାହା ବିରୋଧରେ ଆମେ କାର୍ଯ୍ୟାନୁଷ୍ଠାନ ନିଆଯିବ।

ବିବାଦର ମୂଳ କାରଣ କ’ଣ? 

ମଣିପୁରର ସମୁଦାୟ ଅଞ୍ଚଳର ପ୍ରାୟ ୮୯% ପାହାଡ଼ିଆ ଅଟେ । ଏଠାରେ ତିନୋଟି ସମ୍ପ୍ରଦାୟ ବସବାସ କରନ୍ତି – ମୈତାଇ, ନାଗା ଏବଂ କୁକି । ସେମାନଙ୍କ ମଧ୍ୟରୁ ନାଗା ଓ କୁକିମାନଙ୍କୁ ଆଦିବାସୀ ସମ୍ପ୍ରଦାୟର ମାନ୍ୟତା ମିଳିଥିବା ବେଳେ ମୈତାଇକୁ ଅଣ ଆଦିବାସୀ ମାନ୍ୟତା ମିଳିଛି। ମଇତାଇ ହିନ୍ଦୁ ଧର୍ମର ହୋଇଥିବା ବେଳେ ଅଧିକାଂଶ ନାଗା ଓ କୁକି ଖ୍ରୀଷ୍ଟିଆନ ଧର୍ମର ଅଟନ୍ତି । ବିବାଦର କାରଣ ହେଉଛି ମଣିପୁରର ଆଇନ ଅନୁଯାୟୀ କେବଳ ଅନୁସୂଚିତ ଜନଜାତି ସମ୍ପ୍ରଦାୟର ଲୋକମାନେ ପାହାଡ଼ିଆ ଅଞ୍ଚଳରେ ବସବାସ କରିପାରିବେ। ଅର୍ଥାତ୍ ନିଜ ଘର ତିଆରି କରି ରୋଜଗାର କରିପାରିବେ। ରାଜ୍ୟର ପ୍ରାୟ ୯୦ ପ୍ରତିଶତ ଅଞ୍ଚଳ ପାହାଡ଼ିଆ। ମୈତାଇ ସମ୍ପ୍ରଦାୟକୁ ଅନୁସୂଚିତ ଜାତି (ଏସ୍ ସି) ମାନ୍ୟତା ମିଳିଥିବା ବେଳେ ଏହି ପାହାଡ଼ିଆ ଅଞ୍ଚଳରେ ଏହି ଜନଜାତି ନିଜର ଘର ତିଆରି କରିପାରିବେ ନାହିଁ। କିନ୍ତୁ ସେମାନେ ତେଣୁ ସେମାନଙ୍କ ମାନ୍ୟତା ଅନୁସୂଚିତ ଜାତି (ଏସ୍ ସି)ରୁ ଅନୁସୂଚିତ ଜନଜାତି (ଏସ୍ ଟି)ରେ ପରିଣତ କରିବା ପାଇଁ ବର୍ଷ ବର୍ଷ ଧରି ଦାବି କରି ଆସୁଛନ୍ତି, ଯାହାଦ୍ୱାରା ସେମାନେ ମଧ୍ୟ ପାହାଡ଼ିଆ ଅଞ୍ଚଳକୁ ଯାଇପାରିବେ। ସେମାନଙ୍କ ଦାବି ଅନୁସାରେ ବେଆଇନ ବାଂଲାଦେଶୀ ଓ ରୋହିଙ୍ଗ୍ୟାଙ୍କ ଆଗମନ ଯୋଗୁଁ ସେମାନଙ୍କ ବାସସ୍ଥଳୀ ସଂକୁଚିତ ହେଉଛି । ଏଣୁ ସେମାନଙ୍କୁ ପହାଡ଼ିଆ ଅଂଚଳରେ ରହିବାକୁ ଅନୁମତି ଦିଆଯାଉ । କିନ୍ତୁ ଏହାକୁ ନାଗା ଓ କୁକି ଆଦିବାସୀମାନେ ବିରୋଧ କରୁଛନ୍ତି । ଏହାକୁ ନେଇ ଉଭୟ ପକ୍ଷ ମଧ୍ୟରେ ବିବାଦ ଦେଖାଦେଇଛି ।

ନୂଆଦିଲ୍ଲୀ,ବିବାଦରେ ଥିବା କେରଳା ଷ୍ଟୋରୀ ଫିଲ୍ମ ଉପରେ ରୋକ ଲଗାଇବାକୁ ମନା କରିଛନ୍ତି ସୁପ୍ରିମକୋର୍ଟ। ଏକାଧିକ ଭାଷାରେ ରିଲିଜ୍‌ ହେବାକୁ ଥିବା କେରଳା ଷ୍ଟୋରୀରେ ଘୃଣା ସୃଷ୍ଟିକାରୀ ବୟାନ ରହିଛି। ଏହା ଅଡିଓ ଭିଜୁଆଲରେ କରାଯାଉଥିବା ଅପପ୍ରଚାରର ଅଂଶବିଶେଷ ବୋଲି ଦାବି କରି ଆବେଦନକାରୀ ସୁପ୍ରିମକୋର୍ଟଙ୍କ ଦ୍ୱାରସ୍ଥ ହୋଇଥିଲେ।  ସୁପ୍ରିମକୋର୍ଟ କେରଳା ଷ୍ଟୋରୀ ରିଲିଜ  ହେବା ଉପରେ ରୋକ ଲଗାଇବାକୁ ମନା କରି ଦେଇଛନ୍ତି। ଅନ୍ୟ ପକ୍ଷରେ ସେନସର ବୋର୍ଡ ମଧ୍ୟ ଫିଲ୍ମକୁ ଏ ସାର୍ଟିଫିକେଟ ପ୍ରଦାନ କରି ପାସ କରି ଦେଇଛି ।  କେରଳା ଷ୍ଟୋରୀ କେରଳର ସେହି ଝିଅ ମାନଙ୍କର ବାସ୍ତବିକ କାହାଣୀ ଉପରେ ଆଧାରିତ ଯେଉଁ ମାନେ ମିଛ ପ୍ରେମ ଓ ଇସଲାମୀ ଧର୍ମାନ୍ତରୀକରଣ ଜାଲରେ ଫସା ଯାଇ ଆଇଏସଆଇଏସର ଆତଙ୍କବାଦୀ ମାନଙ୍କ ପାଇଁ ସେକ୍ସ ସ୍ଲେଭ କରାଯାଇଛି ।  

ସୁପ୍ରିମକୋର୍ଟରେ ଏହି ସିନେମା ଉପରେ ରୋକ ଲଗାଇବାକୁ ଏକ ଇଣ୍ଟରଲକ୍ୟୁଟାରୀ ଆପ୍ଲିକେସନ ଦାଖଲ କରାଯାଇଥିଲା । ତେବେ ସୁପ୍ରିମକୋର୍ଟ ମଙ୍ଗଳବାର ଦିନ ଏହା ଉପରେ ଶୁଣାଣି କରିବାକୁ ଆଦୌ  ଆଗ୍ରହ ଦେଖାଇ ନ ଥିଲେ । ଜଷ୍ଟିସ କେ ଏମ ଜୋସେଫ ଓ ଜଷ୍ଟିସ ବିଭି ନାଗରତ୍ନଙ୍କ ପୀଠରେ ଏହାର ଉଲ୍ଲେଖ କରାଯାଇଥିଲା। ହେଟ ସ୍ପିଚ ସମ୍ପର୍କିତ ଅପରାଧକୁ ନେଇ ସୁପ୍ରିମକୋର୍ଟରେ ଏକ ପେଣ୍ଡିଂ ରିଟ ପିଟିସନ ଦାଖଲ କରାଯାଇଛି । ଏଥିରେ ଏହି  ଇଣ୍ଟରଲକ୍ୟୁଟାରୀ ଆପ୍ଲିକେସନ ଦାଖଲ କରାଯାଇଥିଲା । ସୁପ୍ରିମକୋର୍ଟ କହିଥିଲେ ଯେ ଏହା ଜରିଆରେ କୌଣସି ଫିଲ୍ମର ରିଲିଜକୁ ଚ୍ୟାଲେଞ୍ଜ କରିବା ଠିକ ଉପାୟ ନୁହେଁ । 

ଓକିଲ ନିଜାମ ପାଶା ଏହା ଉପରେ ତୁରନ୍ତ ଶୁଣାଣି କରାଯାଉ ବୋଲି ଦାବି କରିଥିଲେ । ସେ ଏହାକୁ ହେଟ ସ୍ପିଚର ଘଟଣା ବୋଲି କହି ଥିଲେ । ସେ ଏହାକୁ ଅଡିଓ ଭିଜୁଆଲ ହେଟ ପ୍ରପାଗଣ୍ଡା ବୋଲି କହିଥିଲେ। ଏହାର ଉତ୍ତରରେ ଜଜ ପ୍ରଶ୍ନ କରିଥିଲେ ଯେ ଏହି ପ୍ରସଙ୍ଗକୁ ହାଇକୋର୍ଟରେ କାହିଁକି ଉଠାଯାଇପାରିବ ନାହିଁ ।ସମସ୍ତ ପ୍ରକ୍ରିୟା ସୁପ୍ରିମକୋର୍ଟରେ ହିଁ କାହିଁକି ଆରମ୍ଭ ହେବ । ଓକିଲ କପିଲ ସିବଲ ଟ୍ରେଲରର ଟ୍ରାନସକ୍ରିପ୍ଟ ପଢିବାକୁ ଦାବି କରିଥିଲେ । ସୁପ୍ରିମକୋର୍ଟ କହିଥିଲେ ଯେ ଏହି ଫିଲ୍ମକୁ ସେନସର ବୋର୍ଡ ସାର୍ଟିଫାୟ କରି ସାରିଛି । ତେଣୁ ଏହା ଉପରେ ଏକ ପିଟିସନ ଦାଖଲ କରି ଶୁଣାଣୀ ପାଇଁ ଦାବି କରାଯାଇ ପାରିଥାନ୍ତା । କପିଲ ଶିବଲ ବାରମ୍ବାର ଦଲିଲ ଦେଉଥିଲେ ଯେ ଫିଲ୍ମକୁ ରିଲିଜ ହେବା ପାଇଁ ଖୁବ କମ ସମୟ ବଳିଛି। ସେ ଏହାକୁ ମୁଖ୍ୟ ବିଚାରପତିଙ୍କ ନିକଟରେ ପିଟିସନ ଫାଇଲ କରି ତ୍ୱରିତ ଶୁଣାଣୀ ପାଇଁ ଦାବି କରିବେ । 

ଜବାବରେ ଶିବଲ କହିଥିଲେ, ଆମେ ଯାହା ବି ଦରକାର ସବୁ କିଛି କରିବୁ। ଜଷ୍ଟିସ ନାଗରତ୍ନା କହିଥିଲେ, ଆବେଦନକାରୀ ପ୍ରଥମେ ହାଇକୋର୍ଟ ଯିବାର ଥିଲା। ଓକିଲ ନିଜାମ କହିଥିଲେ, ଏଥିପାଇଁ ଆଦୌ ସମୟ ନାହିଁ। କାରଣ ସିନେମା ୫ ତାରିଖରେ ରିଲିଜ ହେବାକୁ ଯାଉଛି। ଖଣ୍ଡପୀଠ ପୁଣି କହିଥିଲେ, ଏହା କୌଣସି ପଡ଼ିଆ ନୁହେଁ। ନଚେତ୍ ସମସ୍ତେ ସୁପ୍ରିମକୋର୍ଟ ଆସିବା ଆରମ୍ଭ କରିଦେବେ। ଏହାପରେ କୋର୍ଟ ଫିଲ୍ମର ରିଲିଜ୍‌ ଉପରେ ରୋକ ଲାଗିପାରିବ ନାହିଁ ବୋଲି କହିଛନ୍ତି। ଗତବର୍ଷ ନଭେମ୍ବରରେ ଟିଜର ରିଲିଜ ହେବା ଦିନଠାରୁ କେରଳା ଷ୍ଟୋରୀ ବିବାଦ ମଧ୍ୟରେ ରହିଆସିଛି। ଏଥିରେ କୁହାଯାଇଥିଲା ଯେ କେରଳରୁ ୩୨ ହଜାର ଝିଅ ନିଖୋଜ ହେବା ପଛର କାରଣ ଜଣାପଡ଼ିଯାଇଛି। ଏହି ଫିଲ୍ମ କହିଛି ଯେ କେରଳରୁ ଯେଉଁ ୩୨ ହଜାର ଯୁବତୀ ନିଖୋଜ ହୋଇଥିଲେ ସେମାନେ ଆତଙ୍କବାଦୀ ସଂଗଠନ ଇସଲାମିକ ଷ୍ଟେଟ (ଆଇଏସ୍‌)ରେ ସାମିଲ ହୋଇଥିଲେ। ଏହାକୁ ନେଇ ଦେଖାଦେଇଥିଲା ବିବାଦ। ଆଉ ଉଠିଥିଲା ଅନେକ ପ୍ରଶ୍ନ।

ଅନ୍ୟପକ୍ଷରେ ଜାତୀୟ ଗଣମାଧ୍ୟମ ରିପୋର୍ଟ ଅନୁସାରେ ସେନସର ବୋର୍ଡ କିଛି ପରିବର୍ତ୍ତନ ସହ ଏହି ଫିଲ୍ମକୁ ରିଲିଜ ପାଇଁ ଅନୁମତି ଦେଇଛନ୍ତି । ଏକ ଦୃଶ୍ୟରେ ହିନ୍ଦୁ ଦେବାଦେବୀଙ୍କ ପ୍ରତି ଏକ ମୁସଲମାନ ଚରିତ୍ର ଦେଇଥିବା ମନ୍ତବ୍ୟକୁ ହଟା ଯାଇଛି । ଭାରତୀୟ କମ୍ୟୁନିଷ୍ଟ ମାନଙ୍କର ଦୋହରା ଚରିତ୍ର ସମ୍ପର୍କରେ କୁହାଯାଉଥିବା ଏକ ସଂଳାପରୁ ଭାରତୀୟ ଶବ୍ଦକୁ ହଟା ଯାଇଛି । କେରଳର ପୂର୍ବତନ ମୁଖ୍ୟମନ୍ତ୍ରୀ ଅଚ୍ୟୁତାନନ୍ଦନ କେରଳକୁ ଇସଲାମୀ ଷ୍ଟେଟ କରାଯିବା ସମ୍ପର୍କିତ ଭବିଷ୍ୟତବାଣୀର ଟିଭି ଇଣ୍ଟରଭ୍ୟୁକୁ ଫିଲ୍ମରୁ ହଟାଇ ଦିଆଯାଇଛି । ସେନସର ବୋର୍ଡ ମୋଟ 10ଟି ସିନକୁ ହଟାଇ ଫିଲ୍ମକୁ ରିଲିଜ କରିବାକୁ ଅନୁମତି ଦେଇଛନ୍ତି।

କେରଳରେ ଏହି ସିନେମାକୁ ବ୍ୟାନ କରିବାକୁ ଦାବି ହୋଇଛି। ଉଭୟ କେରଳ ସରକାର ଓ ବିରୋଧୀ ଦଳଗୁଡ଼ିକ ଏହି ଫିଲ୍ମକୁ ବିରୋଧ କରିଛନ୍ତି। ଅନ୍ୟପକ୍ଷରେ କେରଳର ମୁସଲିମ ୟୁଥ ଲିଗ କହିଛି ଯେ ଯଦି କେହି ପ୍ରମାଣ କରି ଦେବେ ଯେ ଆଇଏସ୍ ରାଜ୍ୟର ୩୨ ହଜାର ଯୁବତୀଙ୍କୁ ନେଇ ସେମାନଙ୍କ ହାତରେ ଅସ୍ତ୍ର ଧରାଇଛି, ତା’ହେଲେ ତାଙ୍କୁ କୋଟିଏ ଟଙ୍କାର ପୁରସ୍କାର ଦିଆଯିବ।